މި ސްކޫލާއެކު ދެވަނަ ފިޔަވަހީގައި ދިރިއުޅޭ އާއިލާތަކަށް ބޮޑެތި ފަސޭހަތަކެއް ވާނެ: އެޑިއުކޭޝަން މިނިސްޓަރު
މިއިންދެނީ އެތައް ޒަމާނަކަށް އޭގެ މޭވާ ރައްޔިތުން ބިންނާނޭ މޭވާގަހެއް
ކާމިލް ދީދީ ޕްރައިމަރީ ސްކޫލް ހުޅުވުމުގެ ރަސްމިއްޔާތު
ހުޅުމާލޭ ދެވަނަ ފިޔަވަހީގައި ގާއިމްކޮށްފައިވާ ކާމިލް ދީދީ ޕްރައިމަރީ ސްކޫލް ރަސްމީކޮށް ހުޅުވިގެންދިއުމާއެކު ދެވަނަ ފިޔަވަހީގައި ދިރިއުޅޭ އާއިލާތަކަށް ވަރަށް ބޮޑު ފަސޭހަތަކެއް ވެގެންދާނެކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
824 ދަރިވަރުންނާއެކު ކާމިލް ދީދީ ޕްރައިމަރީ ސްކޫލްގެ ކިޔެވުން އާދިއްތަ ދުވަހު ވަނީ ފަށާފައެވެ. މި ސްކޫލް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޑރ. އައިޝަތު އަލީ ވިދާޅުވީ މާދުރުގައި ހުރި ސްކޫލަކަށް ދަރިފުޅު ގެންދިއުމުގެ ބަދަލުގައި ހިނގާލާފައި މަދު މިނެޓުކޮޅަކުން ދަރިފުޅު މިހާރު ސްކޫލަށް ލެވޭނެ ކަމަށެވެ. ދަރިފުޅު ބަހަށް ލާފައި އެކަނި ފޮނުވާލަން ފަސްޖެހޭ ބެލެނިވެރިންނަށް ގޭ ބެލްކަނީގައި ހުރެ ދަރިފުޅު ސްކޫލަށް ވަންނަ މަންޒަރު ބަލާލެވޭނެ ކަމަށް މިނިސްޓަރު ވިދާޅުވިއެވެ.
އަދި ކާމިލް ދީދީ ފްރައިމަރީ ސްކޫލާ އިންވެގެން ހުރި ޕްރީ ސްކޫލްވެސް މިއަހަރު ތެރޭގައި ހުޅުވިގެންދާނެ ކަމަށް މިނިސްޓަރު ވިދާޅުވިއެވެ. އަދި މި ދިރާސީ އަހަރުގެ ދެވަނަ ޓާމުގައި ހުޅުމާލޭގެ ދެވަނަ ފިޔަވަހީގައި ދިރިއުޅޭ ދަރިވަރުންނަށް ޚާއްސަކުރެވިގެން ހުޅުވޭ ސަލާހުއްދީން ސްކޫލުގައި ވެސް ކިޔެވުން ފެށޭނެކަމަށް މިނިސްޓަރު ވިދާޅުވިއެވެ. އެ ސްކޫލަކީ އެލްކޭޖީން ފެށިގެން ގްރޭޑް 10އަކާއި ހަމައަށް ކިޔަވައިދެވޭނެ ސްކޫލެކެވެ. އެ ސްކޫލު ހުޅުވުމުން އެ ސަރަހައްދުގައި ދިރިއުޅޭ ބެލެނިވެރިންނަށް އިތުރު ލުޔެއް ލިބިގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ސްކޫލެއް ހުޅުވޭ މުނާސަބާއަކީ ޚާއްސަ މުނާސަބާއެއް ކަމަށެވެ. ސްކޫލަކުން ކިޔަވާ، އެތަނަށް ދަރިވަރުވާ ކުދީންގެ ޢަދަދު އެތައް ހާހަކުން ގުނޭނެ ކަމަށާއި، އެކުދިންގެ ތެރޭގައި ޤައުމަށް ބޮޑެތި ޚިދްމަތްތައް ކޮށްދޭނޭ، ޒަމާންތަކަށް އެކުދީންގެ ނަން ވިދާނޭ ދަރިވަރުން ވެސް ހިމެނޭނެ ކަމަށެވެ. އެހެންކަމުން، މިކުރެވެނީ ތާރީޚީ ޚާއްސަކަމެއް ކަމަށާއި، މިއިންދެނީ އެތައް ޒަމާނަކަށް އޭގެ މޭވާ ރައްޔިތުން ބިންނާނޭ މޭވާގަހެއް ކަމުގައި މިނިސްޓަރު ވިދާޅުވިއެވެ.
މީގެ އިތުރުން ކާމިލް ދީދީ ޕްރައިމަރީ ސްކޫލް ނިސްބަތްވަނީ އަލްއުސްތާޛް އަޙްމަދު ކާމިލްދީދީއަށް ފާހަގަކުރައްވައި މިނިސްޓަރު ވިދާޅުވީ އެމަނިކުފާނަކީ ދިވެހި ބަހުން ތަފާތު ފޮތްތައް ލިޔުއްވާފައިވާ އަދީބެއް ކަމަށެވެ. ރައްޔިތުންގެ މަޖިލީހުގައި ރައްޔިތުންގެ ބަސް އިއްވެވި މޮޅު ބަސް މޮށުންތެރިއެއް ކަމަށާއި، އެ މަނިކުފާނުގެ ހޮބީއަކީ މި ސްކޫލުގެ މޮޓޯކަމުގައިވާ ފޮތް ބެލުމާއި ފޮތް ކިޔުމާއި ލިޔުއްވުން ކަމުގައި މިނިސްޓަރު ވިދާޅުވިއެވެ. އަދި އެދިވަޑައިގަންނަވަނީ އެ ސްކޫލުގެ ނަން އެބޭފުޅަކަށް ނިސްބަތްވާ އަލްއުސްތާޛް ކާމިލްދީދީ ފަދައިން ސްކޫލުގެ ދަރިވަރުންނަކީ ފޮތާ ދޯޅު، ގިނަގިނައިން ފޮތް ކިޔާ، މުޖުތަމަޢުގައި ހޭލުންތެރިކަން ފަތުރާ ދަރިވަރުންތަކަކަށްވުން ކަމުގައި މިނިސްޓަރު ވިދާޅުވިއެވެ.
