މާލެ ސަރަހައްދުން ކުނި ވަކިކޮށްގެން ނެރެނީ 30 އިންސައްތަ ގޭބިސީން: މިނިސްޓަރ ޝައުނާ

މާލެސަރަހައްދުން ކުނި ވަކިކޮށްގެން ނެރެނީ 30 އިންސައްތަ ގޭބީސީން ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ ވިދާޅުވެއްޖެއެވެ.

މުއައްސަސާތަކުން ކޮންގްރެސްއަށް މައުލޫމާތުދެއްވަމުން މިނިސްޓަރ ވިދާޅުވީ، ރަށްތަކުން ކުނި ވަކިކޮށްގެން ނެރޭ ނިސްބަތަށް ބަލާއިރު ރަނގަޅު ކަމަށެވެ. ކުނި ވަކިކޮށްގެން ނެރޭ ނިސްބަތަށްބަލާއިރު ބޭނުންވާ އަމާޒަށް އަދި ވާސިލް ނުވިނަމަވެސް ރަނގަޅު ނަތީޖާއެއް ފެނަމުންދާ ކަމަށްވެސް ވިދާޅުވިއެވެ.  

ގްރީން ޓެކްސްއިން ލިބޭ އާމްދަނީން ބައެއް، ކުނި މޭންޖް ކުރުމަށް ކައުންސިލްތަކާ ހަވާލުކުރުމަށް ނިންމާފައިވާކަމަށްވެސް ވިދާޅުވިއެވެ.

މާފުށީ ކުނިގޮނޑު ސާފުކުރުމުގެ މަސައްކަތް ވެމްކޯއިން މިދިޔަ ހަފުތާގައި ފަށާފައިވާ ކަމަށާއި، މި މަސައްކަތް އިތުރު ސަރަހައްދުތަކުގައި ވެސް ކުރިއަށްދާ ކަމަށް ޝައުނާ ފާހަގަކުރެއްވިއެވެ.

މުޅު ދުނިޔެއަށް ދިމާވެފައިވާ އެންމެ ބޮޑު މައްސަލައަކީ މޫސުމީ ބަދަލުތަކުގެ ސަބަބުން ލިބޭ ގެއްލުންތައްކަން ފާހަގަކުރައްވައި ޝައުނާ ވިދާޅުވީ، ކުރިއަތް އޮތް 10 އަހަރު ގެއްލުންތައް އިތުރުވާނެކަމަށް އެކި ފޯރަމްތަކުގައި ވާހަކަދައްކާ ސައިންސްވެރިން ލަފާކުރާ ކަމަށެވެ.

އިންތިޚާބާ މޫސުމާ ގުޅުމެއްނެތޭ ބައެއް މީހުން ބުންޏަސް، އެއީ ދޮގެއް ކަމަށް ޝައުނާ ވިދާޅުވިއެވެ. އިންތިޚާބުތަކަށް ކެމްޕޭންކުރާއިރު އެންމެ ބޮޑަށް އިވޭ ވާހަކައަކީ މޫސުމަށް އަންނަ ބަދަލުތަކުގެ ވާހަކަ (އުދަ އެރުމާއި ރަށްގިރުމާއި ފެންބޮޑުވުމުގެ ވާހަކަތައް) ކަމަށް ޝައުނާ ވިދާޅުވިއެވެ.

މޫސުމީ ބަދަލުތަކަށް މީހުން ހޭނުމަށް މަސައްކަތްތައްކުރުމަށް ހަމަޖެހިފައިވާ ކަމަށްވެސް ވިދާޅުވިއެވެ.

މިހާތަނަށް 79 ސަރަހައްދެއް ހިމާޔަތްކޮށްފައިވާއިރު 55 އިންސައްތަ ސަރަހައްދަކީ އެމްޑީޕީގެ ވެރިކަމުގައި ހިމާޔަތްކުރެވިފައިވާ ތަންތަން ކަމަށް ވެސް ޝައުނާ ވިދާޅުވިއެވެ .

ޝައުނާ އިތުރަށް ވިދާޅުވީ، ރިޔާސީ ދައުރުނިމޭއިރު 51 މެގަވޯޓްގެ ސޯލާ ކެޕޭސިޓީ އިންސްޓޯލް ކުރެވޭނެކަމަށް ލަފާކުރެވޭ ކަމަށެވެ. އަދި 41.8 މެގަވޯޓްގެ ސޯލާ ޕީވީގެ ޓެންޑަރިންނަށް ތައްޔާރުވަމުންދާ ކަމަށެވެ.

މުޅި ރާއްޖޭގެ 120 ސޯލާ ޕީވީ އިންސްޓޯލް ކުރެވޭނެ ކަމަށް ވަނީ ލަފާ ކުރައްވާފައެވެ.