ހެރީ ކޭން ކާމިޔާބުކޮށްދިން ދެ ލަނޑާއެކު ޓޮޓެންހަމުން ނޮޓިންހަމް ފޮރެސްޓް ބަލިކޮށްފިއެވެ.
ޕްރިމިއަރ ލީގުގައި އާދިއްތަ ދުވަހުގެ ރޭ ނޮޓިންހަމްގެ ދަނޑުގައި ކުޅުނު ފުޓުބޯޅަ މެޗު ޓޮޓެންހަމުން ކާމިޔާބުކުރީ 2-0 އިންނެވެ. މެޗުގައިި ދެ ލަނޑު ޖެހި ކޭން ވަނީ ޕްރިމިއަރ ލީގުގެ ތާރީޚުގައި ވެސް އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ތިން ވަނަ އަށް ޖެހިލާފައެވެ. ތިން ވަނައިގައި އޮތް އެންޑްރޫ ކޯލް ވަނީ 187 ލަނޑު ޖަހާފައެވެ. ނޮޓިންހަމް ކޮޅަށް ޖެހި ދެ ލަނޑާއެކު ކޭންގެ ގޯލް އަދަދު ވެސް ވަނީ 187 އަށް އަރާފައެވެ.
މެޗުގައި ކޭން އޭނާގެ ފުރަތަމަ ލަނޑު ޖެހީ މެޗު ފަށައިގެން ފަސް ވަނަ މިނެޓުގައެވެ. ދެ ވަނަ ހާފުގައި ޓޮޓެންހަމަށް ލިބުނު ޕެނަލްޓީއެއް 56 ވަނަ މިނެޓުގައި ކޭން ފޮނުވާލި ނަމަވެސް، ކާމިޔާބުވާ ގޮތެއް ނުވިއެވެ. ކޭން އޭނާގެ ދެ ވަނަ ލަނޑު ޖެހީ މެޗުގެ 81 ވަނަ މިނެޓުގައެވެ.
ލީގުގައި މިހާތަނަށް ކުޅުނު ހަތަރު މެޗުން 10 ޕޮއިންޓް ހޯދައިގެން ޓޮޓެންހަމް އޮތީ ލީގު ތާވަލްގެ ތިން ވަނަ މަގާމުގައެވެ. މެޗުން ބަލިވި ނޮޓިންހަމް އޮތީ 14 ވަނަ މަގާމުގައެވެ.
ލީގުގައި އާދިއްތަ ދުވަހުގެ ރޭ ކުޅުނު އެހެން މެޗުތަކަށް ބަލާއިރު، ވެސްޓް ހޭމް އިން ވަނީ 1-0 އިން އެސްޓަން ވިލާ ބަލިކޮށްފައެވެ. ވުލްވްސް އާއި ނިއުކާސަލް ޔުނައިޓެޑް ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.
