ކޮވިޑް19 ބަލީގައި މިއަހަރު މިހާތަނަށް އެއްމިލިއަން މަރު ރިކޯޑް ކުރެވިފައިވާކަމަށް ޑަބްލިއުއެޗްއޯގެ ޗީފް ޓެޑްރޮސް އަދޮނަމް ވިދާޅުވެއްޖެއެވެ. އަދި މި ހިތާމަވެރި ހިސާބަށް އާދެވުމުގެ ނަތީޖާއަކަށް ވާންޖެހޭނީ އިތުރު މީހުންނަށް ވެކްސިން ދެވޭތޯ ބެލުން ކަމަށް ޓެޑްރޮސް ވިދާޅުވެފައިވެއެވެ.

ޖެނީވާގައި ގަވާއިދުން ބާއްވާ ބްރީފިންގގައި ވާހަކަފުޅު ދައްކަވަމުން ޓެޑްރޮސް ވިދާޅުވީ ކޮވިޑް19 ބަލި ކުރިމަތިވެ ދެއަހަރާއި ބައިވެފައިވާއިރު، ބަލި ޖެހުނު ނަމަވެސް މަރުނުވެ ސަލާމަތް ކުރެވޭ ގޮތްތައް ފަހިވެފައި ހުރެމެ، މިއަހަރު އެކަނި އެއްމިލިއަން މީހުން މަރުވެފައިވުމުން، ކޮވިޑާއެކު އުޅެން ދަސްވެފައިވާ ކަމަކަށް ނުބުނެވޭނެ ކަމުގައެވެ. އަދި ދުނިޔޭގެ އާބާދީގެ 70 އިންސައްތަ މީހުންނަށް ވެކްސިން ދިނުމަށް ކުރެވޭ މަސައްކަތްތައް ހަލުވިކޮށް ސިއްހީ އެހީތެރިންނާއި އުމުރުން ދުވަސް ވީ މީހުން އަދި ހައި ރިސްކް އެންމެންނަށް އަވަހަށް ވެކްސިން ދީ ނިންމާލުމަށް ސަރުކާރުތަކަށް އަނެއްކާވެސް ގޮވާލައްވާފައިވެއެވެ.

އޭނާ ވިދާޅުވީ ވެކްސިން ދެވުނު މީހުންގެ އަދަދު ކުރިން އެހާ މަތި ނޫން ގައުމުތަކުގައި، ޚާއްސަކޮށް އެފްރިކާގެ ގައުމުތަކުގައި ނަމްބަރުތައް މިހާރު މަތިވަމުން އަންނާތީ އެކަމާ އުފާކުރައްވާ ކަމުގައެވެ.

ވެކްސިން ދެވުނު މީހުންގެ އަދަދު ދިހައެއް އިންސައްތަ ނުވަތަ އެއަށް ވުރެ ދަށުގަ ހުރި 34 ގައުމަކަށް އެހީވުމަށް މިއަހަރުގެ ޖަނަވަރީ މަހު ޑަބްލިއުއެޗްއޯއިން ވަނީ ޚާއްސަ "ވެކްސިން ޑެލިވަރީ ޕާޓްނަރޝިޕް ޕްރޮގްރާމް" އެއް ފަށާފައެވެ. މި 34 ގައުމުގެ ތެރޭން 6 ގައުމު ފިޔަވައި އެހެން ހުރިހާ ގައުމަކީ އެފްރިކާ ބައްރުގެ ގައުމުތަކެވެ.

ވެކްސިން ދެވުނު މީހުންގެ އަދަދު ދިހައެއް އިންސައްތަޔަށް ވުރެ ދަށުގައި މިއަދު ވަނީ 10 ގައުމެއްގައެވެ. މި ހުރިހާ ގައުމުތަކަކީ ވެސް ހަނގުރާމަތަކާއި އެހެންވެސް އިންސާނީ މުސީބާތްތައް ކުރިމަތިވެފައިވާ ގައުމުތަކެވެ.

އެންމެ އިސްކަން ދޭން ޖެހޭ މީހުންނަށް ވެކްސިން ދެވިފައިވާ މިންވަރު މަތިކަން ފާހަގަކުރައްވަމުން ޓެޑްރޮސް ވިދާޅުވީ ދުނިޔޭގެ އާބާދީގެ ތިންބައިކުޅަ އެއްބަޔަށް އަދިވެސް ވަނީ ވެކްސިން ނުދެވި ކަމުން ވެކްސިނޭޝަން ޕްރޮގްރާމް ހަލުވި ކުރުމަށް ކަންތައްތަކެއް ކުރަން އެބަޖެހޭ ކަމުގައެވެ.

ފަގީރު ގައުމުތަކުގެ ސިއްހީ މަސައްކަތްތެރިންގެ ތެރެއިން ތިންބައިކޮށްފައި ދެބައި މީހުންނާއި އުމުރުން ދުވަސް ވީ މީހުންގެ ހަތަރުބައި ކޮށްފައި ތިންބައި މީހުން، މިހާތަނަށް ވެކްސިން ނުދެވި ވާ މީހުންގެ ތެރޭގައި ހިމެނެއެވެ.

ޓެޑްރޮސް ވިދާޅުވީ އާމްދަނީގެ ގޮތުން ހުރިހާ ފެންވަރެއްގެ ގައުމުތަކުން ވެސް ހައިރިސްކް މީހުންނަށް އިސްކަން ދީ، ފުރާނަ ސަލާމަތް ކޮށްދެވޭނެ ގޮތްތައް އިތުރުކޮށް، ޓެސްޓް ކުރެވޭނެ ގޮތްތައް އިތުރުކޮށް އަދި ބަލި ފެތުރުން ހުއްޓުވުމަށްޓަކައި ހަރުދަނާ ސިޔާސަތުތަކެއް އެކުލަވާލާ އަމަލުކޮށްގެން މެނުވީ މިކަމަށް އެދެވޭ ހައްލެއް ނުލިބޭނެ ކަމުގައެވެ.

ޓެޑްރޮސްގެ ވާހަކަފުޅުގައި ވަނީ މަންކީ ޕޮކްސްގެ ހާލަތާ ބެހޭ ގޮތުންވެސް އަލި އަޅުވާލައްވާފައެވެ. އޭނާ ވިދަޅުވީ މުޅި ދުނިޔެއަށް ބަލާއިރު މިބަލި ފެތުރޭ މިންވަރު ވިހި އިންސައްތަ ދަށްވެފައިވާ ކަމަށާއި އެހެން ނަމަވެސް އެމެރިކާގައި ބަލި ފެތުރޭ މިންވަރު އިތުރުވެފައިވާ ކަމަށް ވިދާޅުވިއެވެ. ބަލި ފުރަތަމަ ފެށުނު އިރު ކޭސްތައް ގިނައީ ޔޫރަޕްގައި ނަމަވެސް މިހާރު އެކަން ބަދަލުވެފައިވާކަމަށް ވިދާޅުވިއެވެ. ރިޕޯޓުކުރެވިފައި ބަލިމީހުންގެ 40 އިންސައްތަ މިހާރު ޔޫރަޕަށް ނިސްބަތްވާއިރު 60 އިންސައްތަ ނިސްބަތް ވަނީ އެމެރިކާއަށް ކަމަށް އޭނަ ވިދާޅުވި އެވެ.

އަދި އެމެރިކާ އަދި ކެރީބިއަން އަށް މަންކީޕޮކްސް ވެކްސިން ފޯރުކޮށްދިނުމަށް ވެކްސިން ކުންފުނި ބަވޭރިއަން ނޯޑިކް ކުންފުނިން ޑަބްލިއުއެޗްއޯއާ އެކު ނިމުނު ހަފްތާގައި އެއްބަސްވުމެއްގައި ސޮއިކޮށްފައިވާތީ އެކަމަށް މަރުހަބާ ވިދާޅުވެފައިވެއެވެ. އަދި މިކަމުގެ ސަބަބުން އެސަރަހައްދުގައި މަންކީޕޮކްސް ކޮންޓްރޯލް ވެގެން ދާނެ ކަމަށް އުންމީދު ކުރައްވާ ކަމަށް ވިދާޅުވިއެވެ.