މިސަރުކާރުން ކޯލިޝަން ދަމަހައްޓަނީ ކޮންމެ ބަޔަކަށްވެސް ލިބޭ ބައި ބޮޑުކުރަން: ޔާމީން
މިހާރުގެ ކޯލިޝަނަކީ އިޚްލާސްތެރި ކޯލިޝަނެއް ނޫންކަމަށް ޔާމީން ވިދާޅުވި
ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަރަށް ފަޚުރުވެރިކަމާއެކު ވިދާޅުވާ ވާހަކައަކީ މިސަރުކާރުގެ ކޯލިޝަން ނޫނީ ދެމެހެއްޓުނު ކޯލިޝަނެއް ނެތް ވާހަކަކަމަށާ،އި ނަމަވެސް އެއީ ކަން އޮތްގޮތްތޯ ސުވާލުކުރައްވައި، ސަރުކާރު ކޯލިޝަނަށް އިދިކޮޅު ޕީޕީއެމް/ޕީއެންސީގެ ކޯލިޝަންގެ ލީޑަރ އަދި ކުރީގެ ރައީސް އަބްދުﷲ ޔާމީން ފާޑުވިދާޅުވެއްޖެއެވެ.
ކުރިޔަށް އޮތް ރިޔާސީ އިންތިޚާބުގައި ޕީޕީއެމް/ޕީއެންސީ ކޯލިޝަންގެ ފަރާތުން ވާދަކުރައްވާ ކެންޑިޑޭޓަކީ އެމަނިކުފާނުކަމަށް ކަނޑައަޅައި، ޓިކެޓް އެރުވުމަށް ބޭއްވި "ހަވާލޭ ވަތަން" ނަމުގައި ބޭއްވި ޖަލްސާގައި ވާހަކަދައްކަވަމުން ޔާމީން ވަނީ، މިހާރުގެ ކޯލިޝަނަކީ އިޚްލާސްތެރި ކޯލިޝަނެއް ނޫންކަމަށް ވިދާޅުވެފައެވެ. ޔާމީން ވަނީ އެންމެ ކައިރިން ބުރަކައްޓަށާއި އަރިކައްޓަށް ހަންޖަރު ޖަހައިގެން ކޯލިޝަން ދަމަހައްޓާނީ ކިހިނެއްތޯ ސުވާލު އުފައްދަވާފައެވެ.
ޔާމީން ވިދާޅުވީ ރައީސް ސޯލިހު ކޯލިޝަން ދަމަހައްޓަވަނީ ރަށްތަކާއި ފަޅުތަކާއި ސެޓްލްމަންޓްތަކާއި ވެންޓިލޭޓަރުތައް އަތްޕުޅުމައްޗަށް ލައްވައިގެންކަމަށެވެ.
ޔާމީން ވިދާޅުވީ ރާއްޖޭގެ މިނިވަންކަމެއް އިސްތިގުލާލެއް ނެތްކަމަށެވެ. ނަމަވެސް މިކަންކަމާމެދު އަޑުއުފުލައި ވާހަކަދައްކަން ކެރޭ ސިޔާސީ ލީޑަރެއް ނެތްކަމަށެވެ.
އެހެންކަމުން އެކަން ކުރަންޖެހެނީ ޕީޕީއެމް/ޕީއެންސީ ކޯލިޝަނުންކަމަށެވެ. ގައުމުގެ ބަހާތައް ހިމާޔަތްކުރަން ބޭނުންވާ އިޚްލާސްތެރި ލީޑަރެއް ނެތްކަމަށާއި ކޮންމެ ލީޑަރަކުވެސް ބަލަނީ މިވެނި މީހަކު ރައީސްކަމަށް އައުމުން އެމީހަކަށް ލިބޭނީ ކޯއްޗެއްތޯ ކަމަށެވެ.
ޔާމީން ވިދާޅުވީ އެމަނިކުފާނު ކޯލިޝަން ހަދާނެކަމަށް ވިދާޅުވެފައިވާނެކަމަށާއި، ކޯލިޝަން ހެދިނަމަވެސް ދިވެހިންގެ މުދަލާއި ދިވެހިންގެ ފަޅުރަށްތައް ހިތުހުރި ގޮތަކަށް ބެހޭނެކަމަށް ގަބޫލުފުޅުނުކުރައްވާކަމަށެވެ.
