އެކައުންޓިންގ ސްޓޭންޑަރޑްތަކަށް ޚާއްސަ ފޯރަމެއް ސީއޭ މޯލްޑިވްސްއިން ފަށައިފި

އެކައުންޓިން ސްޓެންޑަރޑްތަކަށް ޚާއްސަކޮށްގެން، އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދި މޯލްޑިވްސް (ސީއޭ މޯލްޑިވްސް)އިން ފޯރަމެއް ފަށައިފިއެވެ.

އައި.އެފް.އާރް.އެސް އަދި އައި.އެސް.އޭ.އެސް ފޯރަމް ސީއޭ މޯލްޑިވްސްއިން ކުރިއަށްގެންދާނީ ދެ ދުވަހުގެ މުއްދަތަކަށް، ގައުމީ ޔުނިވަރސިޓީގެ ބިޒްނަސް ސްކޫލްގެ އޮޑިޓޯރިއަމްގައެވެ. މި ފޯރަމް ފަށާފައިވަނީ ހޮނިހިރު ދުވަހުގެ ހެނދުނުއެވެ. މި ރަސްމިއްޔާތުގައި ކޮމިޝަނަރ ޖެނެރަލް އޮފް ޓެކްސޭޝަން އަދި ސީއޭގެ މޯލްޑިވްސްގެ ކައުންސިލް މެމްބަރ ފަތުހުﷲ ޖަމީލްއާއި ސީއޭ މޯލްޑިވްސްގެ ކައުންސިލްގެ އިތުރުން ޓެކްނިކަލް އެންޑް ސްޓޭންޑަރޑް ކޮމިޓީގެ މެމްބަރުންނާއި އެކައުންޓިންގ ދާއިރާގެ ފުންނާބު އުސް ފަރާތްތައް ބައިވެރިވެ ވަޑައިގެންނެވިއެވެ.

މިއީ މެލޭޝިއަން އިންސްޓިޓިއުޓް އޮފް ޗާޓަރޑް ޕްރޮފެޝަނަލް އެކައުންޓެންޓްސް (އެމްއައިސީޕީއޭ)ގެ އެހީތެރިކަމާއެކު ސީއޭ މޯލްޑިވްސްއިން ކުރިއަށްގެންދާ ފޯރަމެކެވެ. އެގޮތުން، އެ އިންސްޓިޓިއުޓްގެ ދެ މެމްބަރަކު މި ފޯރަމުގައި ސެޝަންތައް ކުރިއަށްގެންދާނެއެވެ. އެމްއައިސީޕީއޭގެ ދެ މެމްބަރުންގެ އިތުރުން ކުރީގެ އޮޑިޓަރ ޖެނެރަލް އަދި ނައީމް އެންޑް ޖިނާން އެލްއެލްޕީގެ ޕާޓްނަރ އިބްރާހިމް ނައީމްގެ ފަންނީ ސެޝަންތަކެއްވެސް ކުރިއަށް ގެންދިއުމަށްވަނީ ހަމަޖެހިފައެވެ.

މި ފޯރަމުގެ ސެޝަންތަކުގައި މައިގަނޑު ގޮތެއްގައި އަލިއަޅުވާލަން ހަމެޖެހިފައިވަނީ އެކައުންޓިންގ ސްޓޭންޑަރޑްތައް ކަމަށްވާ އައި.އެފް.އާރް.އެސް އަދި އައި.އެސް.އޭ.އެސްގެ އެންމެ ފަހުގެ އަޕްޑޭޓްތަކާއި، އަލަށް ނެރުނު ސްޓޭންޑަރޑްތަކުގެ އިތުރުން އެ ސްޓޭންޑަރޑްތަކުގެ ޕްރެކްޓިކަލް އެޕްލިކޭޝަންތަކަށެވެ. މި ސެޝަންތަކުގެ ޒަރީއާއިން، އޮޑިޓް ފަރމްތަކުން ކުރާ އޮޑިޓްތަކުގެ ފެންވަރު ރަނގަޅުވެގެން ދާނެކަމަށް ސީއޭ މޯލްޑިވްސްއިން މައުލޫމާތުދެއެވެ.

މި ރަސްމިއްޔާތުގައި ވާހަކަފުޅުދައްކަވަމުން އޮޑިޓަރ ޖެނެރަލް އަދި ސީއޭ މޯލްޑިވްސްގެ ރައީސް ހުސައިން ނިޔާޒީ ވިދާޅުވީ، ރާއްޖޭގައިވެސް މާލީ ރިޕޯޓުތަކަކީ ގިނަ ބަޔަކު އެކި ކަންކަމުގައި ބޭނުންކުރާ އެއްޗަކަށްވުމުން، އެ ހުރިހާ ރިޕޯޓުތަކެއް އެއް ސްޓޭންޑަރޑްތަކަކަށް ހެދުން މުހިންމުކަމަށެވެ. މި ރިޕޯޓުތަކަކީ ބައިނަލްއަގުވާމީ ފަރާތްތަކުންވެސް ބަލާ ރިޕޯޓުތަކެއްކަން ފާހަގަކުރައްވައި ނިޔާޒީ ވިދާޅުވީ، އެހެންކަމުން އެންމެ ރަނގަޅު ގޮތަކީ އައި.އެފް.އާރް.އެސް އަދި އައި.އެސް.އޭ.އެސް ފަދަ ބައިނަލްއަގުވާމީ މިންގަނޑުތައް ކަމަށްވެސް އޭނާ ވިދާޅުވިއެވެ.

މީގެ އިތުރުން މިފަދަ ފޯރަމެއް ބޭއްވުމުގައި އެމްއައިސީޕީއޭއިން ސީއޭ މޯލްޑިވްސްއަށް ދެމުން ގެންދާ އެހީތެރިކަން ފާހަގަކުރައްވައި އެ އިންސްޓިޓިއުޓަށް ނިޔާޒީ ވަނީ ޝުކުރުއަދާކުރައްވާފައެވެ.

ސީއޭ މޯލްޑިވްސްއިން ބުނިގޮތުގައި މިފަދަ ފޯރަމެއް ކުރިއަށްގެންދިއުމުގެ މައިގަނޑު މަގުސަދަކީ އެ އިންސްޓިޓިއުޓްގެ މެމްބަރުންނާއި، ދިވެހިރާއްޖޭގައި އެކައުންޓިން ދާއިރާގައި މަސައްކަތްކުރާ ފަރާތްތަކަށް ބޭނުންވާ ތައުލީމާއި ތަމްރީން ފޯރުކޮށްދީ، ރާއްޖޭގެ އެކައުންޓެންސީ ޕްރޮފެޝަން އިތުރަށް ހަރުދަނާކޮށް ކުރިއެރުމަށް މަގުފަހިކޮށްދިނުމެވެ.

މީގެ އިތުރުން މި ފޯރަމްގައި ބައިނަލްއަގުވާމީ އޮޑިޓިން ހަމަތަކަށް އަންނަ ބަދަލުތަކާއި އެ ބަދަލުތަކުގެ ސަބަބުން އޮޑިޓަރުންނާ އެކައުންޓެންޓުންގެ މަސައްކަތަށް އަންނާނެ ބަދަލުތަކަށް އަލިއަޅުވާލާނެ ކަމަށްވެސް ސީއޭ މޯލްޑިވްސްއިން ބުނެއެވެ.

މި ފޯރަމްގައި، އޮޑިޓް ފަރމްތަކާއި އެހެނިހެން ފަރާތްތައް ހިމެނޭ ގޮތަށް ޖުމްލަ 200 މީހުންބައިވެރިވެއެވެ.