ޕެސްޓުގެ ބޭންކް ސްޓޭޓްމަންޓު ހޯދީ ރަނގަޅަށް؛ ހައި ކޯޓު
ކްރިމިނަލް ކޯޓުން އެ ހެކިތައް ޝަރީއަތަށް ބަލައިގަތުމަށް ހުކުމް ކުރީ މައްސަލަ ބެއްލެވި ފަނޑިޔާރުންގެ އަޢުލަބިއްޔަތުން
މަޝްހޫރު ރެޕް ލަވަކިޔުންތެރިޔާ ޏ. ފުވައްމުލަކު ދިގުވާނޑު، ނައި، އިސްމާއިލް އިފްހާމް މުހައްމަދު
މަސްތުވާތަކެތީގެ މައްސަލައަކާއި ގުޅިގެން މަޝްހޫރު ރެޕް ލަވަކިޔުންތެރިޔާ ޏ. ފުވައްމުލައް-ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު) ގެ ބޭންކް އެކައުންޓުގެ ސްޓޭޓްމެންޓް ހޯދީ ރަނގަޅަށް ކަމަށް ހައިކޯޓުން ހުކުމްކޮށްފިއެވެ.
އޮގަސްޓް މަހުގެ ފުރަތަމަ ހަފްތާގައި ބޭއްވި ޝަރީއަތުގެ އަޑު އެހުމުގައި ޕެސްޓުގެ ފަރާތުން ވަނީ ދިފާއުގެ ހުށައެޅުންތަކަށް ގޮތް ނިންމާފައެވެ.
ދައުލަތުން އޭނާއާއި ދެކޮޅަށް ހުށައަޅާފައިވާ ވީޑިއޯ އެންޑް އިމޭޖް އެނާލިސިސް ރިޕޯޓުގައި ބަޔާންކޮށްފައިވާ ނިންމުމަކަށް ވާސިލުވުމަށް ބޭނުންކުރި "ވޯކްލޮގް" އެއް ހާމަ ކޮށްދިނުމަށް އެދި ޕެސްޓުގެ ފަރާތުން ހުށައެޅިއެވެ. އަދި އެ ރިޕޯޓުގެ ނިންމުމަކަށް ވާސިލުވުމަށް ތަހުލީލުގައި ބޭނުންކޮށްފައިވާ ސޮފްޓްވެއަރ އިން ޖެނަރޭޓްކުރާ އޮޓޮމޭޓަޑް ރިޕޯޓުވެސް ހާމަކޮށްދިނުމަށް ވެސް ވަނީ އެދިފައެވެ. މީގެ އިތުރުން ބޭންކް "ސްޓޭޓްމަންޓު" ތަކާއި މުއާމަލާތްތަކުގެ ތަފްސީލުތައް ހޯދާފައިވަނީ ޤާނޫނާ އެއްގޮތަށް ނޫން ކަމަށް ވެސް ޕެސްޓުގެ ވަކީލް ވަނީ ފާހަގަކުރައްވާފައެވެ.
އެގޮތުން ކޯޓު މެދުވެރިނުކޮށް ހޯދޭނީ ކަސްޓަމަރުގެ އެކައުންޓުތަކާއި، ޑިޕޮސިޓްތައް ފަދަ އެކައުންޓުގެ މައުލޫމާތުކަމަށް ދިފާއުން ބަޔާންކޮށްފައިވެއެވެ. އެކަން ދިވެހިރާއްޖޭގެ ބޭންކިންގ އާއި ބެހޭ ޤާނޫނުގެ 41 ވަނަ މާއްދާގައި ބަޔާންކޮށްފައިވެއެވެ.އެހެންކަމުން، ޕެސްޓުގެ ބޭންކް ސްޓޭޓްމަންޓު ހެކީގެ ގޮތުގައި ޝަރީއަތަށް ބަލައިނުގަތުމަށް ވަނީ ހުށައަޅާފައެވެ.
އެހެންނަމަވެސް އެކަމާ ގުޅޭގޮތުން ދައުލަތުން ވަނީ ޖިނާއީ އިޖުރާއަތުގެ ޤާނޫނުގެ 72 ވަނަ މާއްދާގެ (ބ) ގެ ދަށުން ކުރަންޖެހޭ ކަންކަމުގައި ކޯޓު އަމުރެއް ހޯދާކަށް ނުޖެހޭނެ ކަމަށް ފާހަގަކޮށްފައެވެ. އެކަން ކުރީގެ ރައީސް އަބްދުﷲ ޔާމީނުގެ މައްސަލައިގައި ސުޕްރީމް ކޯޓުން ކުރި ޙުކުމުގައި ބަޔާންކޮށްފައިވާކަމަށް ދައުލަތުން ފާހަގަ ކުރެއެވެ.
އެހެންނަމަވެސް، ދިވެހި ފުލުހުންގެ ޚިދުމަތުގެ ފަރާތުން އެ ސްޓޭޓްމަންޓު ހޯދުމަށް ފޮނުވި ސިޓީގައި އެއީ ޖިނާއީ އިޖުރާއަތުގެ ޤާނޫނުގެ 72 ވަނަ މާއްދާގެ (ބ) އާއި ހަވާލާދީ ކަމެއް ފާހަގަކޮށްފައި ނުވާކަން މައްސަލަ ބެއްލެވި ގާޒީ ވަނީ ފާހަގަކުރައްވާފައެވެެ. އެހެންކަމުން ދައުލަތުން ބުނާ ބުނުމާއި، ސިޓީގައި ހުރި ކަންކަން ދިމާނުވާކަމަށް ވެސް ގާޒީ ވަނީ ވިދާޅުވެފައެވެ. އެކަންކަމަށް ރިއާޔަތްކުރެއްވުމަށް ފަހު ގާޒީ ވަނީ އޭނާގެ އެކައުންޓް ސްޓޭޓްމަންޓް ޝަރީއަތަށް ބަލައިނުގަތުމަށް ނިންމަވާފައެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
އެހެންނަމަވެސް ހައިކޯޓުން ވަނީ ކްރިމިނަލް ކޯޓުގެ އެ ނިންމުމަކީ ބާތިލް ނިންމުމެއް ކަމަށް ކަނޑައަޅާ ކިތާބީ ހެއްގެ ގޮތުގައި ދައުލަތުން ހުށަހެޅި ހެކިތަކަކީ، (ބޭންކް ސްޓޭޓްމެންޓްތަކަކީ) ގާނޫނާއި އެއްގޮތަށް ހޯދާފައިވާ ތަކެތި ކަމަށް ކަނޑައަޅާފައެވެ. އަދި އެ ހެކިތައް ޝަރީއަތަށް ބަލައިގަތުމަށް މައްސަލަ ބެއްލެވި ފަނޑިޔާރުންގެ އަޢުލަބިއްޔަތުން ވަނީ ޙުކުމްކޮށްފައެވެ.
