ޖަޕަނީޒް ގްރާންޓް އެއިޑްގެ ފަރާތުން ރާއްޖެއަށް ދޭ ސްކޮލަރޝިޕް އެއްބަސްވުމުގައި ސޮއިކޮށްފި
މިއީ މައިގަނޑު ތިން ދާއިރާއަކުން ކިޔެވުމުގެ ފުރުސަތު ފަހިކޮށްދޭ ސްކޮލާޝިޕްތަކެއް
ޖަޕަނީޒް ގްރާންޓް އެއިޑްގެ ފަރާތުން ރާއްޖެއަށް ދޭ ސްކޮލަޝިޕް އެއްބަސްވުމުގައި ސޮއިކުރުން
ޖަޕަނީޒް ގަރާންޓް އެއިޑް(ޖޭޑީއެސް)ގެ ފަރާތުން އަންނަ އަހަރަށް ދިވެހިރާއްޖެއަށް ދޭ ސްކޮލަޝިޕް އެއްބަސްވުމުގައި ސޮއި ކޮށްފިއެވެ.
މިނިސްޓްރީ އޮފް ހަޔަރ އެޑިއުކޭޝަންގައި މިކަމަށްޓަކައި ބޭއްވި ޚާއްސަ ރަސްމިއްޔާތުގައި ސްކޮލަޝިޕް އެއްބަސްވުމުގައި ސޮއި ކުރެއްވީ ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަނާއި ޖޭޑީއެސްގެ ރެސިޓެންޓް ރެޕްރެޒެންޓޭޓިވް މޮޓޮ ޓަކީއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވަނީ ޖަޕާނުން ރާއްޖެއަށް ވަމުން ގެންދާ އެހީއަށް ޖަޕާނު ސަރުކާރަށް ޝުކުރު ދަންނަވާފައެވެ. މިނިސްޓަރ ވިދާޅުވީ ރާއްޖޭގެ މަތީ ތައުލީމީ ދާއިރާ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ލީޑަޝިޕްގެ ދަށުން އަންނަނީ ދުވަހެއް ދުވަހަކަށްވުރެ ފުޅާވަމުން ކަމަށެވެ. އެގޮތުން މަތީ ތައުލީމަށް ދެވޭ ލޯނާއި ރާއްޖޭގެ އެކި ސަރަހައްދުގައި ގާއިމް ކުރާ ޓިވެޓް ސެންޓަރުތަކާއި ރާއްޖެއިން ބޭރުގައި ކިޔެވުމަށް މާލީ އެހީތެރިކަން ފޯރުކޮށްދިނުމާއި ބާރުވެރިކުރުވުމަށް ގިނަގުނަ މަސައްކަތް މި ސަރުކާރުން ކުރައްވަމުން ގެންދަވާކަމަށް މިނިސްޓަރ ވިދާޅުވިއެވެ.
މިއީ މައިގަނޑު ތިން ދާއިރާއަކުން ކިޔެވުމުގެ ފުރުސަތު ފަހިކޮށްދޭ ސްކޮލަރޝިޕްތަކެކެވެ. އޭގެ ތެރޭގައި އެންވަޔަރަމަންޓް، ކްލައިމެންޓް ޗޭންޖް އެންޑް ޑިޒާސްޓަރ މެނޭޖްމަންޓާއި އިކޮނޮމިކް އެންޑް އިންޑަސްޓްރިއަލް ޕޮލިސީ ހިމެނެއެވެ. މިސްކޮލަރޝިޕްތަކަށް ދަރިވަރުން ހޮވުމުގެ ހުރިހާ މަސައްކަތް ކުރާނީ ސްކޮލަރޝިޕް ދޭ ފަރާތުންނެވެ.
އޭގެ ތެރޭގައި މާސްޓަރ އޮފް ޕަބްލިކް ޕޮލިސީ އާއި މާސްޓަރ އޮފް ޕަބްލިކް އެޑްމިނިސްޓްރޭޝަން އަދި މާސްޓަރ އޮފް އާޓްސް އިން ޕަބްލިކް ޕޮލިސީ ހިމެނެއެވެ. އޭގެ އިތުރަށް މާސްޓަރ އޮފް އާޓްސް އިން އިންޓަނޭޝަނަލް ރިލޭޝަންސް ވެސް ހިމެނެއެވެ.
މި ސްކޮލަރޝިޕް އަށް ކުރިމަތިލާ މީހުންގެ ޝަރުތުތަކުގެ ތެރޭގައި 22 އަހަރާއި 39 އަހަރު މީހަކަށްވާންޖެހޭއިރު އެމީހެއްގެ އަތުގައި ބެޗްލާސް ޑިގްރީއެއް އޮންނަން ޖެހެއެވެ. އަދި ސިވިލް ސާވަންޓެއް ނުވަތަ މިނިވަން މުވައްސަސާއެއްގެ ދާއިމީ މުވައްޒަފަކަށް ވާންޖެހެ އެވެ. މީގެ އިތުރަށް މަސައްކަތުގައި ދެ އަހަރު ދުވަހުގެ ތަޖުރިބާ ލިބިފައި ވުމަކީވެސް ޝަރުތެކެވެ.
ޖޭޑީއެސްގެ ޕްރޮގްރާމުތަކަކީ އެއް އަހަރު ނުވަތަ ދެ އަހަރުގެ ޕްރޮގްރާމްތަކެކެވެ. މިއަދު ސޮއި ކުރެވުނު ސްކޮލަރޝިޕްތަކަށް އިއުލާން ކުރާނީ މި އަހަރުގެ ފަހުކޮޅުގައެވެ.
ޖޭޑީއެސްގެ މި ސްކޮލަރޝިޕްތަކަކީ ރާއްޖޭގެ އިންސާނީ ވަސީލަތް ތަރައްގީކުރުމަށް ޖަޕާނުން އެހީ ފޯރުކޮށްދިނުމުގެ ގޮތުންދޭ ސްކޮލަރޝިޕްތަކެކެވެ. 2020 ވަނަ އަހަރުން ފެށިގެން ޖޭޑީއެސްއިން ދޭ މި ސްކޮލަރޝިޕްގައި މިހާރުވެސް 13 ދަރިވަރުން ދަނީ ކިޔަވަމުންނެވެ. މިއީ ޖޭޑީއެސް އިން މި ސްކޮލަރޝިޕް ދޭ ތިންވަނަ އަހަރެވެ.
