ހެޔޮލަފާ ޖީލެއް ބިނާ ކުރެވެން އޮތީ މުޅި މުޖުތަމައުވެސް ޒިންމާ އަދާކޮށްގެންކަމަށް ނައިބްރައީސް ފައިސަލް ނަސީމް ވިދާޅުވެއްޖެއެވެ.
ހުޅުމާލޭ ފޭސް 2ގެ ފުރަތަމަ ސްކޫލުކަމަށްވާ ކާމިލް ދީދީ ޕްރައިމަރީ ސްކޫލު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ނައިބް ރައީސް ވިދާޅުވީ، ސްކޫލެއްގެ ފެށުމަކީ ނުހަނު އުފާވެރި ކަމެއް ކަމަށެވެ.
އައު ސުކޫލެއް ފަށާއިރު ގިނަ އުއްމީދުތަކެއް ހުންނާނެކަން ފާހަގަ ކުރައްވައި ނައިބްރައީސް ވަނީ ދަރިވަރުންނަށްވެސް ބައެއް ނަސޭޙަތްތައް ދެއްވާފައެވެ. އެގޮތުން މައިންބަފައިންގެ ބަސް ޤަބޫލު ކުރުމާއި، އެއް ދަރިވަރަކު އަނެއް ދަރިވަރަކަށް އެހީތެރިކަން ފޯރުކޮށްދިނުމަށް ނައިބްރައީސް ވަނީ ހަނދާން ކޮށްދެއްވާފައެވެ.
އޭގެ އިތުރުން، ފޮތްތެރިކަމާއި، ފޮތް ކިޔުމުގެ މުހިއްމުކަމުގެ މައްޗަށްވެސް ނައިބްރައީސްގެ ވާހަކަފުޅުގައި އަލިއަޅުވާލެއްވިއެވެ. ސްކޫލުގެ ނަން އެބޭފުޅަކާއި ގުޅިފައިވާ އަހުމަދު ކާމިލް ދީދީ (ހެންވޭރުގޭ އަހުމަދު ދީދީ) އަކީ ދިވެހި ބަހުން ތަފާތު ފޮތްތައް ލިޔުއްވި އަދީބެކެވެ.
ނައިބް ރައީސް ވަނީ ހެޔޮލަފާ ޖީލެއް ބިނާ ކުރުމަށް ޓީޗަރުންނަށްވެސް އިލްތިމާސް ކުރައްވާފައެވެ. އެކަންކަން ޙާސިލު ކުރެވެން އޮތީ މުޅި މުޖުތަމައުވެސް ޒިންމާ އަދާކޮށްގެންކަން ފާހަގަ ކުރައްވައި ނައިބްރައީސް ވިދާޅުވީ، ރިވެތި އަޙްލާޤަށްވުރެ މުހިއްމު ކަމެއް ނޯންނާނެ ކަމަށެވެ.
ސަރުކާރުން އެންމެ ބޮޑު އަހައްމިއްޔަތުކަމެއް ދެނީވެސް ތައުލީމީ ދާއިރާ ފުޅާކުރުމަށްކަމަށް ނައިބްރައީސް ވިދާޅުވިއެވެ. ހުޅުމާލޭ ފޭސް 2 ގައި މި ހުޅުވުނު ސުކޫލުގެ ސަބަބުން އެތައް ދަރިވަރުންނާއި ބެލެނިވެރިންނަށްވެސް އެކަމުގެ ލުއިފަސޭހަކަން ލިބިގެންދާކަމަށްވެސް އެމަނިކުފާނު ވިދާޅުވިއެވެ.
ނައިބް ރައީސް ވަނީ މި ސުކޫލު ހުޅުވުމުގައި އެކި ފަރާތްތަކުން ވެދީފައިވާ އެހީ ފާހަގަ ކުރައްވައި އެ ފަރާތްތަކަށް ޝުކުރު އަދާ ކުރައްވާފައެވެ.
