ރާއްޖޭގައި އެކައުންޓިންގ ދާއިރާގައި ހަރަކާތްތެރިވާ ފަރާތްތަކަށް އަމާޒުކޮށްގެން އައިއެފް.އާރް.އެސް އަދި އައި.އެސް.އޭ.އެސް ފޯރަމްގެ ނަމުގައި ޚާއްސަ ޓެކްނިކަލް ފޯރަމެއް ބޭއްވުމަށް އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް، (ސީއޭ މޯލްޑިވްސް)އިން ނިންމައިފިއެވެ.

މި ފޯރަމް ބާއްވަން ހަމަޖެހިފައިވަނީ އަންނަމަހުގެ 20ން 21އަށެވެ. މި ފޯރަމް އޮންނާނީ ދިވެހިރާއްޖޭގެ ގައުމީ ޔުނިވަރސިޓީގެ ބިޒްނަސް ސްކޫލުގެ އޮޑިޓޯރިއަމްގައެވެ.

ފޯރަމުގައި ބައިވެރިވުމުގެ ފުރުސަތު އޮގަސްޓް 11އާ ހަމައަށް ވަނީ ހުޅުވާލާފައެވެ. ފޯރަމްގައި ބައިވެރިވާން ޝައުގުވެރިވާ ފަރާތްތަކުން އެކަމަށް ޚާއްސަކޮށްފައިވާ އޮންލައިން ޕޯޓަލް މެދުވެރިކޮށް ރަޖިސްޓްރޭޝަންގެ ކަންކަން ކުރިއަށްގެންދެވޭނެކަމަށް ސީއޭ މޯލްޑިވްސުން ބުނެއެވެ.

މިއީ ސީއޭ މޯލްޑިވްސްގެ މެމްބަރުންނާއި ރާއްޖޭގައި އެކައުންޓިންގ ޕްރޮފެޝަންގައި މަސައްކަތްކުރާ ފަރާތްތަކަށް ބޭނުންވާ ތައުލީމާއި ތަމްރީން ފޯރުކޮށްދީ، ރާއްޖޭގެ އެކައުންޓެންސީ ޕްރޮފެޝަން އިތުރަށް ހަރުދަނާކޮށް ކުރިއެރުމަށް މަގުފަހިކޮށްދިނުމަށް ބާއްވާ ފޯރަމެއްކަމަށް ސީއޭ މޯލްޑިވްސުން ބުނެއެވެ.

މި ފޯރަމްގައި މެލޭޝިއަން އިންސްޓިޓިއުޓް އޮފް ޗާޓަރޑް ޕްރޮފެޝަނަލް އެކައުންޓެންޓްސް (މިކްޕާ)ގެ 2 މެމްބަރުންގެ އިތުރުން ރާއްޖޭގެ އެކައުންޓިންގ ދާއިރާގެ ތަޖުރިބާކާރުންގެ ފަންނީ ސެޝަންތަކެއް ކުރިއަށްގެންދާނެއެވެ. މި ސެޝަންތަކުގައި މައިގަނޑުގޮތެއްގައި އަލިއަޅުވާލަން ހަމަޖެހިފައިވަނީ އެކައުންޓިންގ ސްޓޭންޑަޑްގެ އެންމެފަހުގެ އަޕްޑޭޓްތަކާއި، އަލަށް ނެރުނު ސްޓޭންޑަޑްތަކުގެ އިތުރުން ސްޓޭންޑަޑްތަކުގެ ޕްރެކްޓިކަލް އެޕްލިކޭޝަނަށެވެ.

ސީއޭ މޯލްޑިވްސުން ބުނީ މި ފޯރަމް އަމާޒުކޮށްފައިވަނީ އެ އިންސްޓިޓިއުޓްގެ މެމްބަރުންނަށާއި އެކައުންޓިންގ ޕްރޮފެޝަންގައި މަސައްކަތްކުރާ ފަރާތްތަކުގެ އިތުރުން އެކައުންޓިންގ ދާއިރާގައި ތައުލީމު ހާސިލުކުރަމުންގެންދާ ދަރިވަރުންނަށްކަމަށެވެ.

މި ފޯރަމްގައި ބައިވެރިވާ ފަރާތްތަކުގެ އަތުން ރަޖިސްޓްރޭޝަން ފީއެއް ނެގުމަށް ވަނީ ހަމަޖެހިފައެވެ. އެގޮތުން އިންސްޓިޓިއުޓްގެ މެމްބަރުން ފީގެ ގޮތުގައި 1500 ރުފިޔާ ދައްކަން ޖެހޭއިރު، މެމްބަރުން ނޫން ފަރާތްތަކުން 2000 ރުފިޔާ އަދި ދަރިވަރުން 750 ރުފިޔާ ދައްކަން ޖެހޭނެއެވެ.