މިހާތަނަށް އައިއިރު 14،930 ދަރިވަރުން ހިލޭ، ޑިގްރީއަށް ކިޔަވަމުންދާކަމަށް ޔޫތު މިނިސްޓަރ އަހުމަދު މަޚުލޫފު ވިދާޅުވެއްޖެއެވެ.

ސަރުކާރުގެ އެކި ވުޒާރާތަކަށް މެންޑޭޓް ކުރެވިފައިވާ މަސައްކަތްތަކުގެ ތެރެއިން ޒުވާނުންނަށް ފަހިކޮށްދީފައިވާ ފުރުސަތުތަކަށް މިނިސްޓަރ ވަނީ އަލިއަޅުވާލައްވާފައެވެ.

ޒުވާނުންނަށް ފަހިވެފައިވާ ފުރުސަތުތަކަށް އަލިއަޅުވާލައްވާ މިނިސްޓަރ ވިދާޅުވީ، ސަރުކާރު މިހާތަނަށް އައިއިރު 14،930 ދަރިވަރުން ހިލޭ ޑިގްރީއަށް ކިޔަވަމުންދާ ކަމަށެވެ. އޭގެ ތެރެއިން 5000ށްވުރެ ގިނަ ދަރިވަރުން މިހާރު ކޯސް ނިންމާފައިވާކަން މިނިސްޓަރ ފާހަގަކުރެއްވިއެވެ.

ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުވެސް ވަނީ، 2023ގެ ނިޔަލަށް 5000ށްވުރެ ގިނަ ކުދިން ހިލޭ، ޑިގްރީ ހަދައިގެން ގައުމު ބިނާކުރަން ނުކުންނާނެކަމަށް ވިދާޅުވެފައެވެ.  

މަތީ ތައުލީމު ހާސިލްކުރުމުގެ ފުރުސަތު ހިލޭ ދިނުމަކީ ރައީސް އިބްރާހިމް މުހައްމަދު ސޯލިހްގެ ފުރަތަމަ 100 ދުވަހުގެ ވައުދުތަކުގެ ތެރެއިން ވައުދެކެވެ.

މިވަގުތުވެސް ސްކޮލަރޝިޕްތަކުގައި 20 ގައުމެއްގައި ދަރިވަރުން ތައުލީމު ހާސިލު ކުރަމުންދާކަން މިނިސްޓަރ ފާހަގަ ކުރެއްވިއެވެ.

އޭގެ އިތުރުން، 100 އެޕްރެންޓިސްޝިޕް ޕްރޮގްރާމް ހިންގޭއިރު، އޭގެ ތެރެއިންވެސް 1500 ދަރިވަރުން ތަމްރީނު ލިބިގަންނަމުންދާ ކަމަށާއި، އެ ޕްރޮގްރާމް ނިންމި އެތައް ދަރިވަރުންނަކަށް ވަޒީފާ ހަމަޖެހިފައިވާކަން މިނިސްޓަރ ފާހަގަ ކުރެއްވިއެވެ.

މަދަނީ ޖަމްއިއްޔާތަކުގެ ހިންގުން ހަރުދަނާކުރުމަށް މުޅި ރާއްޖެއަށް އަމާޒުކޮށް މަހާސިންތާތައް ބާއްވާފައިވާކަމަށާއި، މަދަނީ ޖަމްއިއްޔާތަކަށް ޓެކްނިކަލް އެހީއާއި މާލީ އެހީވެސް ފޯރުކޮށްދެވިފައިވާކަމަަށް ވިދާޅުވިއެވެ.

އޭގެ އިތުރުން، ޒުވާނުން ބާރުވެރި ކުރުވުމަށް، 3005 ޒުވާނުންނަށް ހަމައެކަނި ހަފުތާރެސް ޕްރޮގްރާމުން ރީޗްވެވިފައިވާކަމަށް މިނިސްޓަރ ވިދާޅުވިއެވެ.