މިހާރު ކުރިއަށްދާ އޭޝިއަން ނެޓުބޯޅަ ޗެމްޕިއަންޝިޕްގެ ފުރަތަމަ މެޗުން ރާއްޖެ ބަލިވެއްޖެއެވެ.

ފުރަތަމަ މެޗުގައި ރާއްޖެ ވާދަކޮށްފައިވަނީ ވަރުގަދަ ސިންގަޕޫރާއެވެ. ސިންގަޕޫރު އަތުން ރާއްޖެ ބަލިވެފައިވަނީ 96-10 އިންނެވެ. މި ގްރޫޕްގައި ރާއްޖެއާއި ސިންގަޕޫރުގެ އިތުރުން ދެން ހިމެނެނީ ޖަޕާންއެވެ.

ރާއްޖެއާ ދެކޮޅަށް ކުޅުނު މެޗުގައި ވަރުގަދަ ސިންގަޕޫރުން ވަނީ މޮޅު ކުޅުމެއް ދައްކާފައެވެ. މެޗުގެ ފުރަތަމަ ދެ ކުއާޓާ ނިންމާލި އިރު ވެސް ސިންގަޕޫރު އޮތީ ބޮޑު ތަފާތަކުން ކުރީގައެވެ. އެއީ 47-7 އިންނެވެ. މެޗުގައި ރާއްޖޭގެ މަރިޔަމް ރަނާގެ ފަޔަށް ލިބުނު އަނިޔާއެއްގެ ސަބަބުން އޭނާގެ ބަދަލުގައި ވިޝާހު މުޙައްމަދު ވަނީ ކުޅެން އަރުވާފައެވެ.

ޖުމުލަ 11 ޤައުމަކުން ވާދަކުރާ މި މުބާރާތް ކުރިއަށް ދާނީ ސެޕްޓެމްބަރު މަހުގެ 11 އާ ހަމައަށެވެ. މުބާރާތުގައި ވާދަކުރާ ޤައުމުތަކަކީ، ރާއްޖެ، ސްރީ ލަންކާ، އިންޑިއާ، ސިންގަޕޫރް، މެލޭޝިއާ، ފިލިޕީންސް، ޖަޕާން، ޗައިނީސް ތައިޕޭ، ބުރުނާއި، ހޮންކޮން އަދި ތައިލެންޑެވެ.

ރާއްޖޭގެ ދެ ވަނަ މެޗުގައި ނިކުންނާނީ ޖަޕާނާ ދެކޮޅަށެވެ.