ވިލިމާލޭގެ ފަރަށް ލިބުނު ގެއްލުން ބެލުމުގެ މަސައްކަތް ފަށައިފި

ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ)، ވިލިމާލެ ފަރަށް އެރުމުގެ ސަބަބުން ފަރަށް ލިބުނު ގެއްލުން ދެނެގަތުމުގެ މަސައްކަތް އެންވަޔަރަމަންޓަލް ޕްރޮޓެކްޝަން އޭޖެންސީ (އީޕީއޭ)އިން ފަށައިފިއެވެ.

ރާއްޖެއެމްވީއަށް މައުލޫމާތުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވީ، ފަރަށް ލިބުނު ގެއްލުން ދެނެގަތުމުގެ ސަރވޭގެ މަސައްކަތް ފަށާފައިވަނީ އަންގާރަ ދުވަހުގެ ހެނދުނު 8:00ގައި ކަމަށެވެ. ނަޢީމް ވިދާޅުވީ ސަރވޭގެ މަސައްކަތް ނިންމާލުމަށް 1 ދުވަސް ނަގާނެކަމަށެވެ. 8 މީހުންގެ ޓީމެއް މި މަސައްކަތުގައި ހަރަކާތްތެރިވަމުންދާކަން ފާހަގަކުރައްވައި ނައީމް ވިދާޅުވީ، ފަރަށް ލިބުނު ގެއްލުން ބެލުމަށްފަހު، ގަވާއިދުގެ މަތިން ފިޔަވަޅު އަޅާނެކަމަށެވެ.

Advertisement

އީޕީއޭއިން މި މަސައްކަތް ފަށާފައިވާއިރު، މި ޕްލެޓްފޯމް ވިލިމާލެ ފަރަށް އެރުމުގެސަބަބުން އެ ސަރަހައްދަށް ވެއްޓުނު ދަގަނޑުތައް ނަގައި އެ ސަރަހައްދު އެއްކޮށް ސާފުކޮށްފައިވާ ކަމަށް، ބްރިޖުގެ މަސައްކަތް ކުރަމުންދާ އެފްކޮންސްއިން ވަނީ ބުނެފައެވެ.

އެ ކުންފުނިން ބުނީ އާދިއްތަ ދުވަހު އެ ސަރަހައްދު އެއްކޮށް ސާފުކޮށްފައިވާ ކަމަށާއި، އެ މަސައްކަތް ނުނިމި ލަސްވީ މޫސުން ގޯސްވުމުގެ ސަބަބުން ކަމަށެެވެ. އެ ކުންފުނިން ބުނީ މަސައްކަތް ފެށީ މިދިޔަ މަހު 28ގައި ކަމަށާއި އޭރުވެސް މޫސުން ގޯސްކަމަށެވެ. އެހެންނަމަވެސް ޕްލެޓްފޯމް ފަރަށް އެރި ސަރަހައްދު ސާފުކޮށް ނިންމާފައިވަނީ އެންމެ ރަނގަޅު ވަސީލަތްތައް ބޭނުންކޮށްގެން ކަމަށްވެސް އެ ކުންފުނިން ވަނީ ބުނެފައެވެ.

އެ މަޝްރޫއު ހިންގަމުންއަންނަ އިންޑިއާގެ އެފްކޮންސް ކުންފުނިން ކުރިން ބުނީ ޕްލެޓްފޯމް ފުންނުކުރެވި ލަސްވީ މޫސުން ގޯސްވުމުގެ ސަބަބުން ކަމަށެވެ. އަދި ޕްލެޓްފޯމް ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑުވުމުގެ ސަބަބުން ކަމަށާއި، އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށް ކަމަށްވެސް އެ ކުންފުނިން ބުނެފައިވެއެވެ.

އެ ޕްލެޓްފޯމް ފުންކޮށްފައިވަނީ އޮގަސްޓް މަހުގެ 28 ވަނަ ދުވަހު، އެ ޕްލެޓްފޯމް ފަރަށް އެރިތާ 12 ދުވަސް ފަހުންނެވެ.