ފުލްހަމް ބަލިކޮށް ޓޮޓެންހަމުން ތިންވަނައަށް

އިނގިރޭސި ޕްރިމިއަރ ލީގުގައި ފުލްހަމް ބަލިކޮށް ޓޮޓެންހަމުން ތާވަލްގެ ތިން ވަނަ މަގާމަށް ޖެހިލައިފިއެވެ.

ޓޮޓެންހަމްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 2-1 އިންނެވެ. މެޗުގައި ޓޮޓެންހަމްގެ ފުރަތަމަ ލަނޑު 40 ވަނަ މިނެޓުގައި ޖެހީ ޕިއޭ އެމީލް ހޮއިބިއާއެވެ. އޭނާ މި ލަނޑު ޖެހީ ރިޗާލިސަން ތަނަވަސްކޮށްދިން ފުރުސަތެއްގައެވެ. ޓޮޓެންހަމްގެ ދެ ވަނަ ލަނޑު މެޗުގެ 75 ވަނަ މިނެޓުގައި ޖެހީ ހެރީ ކޭންއެވެ. ކޭން އަންނަނީ ޓޮޓެންހަމާއެކު މި ސީޒަންގައި މޮޅު ކުޅުމެއް ދައްކަމުންނެވެ.

ޓޮޓެންހަމުން މޮޅަށް ކުޅުނު މެޗުގައި އެ ޓީމުން ވަނީ އިތުރު ލަނޑެއް ވެސް ޖަހާފައެވެ. މެޗުގެ 90 ވަނަ މިނެޓުގައި ރިޗާލިސަން ލަނޑެއް ޖެހި ނަމަވެސް، ވީއޭއާރުން ނިންމީ އެ ލަނޑު ބަލައި ނުގަތުމަށެވެ.

ލީގުގައި މިހާތަނަށް ކުޅުނު ހަ މެޗުން 14 ޕޮއިންޓު ހޯދައިގެން ޓޮޓެންހަމް އޮތީ ތިން ވަނަ މަގާމުގައެވެ. ދެ ވަނަ މަގާމުގައި އޮތް އެންމެ ފަހުގެ ޗެމްޕިއަން މެންޗެސްޓަރ ސިޓީއަށް ވެސް ލިބެނީ 14 ޕޮއިންޓެވެ. ސިޓީއަށް ކުރި ލިބެނީ ފައިދާ ގޯލުންނެވެ. އެއް ވަނަ މަގާމުގައި އޮތީ މިހާތަނަށް ކުޅުނު ހުރިހާ މެޗަކުން މޮޅުވި އާސެނަލްއެވެ. އެއީ ފަސް މެޗުން 15 ޕޮއިންޓާއެކުއެވެ.