ޓެކްސީތަކުގައި ޑޭޝް ކެމެރާ ހަރުކުރުން މަޖުބޫރުކޮށް ޓެކްސީ ޤަވާއިދު ގެޒެޓުކޮށްފިއެވެ.

މި ޤަވާއިދު ގެޒެޓުކޮށްފައިވަނީ އަންގާރަ ދުވަހުއެވެ. ޤަވާއިދަށް އަމަލުކުރަން ފަށާނީ 6 މަސް ފަހުންނެވެ.

ޤަވާއިދުގައި ބަޔާންކޮށްފައިވާ ގޮތުން ޓެކްސީގެ ޚިދުމަތް ދިނުމަށް އަގު ނަގަންވާނީ، މިނިސްޓްރީން ކަނޑައަޅައި އާންމުކުރާ އަދަދުތަކަށްވުރެ ބޮޑުނުވާ ގޮތަށެވެ. އަދި ޓެކްސީގެ ޚިދުމަތް ލިބިގަންނަ ފަސިންޖަރުން، އަތުން ހިފައިގެން ހުންނަ އަތްދަބަހާއި ކޮތަޅުފަދަ ތަކެއްޗަށް އިތުރު އަގެއް ނަގައިގެން ނުވާނެކަމަށް ވަނީ ބަޔާންކޮށްފައެވެ.

ހަމައެއާއެކު، މި އުސޫލުތަކާއި ޚިލާފަށް ޓެކްސީގެ ޚިދުމަތް ދިނުމަށް އަގު ނެގުމަކީ މަނާކަމެއްކަންވެސް ވަނީ ބަޔާން ކޮށްފައެވެ.

މީގެ އިތުރުން ޓެކްސީން ދަތުރުކުރާ ފަސިންޖަރުންގެ ލަގެޖް ޓެކްސީއަށް އަރުވައި ބާލައިދިނުމުގައި ޑްރައިވަރުން އެހީތެރިވާންޖެހޭނެ ކަމަށް ޤަވާއިދުގައި ބުނެފައިވެއެވެ. ޚާއްޞަކޮށް، ބަލިމީހުންނާއި، ޚާއްޞަ އެހީއަށް ބޭނުންވާ މީހުންނާއި، ޖިސްމާނީ އުނިކަން އިޙުސާސް ކުރަން ޖެހިފައިވާ މީހުން ޓެކްސީއަށް އަރައި ފޭބުމުގައްޔާއި މިފަދަ މީހުން ބޭނުންކުރާ ފުރޮޅުލީ ގޮނޑިއާއި ލަގެޖް ޓެކްސީއަށް އަރުވައި ބާލައިދިނުމުގައި އެހީތެރިވާން ޖެހެއެވެ.

އަދި މިފަދަ މީހުން ބޭނުންކުރާ ފުރޮޅުލީ ގޮނޑި ފަދަ ތަކެއްޗަށް އިތުރު އަގެއް ނެގުމަކީ މަނާކަމެއްކަންވެސް ބަޔާންކޮށްފައިވެއެވެ.

މީގެ އިތުރުން، ދިވެހިރާއްޖޭގައި ޕްރައިވެޓް ހަޔަރގައި ޓެކްސީ ސެންޓަރެއް މެދުވެރިނުކޮށް ޓެކްސީގެ ޚިދުމަތް ދެވޭނީ، މިނިސްޓްރީން އާންމުކުރާ މިންގަނޑުތަކަށް ފެތޭ ވެބްސައިޓެއް ނުވަތަ އެޕްލިކޭޝަން (އެޕް) އެއް މެދުވެރިކޮށް ކަމަށްވެސް ޤަވާއިދުގައި ބުނެއެވެ. އެގޮތުން އެ މިންގަނޑުތައް ޤަވާއިދަށް ޢަމަލުކުރަން ފަށާތާ 3 މަސްދުވަހުގެ ތެރޭގައި މިނިސްޓްރީން އާންމުކުރަންވާނެކަމަށް ވަނީ ބަޔާންކޮށްފައެވެ.

ޓެކްސީތަކުގައި ޑޭޝް ކެމެރާ ހަރުކުރުންވެސް ލާޒިމުކޮށްފައިވާއިރު، ޑޭޝް ކެމަރާ އިން ރެކޯޑް ކުރާ މަންޒަރުތައް ހަތް ދުވަހުގެ މުއްދަތަކަށް ރައްކާތެރިކަމާ އެކު ބަލަހައްޓަން ޖެހެއެވެ.

މި ގަވާއިދާ ޚިލާފަށް އެއްވެސް ފަރާތަކުން ޢަމަލުކޮށްފައިވާކަމުގެ ޝަކުވާ، އެކަން ހިނގާތާ އެންމެ ގިނަވެގެން (3 ތިނެއް) ދުވަހުގެ ތެރޭގައި އެކަމަށް ތައްޔާރުކޮށްފައިވާ ފޯމުން މިނިސްޓްރީއަށް ހުށައެޅިދާނެކަމަށް ޤަވާއިދު ބުނެއެވެ. ަކުވާގެ އިތުރުން، މިނިސްޓްރީގެ އަމިއްލަ އިސްނެގުމުގައި ފާހަގަކުރެވޭ ކަމަކާ ގުޅިގެން ނުވަތަ ފުލުހުންގެ ފަރާތުން ހުށަހަޅާ ކަމަކާ ގުޅިގެންވެސް ޝަކުވާ ބެލިދާނެއެވެ.