މާލީ ނިޒާމް ވަރުގަދަކުރަން މިދިޔަ 3 އަހަރާއި ބައިގެ ތެރޭގައި ގިނަ މަސައްކަތްތަކެއް ކުރެވިއްޖެ: އަމީރު
2009 ވަނަ އަހަރުން 2020 އަހަރާއި ހަމައަށް ދައުލަތުން ގެއްލިގެން ހޯދަންޖެހޭ 1.9 ބިލިޔަން ރުފިޔާ ނުލިބި އެބަހުރި
ފިނޭންސް މިނިސްޓަރު އަމީރު
މާލީ ނިޒާމް ވަރުގަދަކުރަން މިދިޔަ 3 އަހަރާއި ބައިގެ ތެރޭގައި ގިނަ މަސައްކަތްތަކެއް ކުރެވިފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ދައުލަތުން ގެއްލިފައިވާ ފައިސާ ހޯދުމާއި މެދު މަޝްވަރާކުރުމަށް ބާއްވާ މަސައްކަތު ބައްދަލުވުން ފެށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން އަމީރު ވަނީ ދައުލަތުގެ މާލީ ކަންކަން ބެލެހެއްޓުމާއި، ދައުލަތުގެ ފައިސާ އާއި މުދާ ނަހަމަ ގޮތުގައި ބޭނުންކުރުން މަދުކުރަން މަސައްކަތް ކުރުމަށް ސަރުކާރުން އިސްކަން ދޭ ކަމަށެވެ. އެގޮތުން މާލީ ކަންކަން ހަރުދަނާ ކުރުމަށް ޤާނޫނަށް ބަދަލުތައް ގެނެސްފައިވާ ކަމަށާއި ކުރިއަށް އޮތްތަނުގައި ވެސް އެފަދަ އިތުރު ބަދަލުތައް ގެނައުމަށް ހަމަޖެހިފައިވާ ކަމަށް އަމީރު ވިދާޅުވިއެވެ. ފާއިތުވި އަހަރުތަކުގައި ދައުލަތުން ގެއްލިފައިވާ ފައިސާތައް އަނބުރާ ދައުލަތަށް ހޯދުމަށް، ކުށްކޮށްގެން ހޯދާ ފައިސާ ދައުލަތަށް ނެގޭނެ ނިޒާމެއް އެކުލަވާލުން މުހިންމު ކަމަށް އަމީރު ވިދާޅުވިއެވެ.
އެގޮތުން 2009 ވަނަ އަހަރުން 2020 އަހަރާއި ހަމައަށް ދައުލަތުން ގެއްލިގެން ހޯދަންޖެހޭ 1.9 ބިލިޔަން ރުފިޔާ އަދާއި ހަމައަށް ވެސް ލިބިފައި ނުވާކަން އަމީރު ފާހަގަކުރެއްވިއެވެ.
ކޮރަޕްޝަނަށް ހުޅުވިފައިވާ ދޮރުތައް ބަންދު ކުރުމަކީ ސަރުކާރުގެ އެންމެ ބޮޑު އެއް ސިޔާސަތުކަން ފާހަގަކުރައްވާ އަމީރު ވަނީ އެ އަމާޒު ހާސިލް ކުރަން ކުރި މަސައްކަތުގެ ނަތީޖާ ރަނގަޅުކަމަށް ވިދާޅުވެފައެވެ. ރާއްޖޭގައި ކޮރަޕްޝަންގެ ނިސްބަތް މަދުވެފައިވާ ކަމުގެ ހެކިތައް މިހާރުވެސް ފެންނަން ހުރި ކަމަށް މިނިސްޓަރު އަމީރު ދާޅުވިއެވެ. އެގޮތުން 2018 ވަނަ އަހަރު ސީޕީއައިގައި ރާއްޖެ 124 ވަނާގައި އޮތްނަމަވެސް 2021 ވަނަ އަހަރުގެ ރޭންކިންގައި ބޮޑުތަނުން ކުރިއަށްޖެހި 85 ވަނައަށް އަރާފައިވާ ކަމަށް މިނިސްޓަރު ވިދާޅުވިއެވެ.
