ޑިޓެންޝަން ސެންޓަރުގެ ސީލިން ފަޅާލައިގެން މިތުން ފިލީ ފާޚާނައަށް ވަނުމަށްފަހު
ފިލާފައިވަނީ ބަންގްލަދޭޝްއަށް ނިސްބަތްވާ އުމުރުން 26 އަހަރުގެ މުޙައްމަދު މިތުން
މުހައްމަދު މިތުން
ވެލާނާ އިންޓަނޭޝަނަލް އެއާޕޯޓުގެ ޑިޓެންޝަން ސެންޓަރުގެ ސީލިން ފަޅާލައިގެން ފިލި ބިދޭސީ މީހާ ހޯދަން އިމިގްރޭޝަނުން އިއުލާނުކޮށްފިއެވެ.
ސެޕްޓެމްބަރު ދެވަނަ ދުވަހު ފިލާފައިވަނީ ބަންގްލަދޭޝްއަށް ނިސްބަތްވާ އުމުރުން 26 އަހަރުގެ މުޙައްމަދު މިތުން ނަމަކަށް ކިޔާ މީހެކެވެ.
ރާއްޖެއެމްވީއަށް އެނިގައިވާ ގޮތުގައި ވެލާނާ އިންޓަނޭޝަނަލް އެއާޕޯޓުގައި ޑިޓެންޝަން ސެންޓަރ ހުންނަނީ ތިން ވަނަ ފަންގިފިލާގައެވެ.
ޑިޓެންޝަން ސެންޓަރ އަކީ ފަސްރޫމުގެ ޖަލެއް ކަހަލަ ތަނަކަށްވާއިރު ސެކިއުރިޓީ މީހާ އިންނަނީ ވަކިން ބޭރުގައި ހުންނަ ކުޑަ ގޮޅިއެއްގައެވެ.
މިތުން ދަންވަރު 01:30 ގައި ފާޚާނައަށް ވަތް ގޮތަށް 6 ޖެހިއިރު ނުނިކުމެގެން ސެކިއުރިޓީ ގާޑް އެހެން މީހަކާއެކު ގޮސް ދޮރު ވައްޓާލީއެވެ. އޭރު ސީލިން ފަޅާލައިގެން އެމީހާ ފިލައިފިއެވެ. އެއަރޕޯޓުގެ ބައެއް ތަންތަނުގައި ޖިޕްސަން ބޯޑު ނެގޭނެ ގޮތަށް ހުންނައިރު އެމީހާ ބަލަމުން ބަލަމުން ގޮސް، އެންމެ ފުރަތަމަ ޖެހުނު ބޯޑު ނެގިއެވެ. އެގޮތަށް ގޮސް ލިފްޓާ ދިމާލައަށް އިން ބޯޑު ނެގުނެވެ.
އެއަށްފަހު އެތަނުން ފުންމާލައިގެން ނިކުމެގެން ގޮސް ސެކިއުރިޓީ މީހާ ކައިރީގައި ބޮލުގައި ރިއްސާކަމަށް ބުންޏެވެ. އަދިފެންފުޅިއަކާއި ޕެނެޑޯލް ގުޅައެއް ދޭން ވެސް މިތުން ބުންޏެވެ.
މިހާރު އެއަރޕޯޓްގައި އެކި މަސައްކަތްތައް ކުރިއަށްދާތީ ވަރަށް ގިނަ އަދަދެއްގެ ބިދޭސީން ރޭގަނޑު ގަޑީގައި މަސައްކަތް ކުރުމަށް އުޅެއެވެ. އެ ބިދޭސީ މީހާ ގައިގައި ޕުޓީ ފަދަ ތަކެތި ހޭކިފައި ހުރުމުން އޭނައާއި މެދު ސެކިއުރިޓީ މީހާ ޝައްކުވެސް ނުކުރެއެވެ.
ފާސް ނެތް މީހަކު ސެކިއުރިޓީ މީހާގެ އިހުމާލުން ދޫވެފައިވާކަން ރާއްޖެއެމްވީއަށް ވަނީ އެނގިފައެވެ.
އިމިގްރޭޝަންގެ އިތުރުން ފުލުހުން ވެސް ދަނީ މި މީހާ ހޯދަމުންނެވެ.
