ރެއާލަށް މި ސީޒަންގައި ވެސް ޗެމްޕިއަންސް ލީގު ކާމިޔާބުކުރެވޭނެ: އަންޗެލޮޓީ
6 ސެޕްޓެމްބަރު 2022 | އަންގާރަ 04:35އަންޗެލޮޓީ ބުނީ އެންމެ ފަހު ވަގުތާ ޖެހެންދެން ރެއާލުން މަސައްކަތް ކުރާނެ ކަމަށާއި، އުންމީދުކުރެވޭ ގޮތުގައި މި ސީޒަންގެ ފައިނަލްގައި ވެސް ކުޅެވޭނެ ކަމަށް
ރެއާލް މެޑްރިޑުގެ ކޯޗު އަންޗެލޮޓީ
މި ސީޒަންގައި ވެސް ރެއާލް މެޑްރިޑަށް ޔުއެފާ ޗެމްޕިއަންސް ލީގު ކާމިޔާބުކުރެވޭނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.
ނިމުނު ފުޓުބޯޅަ ސީޒަންގައި ރެއާލުން ވަނީ ޗެމްޕިއަންސް ލީގު ކާމިޔާބުކޮށްފައެވެ. އެއާއެކު އަންޗެލޮޓީ ވަނީ ތާރީޚުން ޖާގަ ހޯދާފައެވެ. އައު ސީޒަންގެ ޗެމްޕިއަންސް ލީގުގެ ފުރަތަމަ މެޗުގައި ރެއާލުން އަންގާރަ ދުވަހުގެ ރޭ ނުކުންނާނީ ސެލްޓިކާ ދެކޮޅަށެވެ.
މެޗުގެ ކުރިން އަންޗެލޮޓީ ބުނީ، މި ސީޒަންގެ ޗެމްޕިއަންްސް ލީގުގެ ފޭވަރިޓުންގެ ތެރޭގައި ރެއާލް ނުހިމެނުމަކީ އޭނާ ހައިރާންވާ ކަމެއް ނޫން ކަމަށެވެ. އޭނާ ބުނީ އެއީ ރަނގަޅު ނިޝާނެއް ކަމަށެވެ. މިދިޔަ ސީޒަންގައި ރެއާލުން ޗެމްޕިއަންސް ލީގު ކާމިޔާބުކުރީ ހައިރާންވާ ނަތީޖާތަކަކާއެކުއެވެ. އެކަމާ ގުޅޭ ގޮތުން ކޯޗު އަންޗެލޮޓީ ބުނީ ސްޓެޓިސްޓިކްސް އަށް ބަލާއިރު، މިދިޔަ ސީޒަންގައި ރެއާލަށް ޗެމްޕިއަންސް ލީގު ކާމިޔާބުކުރުމުގެ ފުރުސަތު އޮތީ ކުޑަކޮށް ކަމަށެވެ. އެއާ ޚިލާފަށް އޭނާ ބުނީ މި ސީޒަންގައި އޮތީ ވަރަށް ރަނގަޅު ޓީމެއް ކަަމަށެވެ.
މީގެ އިތުރުން އަންޗެލޮޓީ ބުނީ މިދިޔަ ސީޒަންގައި ކަންތައްވީ ގޮތަށް މި ސީޒަންގައި ވެސް ކަންތައް ވާނެ ކަމަށެވެ. އަންޗެލޮޓީ ބުނީ އެންމެ ފަހު ވަގުތާ ޖެހެންދެން ރެއާލުން މަސައްކަތް ކުރާނެ ކަމަށާއި، އުންމީދުކުރެވޭ ގޮތުގައި މި ސީޒަންގެ ފައިނަލްގައި ވެސް ކުޅެވޭނެ ކަމަށެވެ.
ރެއާލަކީ އެންމެ ގިނަ ފަހަރު ޗެމްޕިއަންސް ލީގު ކާމިޔާބުކޮށްފައިވާ ޓީމެވެ. އަންޗެލޮޓީ ޗެމްޕިއަންސް ލީގުގައި ރެއާލަކީ އިހްތިރާމް ލިބިގެންވާ ޓީމެއް ކަމަށެވެ. މީގެ އިތުރުން އޭނާ ބުނީ ރެއާލްގެ ތާރީޚުގެ އެއް ބަޔަކީ ޗެމްޕިއަސް ލީގުގެ ބައެއް ކަމަށެވެ.
ސެލްޓިކްގެ ދަނޑުގައި އެ ޓީމާ ދެކޮޅަށް ރެއާލް ނުކުންނާނީ ރާއްޖެ ގަޑިން މިރޭ 12 ޖަހާއިރުއެވެ.
