މޫސުން ގޯސްވުމުގެ ސަބަބުން ޕްލެޓްފޯމް ނުނެގުނު

ތިލަމާލެ ބްރިޖްގެ މަސައްކަތްކުރަމުން އަންނަނިކޮށް މީގެ ހަފުތާއެއް ހާދުވަސް ކުރިން ވިލިމާލޭ ފަރަށް ބީހުނު ޕްލެޓްފޯމް ކުރިއަށް އޮތް ދެ ދުވަހުގެ ތެރޭގައި އެތަނުން ނަގާނެކަމަށް މަޝްރޫއު ހިންގަމުންއަންނަ އިންޑިއާގެ އެފްކޮންސް ކުންފުނިން ބުނި ނަމަވެސް މޫސުން ގޯސްވުމާއި ގުޅިގެން އެ މަސައްކަތް ކުރެވޭ ގޮތެއް ނުވިއެވެ.

އެފްކޮންސް އިން ބުނީ ދެ ދުވަސް ތެރޭ ޕްލެޓްފޯމް ނުނެގުނީ މޫސުން ގޯސްވުމުގެ ސަބަބުން ކަމަށެވެ. އަދި މޫސުން ރަނގަޅުވިހާ އަވަހަކަށް ޕްލެޓްފޯމް ނަގާނެކަމަށް އެ ކުންފުނިން ބުންޏެވެ. މި ޕްލެޓްފޯމް ނެގުން ލަސްވެ ފަރަށް ގެއްލުންވަމުންދާތީ ގިނަ ބައެއްގެ ފާޑުކިޔުން، ސަރުކާރަށާއި މި މަޝްރޫއު ހިންގަމުން އަންނަ ކުންފުންޏަށް ވަނީ ކުރިމަތިވެފައެވެ. އަދި ޕްލެޓްފޯމް ނެގުމުގެ މަސައްކަތް ނުކުރާކަމަށްވެސް އަންނަނީ ބުނަމުންނެވެ.

Advertisement

ކުންފުނިން އިތުރަށް ބުނެފައިވަނީ، ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެފައިވާ "ސެލްފް އެލެވޭޓިން ޕްލެޓްފޯމް" (އެސްއީޕީ) ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑު ވުމުގެ ސަބަބުން ކަމަށެވެ. ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށްކަމަށް އެ ކުންފުނިން ބުނެފައިވެއެވެ.

ޕްލެޓްފޯމް ނެގުމަށް ކުރަމުންދާ މަސައްކަތާ ގުޅޭގޮތުން މައުލޫމާތު ދެއްވުމަށްބޭއްވި ނޫސްވެރިންގެ ބައްދަލުވުމުގައި، ޕްލޭނިން މިނިސްޓްރީގެ ޕްރޮޖެކްޓް މެނޭޖަރ މުހައްމަދު ޖިނާން ވިދާޅުވީ 16 އޮގަސްޓުގައި ވިލިގިނލީގެ އިރުދެކުނު ކަންމަތީގައި، ބްރިޖް ތަނބުތަކުން ތެރެއިން ތަނބެއްގެ މަސައްކަތްކުރުމަށް ޕްލެޓްފޯމެއް އެސަރަހައްދުގައި މޮބިލައިޒްކުރުމަށް މަސައްކަތްކުރެވުނު ކަމަށެވެ. މިޕްލެޓް ފޯމުތައް އެންކަރކޮށްފައި އޮންނަނީ ހަތަރު އެންކަރ ސްޕަޑްގެ އެހީގައެވެ. އެދުވަހު އެމަސައްކަތްކުރަމުންދަނިކޮށް ދިމާވި ޓެކްނިކަލް މައްސަލައަކާއި އެސަރަހައްދުގެ އޮއިވަރު ހުރިގޮތުން ވިލިގިނލީ އިރުދެކުނު ކަންމައްޗަށްވާ ގޮތަށް ބޮޑަށް ޕްލެޓް ފޯމު ޖެހުނީކަމަށެވެ.

އެވަގުތު ކޮންޓްރެކްޓަރުގެ ފަރާތުން އެންމެ އިސްކަމެއްދިނީ ޕްލެޓްފޯމް އިތުރު ތަނަކަށް ނުދާނެހެން ދެ ޓަގެއްގެ އެހީގައި ޕްލެޓްފޯމް އެސަރަހައްދުގައި ހިފެހެއްޓުމުގެ މަސައްކަތްކަމަށާއި ނަމަވެސް އެކަން ކާމިޔާބު ނުވީކަމަށް ޖިނާން ވިދާޅުވިއެވެ. ކުރިޔަށް އޮތް ދުވަސްތަކުގައި މިފަދަ ކަމެއް ނުހިނގާނެގޮތަކަށް ކޮންޓްރެކްޓަރާއެކު މަސައްކަތްކުރާނެކަމަށް ޖިނާން ވިދާޅުވިއެވެ.

ޕްލެޓްފޯމް ފަރަށް އެރުމާއި ގުޅިގެން އެ މައްސަލަ ހައްލުކުރުމަށް ޕްލޭނިން މިނިސްޓްރީ އާއި އީޕީއޭ އަދި އެފްކޮންސް ގުޅިގެން، އެ ތަންތަނުގެ އިސްވެރިންނާ އެކު ވަނީ މަޝްވަރާ ބައްދަލުވުމެއް ބާއްވާފަ އެވެ. އީޕީއޭ އިން ބުނީ ޕްލެޓްފޯމް ނެގުމުން ވިލިމާލެ ފަރަށް ލިބިފައިވާ ގެއްލުން ބެލުމަށް އެސެސްމަންޓެއް ވެސް ހަދާނެ ކަމަށެވެ.