އެއާޕޯޓުން ހައްޔަރުކުރި ދެ މީހުންގެ ބަންދަށް 10 ދުވަސް
ލަގޭޖުގައި އޮތް ގަމީހެއްގައި ބަޓަން ކެމެރާއެއް އިންކަން އެނގުމާ ގުޅިގެން އެލަގޭޖާ ގުޅުންހުރި ދެ ބިދޭސީން ހައްޔަރުކޮށްފައިވޭ
ވެލާނާ އިންޓަނޭޝިނަލް އެއާޕޯޓް ފޮޓޯ : ޔޫސުފް ސޮފްވާން
އެއާޕޯޓުން އާދިއްތަ ދުވަހު ހައްޔަރުކުރި ދެ ބިދޭސީންގެ ބަންދަށް 10 ދުވަސް ކްރިމިނަލް ކޯޓުން ޖަހައިފިއެވެ.
މިމައްސަލައާއި ގުޅޭގޮތުން ދިވެހި ފުލުހުންގެ ޚިދުމަތުން ބުނީ އެއާޕޯޓުގައި ވެރިއަކުނެތި ދޫކޮށްލާފައިވާ ލަގޭޖެއް ހުރިކަމުގެ މައުލޫމާތު ލިބިގެން އޮގަސްޓް 28 ވީ އާދިއްތަ ދުވަހު ފުލުހުން ހަރަކާތްތެރި ވެފައިވާކަމަށެވެ. އަދި ލަގޭޖުގައި އޮތް ގަމީހެއްގައި ބަޓަން ކެމެރާއެއް އިންކަން އެނގުމާއި ގުޅިގެން ލަގޭޖު ބެހެއްޓި ފަރާތަކީ ކާކުކަން ބެލުމަށްފަހު އިތުރަށް ބައެއް ކަންކަން ސާފުކުރުމަށް އެލަގޭޖް އާއި ގުޅުންހުރި ދެ ބިދޭސީން ހައްޔަރުކުރިކަމަށެވެ.
މިމައްސަލައިގައި އާދިއްތަ ދުވަހު ފުލުހުން ބުނީ އެދެމީހުންނާ ސުވާލުކުރުމަށް ފުލުހުންގެ އިދާރާއަށް ހާޒިރުކުރިކަމަށެވެ.
މިމައްސަލަ ފުލުހުން އަންނަނީ ތަހުގީގުކުރަމުންނެވެ.
