ފަހަތުން އަރައި ތިން ލަނޑު ޖަހައި، ބްރެމެން އިން ޑޯޓްމަންޑު ބަލިކޮށްފި

ޖަރުމަނު ލީގުގައި ވާޑާ ބްރެމަންއާ ދެކޮޅަށް ކުޅުނު ފުޓުބޯޅަ މެޗުން ހިތްދަތި ގޮތަކަށް ބޮރޫޝިއާ ޑޯޓްމަންޑު ބަލިވެއްޖެއެވެ.

ޖަރުމަނު ލީގުގައި ހޮނިހިރު ދުވަހުގެ ރޭ އަމިއްލަ ދަނޑުގައި ކުޅުނު މެޗުން ޑޯޓްމަންޑް ބަލިވީ 3-2 އިންނެވެ. އެއީ މެޗުގައި ޑޯޓްމަންޑުން ދެ ލަނޑުގެ ލީޑެއްގައި އޮއްވާ، ފަހު ވަގުތުގެ ތެރޭގައި ބްރެމަން އިން ވަނީ ތިން ލަނޑު ޖަހައި މެޗުން ތިން ޕޮއިންޓް ހޯދާފައެވެ.

ޑޯޓަމްންޑުގެ ފުރަތަމަ ލަނޑު ޖޫލިއަން ބްރަންޑްޓް ޖެހީ ފުރަތަމަ ހާފުގެ އިތުރު ވަގުތުގެ ތެރޭގައެވެ. އެ ޓީމުގެ ދެ ވަނަ ލަނޑު ދެ ވަނަ ހާފުގެ 77 ވނަ މިނެޓުގައި ޖެހީ ރަފައެލް ގަރޭރޯއެވެ. ލީޑުގައި އޮވެ ޑޯޓްމަންޑުން ކުޅެމުން ދަނިކޮށް، މެޗުގެ 89 ވަނަ މިނެޓުގައި ލީ ބުޗާނަން ވަނީ ލަނޑެއް ޖަހައި ބްރެމަންއަށް އުންމީދެއް ހޯދައިދީފައެވެ.

ބްރެމަންގެ ފަހު ދެ ލަނޑު ވެސްް ޖެހީ އިތުރު ވަގުތުގެ ގޮތުގައި ދެެއްކި ފަސް މިނެޓުގެ ތެރޭގައެވެ. އިތުރު ވަގުތުގެ ތިން ވަނަ މިނެޓުގައި ނިކްލަސް ޝްމިޑްޓް ޖެހި ލަނޑުން ބްރެމަން އިން ވަނީ ނަތީޖާ ހަމަހަމަކޮށްފައެވެ. އެ ޕްރެޝަރުގައި ޑޯޓްމަންޑުން އޮއްވާ ފަސް ވަނަ މިނެޓުގައި އޮލިވާ ބާކް ވަނީ ބްރެމަން މޮޅުކޮށްދިން ލަނޑު ޖަހާފައެވެ.

މެޗުން ލިބުނު ތިން ޕޮއިންޓާއެކު ބްރެމަން އޮތީ ތާވަލްގެ އަށް ވަނަ މަގާމުގައެވެ. އެއީ ތިން މެޗުން ޖުމުލަ ފަސް ޕޮއިންޓް ހޯދައިގެންނެވެ. ތިން މެޗުން ޑޯޓްމަންޑަށް ލިބެނީ ހަ ޕޮއިންޓެވެ. އެ ޓީމު އޮތީ ހަތް ވަނައިގައެވެ.