ފާއިތުވި ހަފުތާގައި ރާއްޖޭގައި ކޮވިޑް-19 ޖެހުނީ 68 މީހުންނަށް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތަކަށް ބަލާއިރު، އޮގަސްޓް 21ން އޮގަސްޓް 27ށް މާލެ ސަރަހައްދުން 15 މީހުން ކޮވިޑް-19ށް ޕޮޒިޓިވްވެފައިވާއިރު އަތޮޅުތަކުން ޕޮޒިޓިވްވީ 16 މީހުންނެވެ. އެހެން ހިސާބުތަކުން 37 މީހުން ޕޮޒިޓިވްވެފައިވެއެވެ. ފާއިތުވި ހަފުތާގައި 8 މީހުން ހޮސްޕިޓަލުގައި އެޑްމިޓްކޮށްގެން ފަރުވާދީފައިވެއެވެ. މީގެއިތުރުން ފާއިތުވި ހަފުތާގައި އެކަކު މިބަލީގައި ނިޔާވެފައިވެއެވެ.

އޭގެކުރީ ހަފުތާގައި ކޮވިޑް-19 ޖެހުނީ 99 މީހުންނަށެވެ. އަދި އޭގެކުރީ ހަފުތާގެ ތަފާސްހިސާބުތަކަށް ބަލާއިރު އެހަފުތާގައި ކޮވިޑް-19 ޖެހުނީ 98 މީހުންނަށެވެ. ޖުލައި ފަހު ހަފުތާގައި މިއަދަދު ހުރީ 106ގައެވެ.

މިހާތަނަށް ރާއްޖެއިން 184،856 މީހުންނަށް ކޮވިޑް-19 ޖެހިފައިވެއެވެ. އަދި 308 މީހަކު ވަނީ މިބަލީގައި ނިޔާވެފައެވެ.