ޕެންޝަން އޮފީހުގެ ސީއީއޯ މަގާމުން ވަކިކުރި މައްސަލައިގައި ދެލައްކަ ރުފިޔާ ދޭން ޖެހިއްޖެ
ޖޯން ގްރިންޑަލް އާއެކު ވެފައިވާ ވަޒީފާގެ އެއްބަސްވުން ބާތިލުކުރީ 12 އޮކްޓޯބަރު 2021 ގައި
ޕެންޝަން އޮފީހުގެ ކުރީގެ ސީއީއޯ ޖޯން ގްރިންޑަލް
ޕެންޝަން އޮފީހުގެ ސީއީއޯ މަގާމުން ވަކި ކުރި މައްސަލައިގައި ދެލައްކަ ރުފިޔާ ދޭން ޖެހިއްޖެއެވެ.
އެ އޮފީހުގެ ޗީފް އެގްޒެކެޓިވް އޮފިސަރުކަމުގައި ހުންނެވި ޖޯން ގްރިންޑަލް އާއެކު ވެފައިވާ ވަޒީފާގެ އެއްބަސްވުން ބާތިލުކުރީ 12 އޮކްޓޯބަރު 2021 ގައެވެ.
ޕެންޝަން އޮފީހުގެ ސީއީއޯގެ މަގާމަށް ޖޯން ގްރިންޑަލް އައްޔަންކުރީ 2020 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. ޖޯން އަކީ ޕެންޝަން ދާއިރާއިން 25 އަހަރުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. އަދި މީގެ ކުރިން އޭނަ ވަނީ މަލްޓާ ފައިނޭންޝިއަލް ސާވިސަސް އޮތޯރިޓީގެ އިންޓަރިމް ޗީފް އެކްޗުއަރީގެ މަގާމާއި، ލޮއިޑްސް ބޭންކިން ގްރޫޕުގެ ސީނިއަރ އެކްޗުއަރީގެ މަގާމު ފުރުއްވުމުގެ އިތުރުން، ކޮމްޕްރޭ ގްރޫޕް މަލްޓާގެ ސީއޯއޯގެ މަގާމު ވެސް ފުރުއްވާފައެވެ.
ޕެންޝަން އޮފީހުގެ ސީއީއޯ މަގާމުން އޭނާ ވަކިކޮށްފައިވަނީ ޕެންޝަނާބެހޭ ގާނޫނުގެ ދަށުން ޕެންޝަން އޮފީހުގެ ބޯޑަށް ލިބިދޭ ބާރުގެ ދަށުންނެވެ. އޭރު ޕެންޝަން އޮފީހުން ބުނީ އޭނާ ވަކިކުރީ ސުލޫކީ މިންގަނޑާ ހިލާފުވުމުން ކަމަށެެވެ.
އޭނާ މަގާމުން ވަކިކޮށްފައިވަނީ އޭނާއަށް ޖިންސީ ފުރައްސާރައިގެ ތުހުމަތުތަކެއް އަމާޒުވި ވަގުތެއްގައެވެ.
އެ މައްސަލައިގައި ވަޒީފާއާބެހޭ ޓްރައިބިއުނަލްއިން ނިންމީ ޖޯން މަގާމުން ވަކިކުރީ މައުޟޫއީ އަދުލުވެރިކަން ގާއިމްކޮށްފައި ކަމަށެވެ. ވުމާއެކު، އޭނާއަށް އެ ވަޒީފާ އަނބުރާ ރުޖޫއަ ކޮށްދޭން ޖެހޭ ހާލަތެއް ނެތްކަން ނިންމުމުގައި ބަޔާންކޮށްފައިވެއެވެ.
އެހެންނަމަވެސް އޭނާއަށް ބަދަލުދޭން ޖެހުނީ އޭނާ މަގާމުން ވަކިކުރުމުގައި ގާއިމްކުރަން ޖެހޭ ބައެއް އިޖުރާއަތްތައް ފުރިހަމަ ކޮށްފައިނުވާތީއެވެ. އެކަމުގެ ބަދަލެއްގެ ގޮތުން 215،880ރ ދެއްކުމަށް ވަނީ އަމުރުކޮށްފައެވެ. އެއީ އޭނާގެ އެއް މަހުގެ މުސާރައިގެ ގޮތުގައި ލިބެމުން ދިޔަ 14،000 އެމެރިކާ ޑޮލަރެވެ.
ވަޒީފާއާބެހޭ ޓްރައިބިއުނަލްއިން އެގޮތަށް ނިންމާފައިވަނީ ސެޕްޓެމްބަރު މަހުގެ 1 ވަނަ ދުވަހުއެވެ.
