އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާ މާވިން އެސްވައި ވާރގަސްގެ މައްޗަށް އުފުލާފައިވާ ދައުވާގެ އަޑުއެހުން ކެންސަލްވެއްޖެއެވެ.
މި އަޑުއެހުން ތާވަލު ކޮށްފައި އޮތީ އާދިއްތަ ދުވަހުގެ ހެނދުނު 10:00 އަށެވެ. އެހެންނަމަވެސް، ތަރުޖަމާނު ބަލިވެ އުޅޭކަން އަންގައި ކޯޓަށް ސިޓީއެއް ހުށައަޅާފައިވާތީ، މި މައްސަލައިގެ އަޑުއެހުން ވަނީ ކެންސަލްވެފައެވެ.
މާވިންއަށް ކުރާ ދައުވާގެ އެންމެ ފަހުން އަޑުއެހުމެއް ބާއްވާފައިވަނީ 27 ޖޫން 2022 ގައެވެ. އެ ދުވަހުގެ އަޑުއެހުމުގައި އޮތީ ދައުލަތުން ހެކި ހާމަ ކުރުމާއި، މާވިންގެ ބަންދު މުރާޖައާގެ ބައެވެ.
އެ އަޑުއެހުމުގައި ދައުލަތުން ވަނީ އޭނާއާ ދެކޮޅަށް ހުށައަޅާ ހެކި ހާމަކޮށްފައެވެ. އަދި ދިފާއުން ވަނީ ހެކި ހުށައަޅަން އިތުރު ފުރުސަތަކަށް އެދިފައެވެ. ވުމާއެކު، މައްސަލަ ބައްލަވާ ގާޒީ ވަނީ ލިއުމުން ދިފާއީ ހެކި ހުށައަޅަން 7 ދުވަހުގެ މުއްދަތެއް ދެއްވާފައެވެ.
މި މައްސަލައިގެ މަދަނީ މިންގަނޑުން ގޮތެއް ނިންމަވަމުން އެ ދުވަހު ގާޒީ ވިދާޅުވީ، މިއީ މަަދަނީ މިންގަނޑުން ކުރިއަށް ގެންދެވޭނެ މައްސަލައެއްކަމަށް ޝަރީއަތަށް ބުރަވެވޭ ކަަމަށެވެ. އެއަށްފަހު ގާޒީ ވަނީ ޝަރީއަތުގެ ކުރީގެ ހުށައެޅުންތަކަށް ދެފަރާތަށްވެސް 15 ދުވަހުގެ މުއްދަތެއް ދެއްވާފައެވެ.
އެ ދުވަހު ބޭއްވި އަޑުއެހުމުގައި މާވިންގެ ބަންދު މުރާޖައާވެސް ކުރިއަށް ގެންގޮސްފައިވާއިރު، ބަންދު މުރާޖައާއާ ގުޅޭގޮތުން ދައުލަތުން ފާހަގަކޮށްފައިވާ ގޮތުގައި އޭނާ ޝަރީއަތް ނިމެންދެން ބަންދުކޮށްފައި ހުރި ހުރުމަށް ބަދަލު ގެންނަންޖެހޭ ޙާލަތެއް ނެތެވެ. ދިފާއުންވެސް އެކަމަށް އިއުތިރާޒެއް ނުކުރެއެވެ.
މައްސަލަ ބައްލަވާ ގާޒީވެސް ވަނީ އޭނާގެ ބަންދަށް ބަދަލެއް ގެންނަންޖެހޭ ޙާލަތެއް ނެތްކަމަށް ކަނޑައަޅުއްވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
