ހުޅުމާލޭ ދެވަނަ ފިޔަވަހީގައި ގާއިމްކޮށްފައިވާ ފުރަތަމަ ސްކޫލް، ކާމިލް ދީދީ ޕްރައިމަރީ ސްކޫލް ރަސްމީކޮށް ހުޅުވައިފިއެވެ.

މި ސްކޫލް ހުޅުއްވައިދެއްވީ މިކަމަށްޓަކާ އާދިއްތަ ދުވަހުގެ ހެނދުނު ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާގެ ނާއިބު ފައިސަލް ނަސީމްއެވެ. މި ސްކޫލް ހުޅުވުމުގެ ރަސްމިއްޔާތުގައި ނާއިބުރައީސްގެ އިތުރުން އެޑިއުކޭޝަން މިނިސްޓްރީގެ އިސް ބޭބޭފުޅުންނާއި، ސަރުކާރުގެ ބައެއ އިދާރާތަކުގެ ބޭބޭފުޅުން ބައިވެރިވެވަޑައިގެންނެވިއެވެ.

824 ދަރިވަރުންނާއެކު ސްކޫލްގެ ކިޔެވުން ފަށާފައިވާއިރު، މި ސްކޫލްގައި ކިޔަވައިދެނީ އެލްކޭޖީން ފެށިގެން ގްރޭޑް 6 އާ ހަމައަށެވެ. މި ސްކޫލްފައި ފައުންޑޭޝަން ކްލާސްތަކަށް ކިޔަވައިދެނީ 4 ދަންފަޅިއަކަށް ބަހާލައިގެންނެވެ. ގްރޭޑް 1 ން 6 އަކަށް ކިޔަވައިދެނީ 2 ދަންފަޅިއަކަށެވެ.

ކާމިލް ދީދީ ޕްރައިމަރީ ސްކޫލް ނިސްބަތްވަނީ ދިވެހިރާއްޖޭގައި އެކުލަވާލެވުނު ފުރަތަމަ ޤާނޫނު އަސާސީގެ ދަށުން އައްޔަންކުރެވުނު ފުރަތަމަ ވަޒީރުލް މަޢާރިފް އަލްއުސްތާޛް އަޙްމަދު ކާމިލްދީދީއަށެވެ. ސްކޫލްގެ މޮޓޯއަކި ކާމިލް ދީދީ އެންމެ ޝައުގުވެރިކަމާއެކު ކުރައްވާ ކަންތައް ކަމުގައިވާ ފޮތް ބެލުމާއި، ފޮތް ކިޔުމާއި، ލިޔުއްވުމެވެ.

މި ސްކޫލް ހުޅުވުމުގެ ރަސްމިއްޔާތުގައި ވާހަކަދައްކަވަމުން ސްކޫލްގެ ޕްރިންސިޕަލް ފާތލިމަތު ލީނާ ވިދާޅުވީ ދެވަނަ ފިޔަވަހީގައި ދިރިއުޅޭ ކުދިންނަށް ޚާއްސަ ސްކޫލެއް ގާއިމްކުރެވިގެންދިއުމަކީ އަދުގެ ސަރުކާރުން ތައުލީމީ ދާއިރާއަށް ދެއްވާ އަހައްމިއްޔަތުކަން ހާމަވެގެންދާ ކަމެއް ކަމަށެވެ. އަދި މިފަދަ ސްކޫލެއް ދެވަނަ ފިޔަވަހީގައި ގާއިމްކޮށްދެއްވި ކަމަށްޓަކާ ޕްރިންސިޕަލް ވަނީ ސަރުކާރަށް ޝުކުރު އަދާކުރައްވާފައެވެ.