ހުރިހާ ކަމެއް އާލިން ހާލަންޑަށް ދޫކޮށްލައިގެން ތިބެފިނަމަ، ޔުއެފާ ޗެމްޕިއަންސް ލީގު ކާމިޔާބު ނުކުރެވޭނެ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.
އައު ސީޒަންގެ ޗެމްޕިއަންސް ލީގައި ސިޓީގެ ފުރަތަމަ ފުޓުބޯޅަ މެޗުގައި އެ ޓީމުން ނުކުންނާނީ ސްޕެއިންގެ ސެވިއްޔާއާ ދެކޮޅަށެވެ. ސެވިއްޔާގެ ދަނޑުގައި އެ ޓީމާ ދެކޮޅަށް ނުކުންނައިރު، މިއީ ހާލަންޑު ސިޓީއަށް ބަދަލުވި ފަހުން އެ ޓީމަށް ކުޅެދޭ ޗެމްޕިއަންސް ލީގުގެ ފުރަތަމަ މެޗެވެ.
ބްރޫޝިއާ ޑޯޓްމަންޑު ދޫކޮށް ސިޓީއަށް ބަދަލުވި ހާލަންޑު އަންނަނީ ޕްރިމިއަރ ލީގުގައި މޮޅު ކުޅުމެއް ދައްކަމުންނެވެ. ލީގުގައި މިހާތަނަށް ސިޓީން ވަނީ ހަ މެޗު ކުޅެފައެވެ. އެ މެޗުތަކުގައި ކުޅެ، މިހާތަނަށް ހާލަންޑު ވަނީ 10 ލަނޑު ޖަހާފައެވެ.
ޗެމްޕިއަންސް ލީގު މެޗުގެ ކުރިން ގާޑިއޯލާ ބުނީ ހުރިހާ ކަމެއް ހާލަންޑަށް ދޫކޮށްލުމަކީ ކުރެވޭނެ ކަމެއް ނޫން ކަމަށެވެ. އަދި ހާލަންޑަށް ބަރޯސާވެގެން ތިބެއްޖެނަމަ، ޗެމްޕިއަންސް ލީގު ކާމިޔާބު ނުކުރެވޭ ކަމަށެވެ. ގާޑިއޯލާ ބުނީ ހާލަންޑުގެ ވާހަކަ އެންމެން ވެސް ދައްކާ ކަމަށެވެ. ނަމަވެސް ސިޓީއަށް އަލަށް ގެނައި ފަސް ވަރަކަށް އައު ކުޅުންތެރިން ތިބިކަން ފާހަގަކޮށް އޭނާ ބުނީ، އެ ހުރިހާ ކުޅުންތެރިން ވެސް ސިޓީއަށް ހޭނިއްޖެކަމަށެވެ.
މީގެ އިތުުރުން ގާޑިއޯލާ ބުނީ ސިޓީ މޮޅުވަނީ ހަމައެކަނި ހާލަންޑުގެ ސަބަބުން ނޫން ކަމަށާއި، އަދި ބަލިވަނީ ވެސް ހަމައެކަނި ހާލަންޑުގެ ސަބަބުން ނޫން ކަމަށެވެ. ނަމަވެސް ގާޑިއޯލާ ބުނީ ހާލަންޑަކީ ތަފާތު ކޮލެޓީ ހުރި ހުނަރުވެރި، މައްްސަލަތައް ހައްލު ކުރަން ދަންނަ ކުޅުންތެރިޔެއް ކަމަށެވެ.
ސެވިއްޔާ އާއި ސިޓީ ބައްދަލުކުރާ މެޗު ފަށާނީ މިރޭ ރާއްޖެ ގަޑިން 12 ޖަހާއިރުއެވެ.
