މިނީ ބަސް: ޓެސްޓް ދަތުރުތައް ނިމިއްޖެ، މިމަހުގެ ތެރޭގައި ޚިދުމަތް ފެށުމަށް މަސައްކަތްކުރަނީ
21 އޯގަސްޓު 2022 | އާދީއްތަ 11:39ޓެސްޓް ދަތުރުތަކުގައި އެމްޓީސީސީގެ މުވައްޒަފުންނާއި މާލެ ސިޓީ ކަައުންސިލާއި ފުލުހުން ބައިވެރިވި
މިނީ ބަހުގެ ޓެސްޓް ދަތުރުތައް ފެށުން
މާލޭގައި މިނީ ބަހުގެ ޚިދުމަތް މި މަހުގެތެރޭގައި ޚިދުމަތް ފެށުމަށް މަސައްކަތް ކުރަމުން އަންނަކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޓީސީސީން މިނީ ބަހުގެ ޓެސްޓް ދަތުރުތައް ބާއްވާފައިވާއިރު، ޓެސްޓް ދަތުރުތަކުގައި އެކުންފުނީގެ މުވައްޒަފުންނާއި މާލެ ސިޓީ ކަައުންސިލާއި ފުލުހުން ބައިވެރިވިއެވެ. އެމްޓީސީސީން ބުނީ މި ދަތުރުތަކުގެ ބޭނުމަކީ މިނީ ބަހުގެ ޚިދުމަތް ކަސްޓަމަރުންނަށް ވީހާވެސް ފުރިހަމައަށް ފޯރުކޮށްދިނުމަށް މަސައްކަތްކުރުންކަމަށެވެ.
ރާއްޖެއެމްވީއަށް މައުލޫމާތު ދެއްވަމުން އާޒިމް ވިދާޅުވީ ޓެސްޓް ދަތުރުތައް ރަނގަޅު ކަމަށެވެ. އަދިވެސް ޚިދުމަތް ފުރިހަމަކުރަންޖެހޭ ކުދިކުދި ކަންތައްތައް އެބަހުރި ކަމަށެވެ. ގަޑިތަކަށް ބަސްތަކަށް އާދެވޭނަމަ ރައްޔިތުންގެ އިތުބާރު ލިބިގެންދާނެކަމަށާއި މިނީ ބަހުގެ ޚިދުމަތް ފެށުމަށް މުވައްޒަފުން ނަގާ ތަމްރީނުކޮށްފައިވާ ކަމަށްވެސް ވިދާޅުވިއެވެ.
މާލޭގައި މިނީ ބަހުގެ ޚިދުމަތް ފެށުމަށް ކުރަމުން އަންނަ މަސައްކަތްތަކުގެ ދަށުން، މަޖީދީ މަގުގައި ޕާކުކުރުން މިހާރު ވަނީ މަނާކޮށްފައެވެ. މާލެ ސިޓީ ކައުންސިލުން ވަނީ މަޖީދީމަގުގައި ޕާކު ކުރުން މަނާކަން އެންގުމަށް، މަގުގެ ދެ ފަރާތުގައި ވެސް ރޮނގު ދަމާފައެވެ. ބައެއް ސަރަހައްދުތަކުގައި ޕާކު ނުކުރެވޭކަން އެންގުމަށް ކޯނުވެސް ވަނީ ޖަހާފައެވެ.
މާލޭގައި މިނީ ބަހުގެ ޚިދުމަތް ފެށުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއި ސިޓީ ކައުންސިލާއި ފުލުހުން ގުޅިގެން އަންނަނީ، ޓްރެފިކަށް ގެންނަންޖެހޭ ބަދަލުތަކާއި ޕާކިންގއަށް ގެންނަންޖެހޭ ބަދަލުތަކާއި ބަސް ސްޓޮޕްތައް ބެހެއްޓުމުގެ މަސައްކަތް ކުރަމުންނެވެ.
މިނީ ބަހުގެ ދަތުރުތައް މާލޭގައި ފެށުމަށް މަގުތަކުގެ ޕާކިންގ ޒޯންތައް ނަގައި އެ ތަންތަނުގެ ބަދަލުގައި މިހާރު ހަތަރު ސަރަހައްދަކުން ބިންވެސް ވަނީ ހަމަޖައްސައިދީފައެވެ. އެއީ ހ. ސަމޯސާވިލާ ގޭގެ ބިމުން ބަޔަކާއި އެކުވެނި ޓްރެކް ކައިރިން ދެ ތަނަކާއި ދަރުބާރުގޭދޮށާއި ރަސްފަންނު ކައިރިން ކޮރަލް ބުލިވަރޑް ކައިރި އޮންނަ ސަރަހައްދެވެ.
މިނީ ބަހުގެ ޚިދުމަތް މާލޭގެ އިތުރުން އެހެން ސަރަހައްދެއް ވަނީ ފަށާފައެވެ. އެއީ އައްޑޫ ސިޓީއާއި ފުވައްމުލައް ސިޓީއާއި ލ. އަތޮޅުގެ ރަށްތަކެވެ.
މިނީ ބަހުގެ ޚިދުމަތް ފަށާ ފުރަތަމަ ދެ ހަފުތާގައި އެ ޚިދުމަތްދޭނީ ހިލޭކަމަށް އެމްޓީސީސީން ވަނީ ބުނެފައެވެ. އެ ދެ ހަފުތާއަކީ ރޫޓުތައް ދިރާސާކުރުމަށް ދަތުރުކުރާ ދެ ހަފުތާއެވެ.
