ޕާކިސްތާނުގައި ފެންބޮޑުވެ، 900 އަށްވުރެ ގިނަ މީހުން މަރުވެއްޖެ

ޕާކިސްތާނަށް މިހާރު ކުރަމުންދާ ވިއްސާރައިގައި ފެންބޮޑުވެ، 900 އަށްވުރެ ގިނަ މީހުން މަރުވެފައިވާ ކަމަށް ރިޕޯޓްކޮށްފިއެވެ.

އެ ޤައުމުގެ ކްލައިމެޓް ޗޭންޖް މިނިސްޓަރު ޝެރީ ރެހެމާންއާ ހަވާލާދީ ސީއެންއެންގައި ބުނެފައިވަނީ ޤައުމުގެ ހާލަތު ދަށްވެ، ބައިނަލްއަގުވާމީ އެހީތެރިކަމަށް މިހާރު އެދިފައިވާ ކަމަށެވެ. އަދި އެ ޤައުމުގައި ފެންބޮޑުވުމުގެ ސަަބަބުން އެތައް ހާސް އާއިލާ ހާލުގައި ޖެހިފައިވާ ކަމަށް ވެސް އޭނާ ވިދާޅުވިއެވެ.

ޝެރީ ކުރެއްވި ޓްވީޓެއްގައި ވިދާޅުވި ގޮތުގައި ފެންބޮޑުވުމުގެ ސަބަބުން މިހާތަނަށް 903 މީހަކު ވަނީ މަރުވެފައެވެ. މީގެ ތެރޭގައި 326 ކުޑަކުދިން ހިމެނެއެވެ.

އދ. ގެ ކޯޑިނޭޝަން އޮފް ހިޔުމަނިޓޭރިއަން އެފެއަރސް އިން ބުނެފައިވާގޮތުގައި ޕާކިސްތާނަށް ކުރަމުން އަންނަ ވިއްސާރައިގެ އަސަރު މިހާތަނަށް 2.3 މިލިއަން މީހުންނަށް ވަނީ ކޮށްފައެވެ. އަދި 95،350 އެއްހާ ގެ އެއްކޮށް ހަލާކުވެފައިވާ ކަމަށް ވެސް އެ އެޖެންސީން ބުނެއެވެ.

މީގެ އިތުރުން 504،000 އަށްވުރެ ގިނަ ނަޢަމް ސޫފި މަރުވެފައިވާއިރު 3000 ކިލޯ މީޓަރުގެ މަގު ވަނީ ހަލާކުވެފައެވެ. އަދި 129 ބްރިޖަށް ވެސް ވަނީ އެކި ވަރުގެ ގެއްލުންތައް ލިބިފައެވެ.

މި ވިއްސާރައިގައި އެންމެ ބޮޑަށް އަސަރު ކޮށްފައިވަނީ ޕާކިސްތާނުގެ ދެކުނު އިރުމަތީ ޕްރޮވިންސުގެ ސިންދު އާއި ދެކުނު ހުޅަނގު ޕްރޮވިންސުގެ ބަލޮޗިސްތާނަށެވެ.

ޗައިނާއިން ވަނީ ޕާކިސްތާނަށް މިވަގުތަށް ބޭނުންވާ އެހީތެރިކަން ފޯރުކޮށްދޭނެ ކަމަށް ބުނެފައެވެ. އެގޮތުން، 25000 ވަގުތީ ހިޔާ އާއި 300،000 އެމެރިކާ ޑޮލަރުގެ އެހީ ދޭން އެ ޤައުމުން ވަނީ ނިންމާފައެވެ.