އެމްޑީޕީ ކޮންގްރެސްގައި ބައިވެރިވުމަށް 200 އަށްވުރެ ގިނަ މީހުން މާލެ އައިސްފި
އެމްޑީޕީގެ 4 ވަނަ ކޮންގްރެސް އޮންނާނީ މި މަހުގެ 19ން 21ށް
އެމްޑީޕީ ކޮންގްރެސްއަށް މީހުން މާލެ އައުން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ކޮންގްރެސްގައި ބައިވެރިވުމަށް 200 އަށް ވުރެ ގިނަ މީހުން މާލެ އައިސްފިއެވެ.
ކޮންގްރެސް އަށް ރާއްޖޭގެ އެކި ކަންކޮޅުތަކުން އައި މީހުންނަށް މަރުހަބާ ކިޔުމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް އާއި އެމްޑީޕީ ޕީޖީ ގްރޫޕްގެ އިސް މެމްބަރުން ވަނީ އެއް ނަންބަރު ޖެޓީއަށް ވަޑައިގެންފައެވެ.
ރާއްޖެއެމްވީއާއި ވާހަކަ ދެއްކި ބައެއް މީހުން ބުނީ ކޮންގްރެސްއާއި މެދު ކުރެވޭ އުންމީދު ބޮޑުކަމަށެވެ. އަދި ކޮންގްރެސް އަށް ހުށަހަޅާފައިވާ ޤަރާރަށް ތާއީދު ކުރާ ކަމަށް ވެސް އެކަކު ވަނީ ބުނެފައެވެ.
އެމްޑީޕީގެ 4 ވަނަ ކޮންގްރެސް އޮންނާނީ މި މަހުގެ 19ން 21އަށެވެ.
އެ ޕާޓީން ބުނި ގޮތުގައި މި ކޮންގްރެސް ކުރިއަށްދާނީ ސޯޝަލް ސެންޓަރުގައެވެ. ކޮންގްރެސް ފެށުމުގެ ގޮތުން 19 ވަނަ ދުވަހުގެ ހަވީރު، އެމްޑީޕީ އިން ފާއިތުވި 17 އަހަރު ތެރޭގައި ހޯދާފައިވާ ކާމިޔާބީތައް ދައްކާލުމުގެ ހަރަކާތެއް ކުރިއަށްދާނެ ކަމަށް އެޕާޓީން ބުނެފައިވެއެވެ.
އަދި މިއީ މިހާތަނަށް އިންތިޚާބުވެފައިވާ އެންމެ ގިނަ ފަރާތްތައް ބައިވެރިވާނެ ކޮންގްރެސް ކަމަށް އެމްޑީޕީން ބުންޏެވެ. އެގޮތުން، ޤައުމީ މަޖިލީޙުގެ މެމްބަރުންނާއި ގޮފިތަކުގެ ރައީސުންނާއި ޕާޓީގެ ކައުންސިލަރުންނާއި ދާއިރާތަކުގެ ރައީސުންނާއި މޭޔަރުން މީގެ ތެރޭގައި ހިމެނެއެވެ.
އެމްޑީޕީގެ ހަތަރު ވަނަ ކޮންގްރެސްގައި މައިގަނޑު ތިން ކަމެއް ނިންމަން ވަނީ ތާވަލު ކޮށްފައެވެ. އެއީ އެ ޕާޓީގެ ގަވާއިދަށް ގެންނަ ބަދަލުތައް ފާސްކުރުމާއި ޤާނޫނު އަސާސީއަށް ގެންނަން ފެންނަ ބަދަލުތަކާ ގުޅޭގޮތުން މަޝްވަރާ ކުރުމާއި ވެރިކަމުގެ ނިޒާމަށް ގެންނަން ފެންނަ ބަދަލުތަކާ ގުޅޭ ގޮތުން ކޮންގްރެސްއަށް ހުށަހަޅައި މަޝްވަރާ ކުރުމެވެ. ވެރިކަމުގެ ނިޒާމަށް ގެންނަ ބަދަލާ ގުޅޭ ބަހުސް އަކީ އެމްޑީޕީގެ ރައީސް، ރައީސް މުޙައްމަދު ނަޝީދު ހުށަހަޅުއްވާ ކަމެއް ކަމަށް އެމްޑީޕީން ބުންޏެވެ.
މި ކޮންގްރެސްގައި އެމްޑީޕީގެ މެމްބަރުންނާއި ސަރުކާރުގެ މުއައްސަސާތަކާ ބައްދަލުކޮށް، ރަށްތަކުގެ ތަރައްގީއަށް ކުރާ މަސައްކަތްތަކާއި ކުރިއަށް ހުރި އިންތިޚާބުތައް ކާމިޔާބު ކުރުމަށް ކުރަމުން އަންނަ މަސައްކަތްތަކާ ގުޅޭ ގޮތުން މަޝްވަރާ ކުރުމަށް ވެސް ވަނީ ހަމަޖެހިފައެވެ. މިއީ މިފަދަ ފުރުސަތެއް ލިބޭ ފުރަތަމަ ކޮންގްރެސްއެވެ.
މި ކޮންގްރެސްގައި އޮބްޒަރވަރުންގެ ގޮތުގައި ބައިވެރިވުމަށް އެމްޑީޕީގެ އިސް ބޭފުޅުންގެ އިތުރުން ރާއްޖޭގެ ސިޔާސީ އެހެން ޕާޓީތަކަށް ވެސް ދައުވަތު އަރުވަން ވަނީ ނިންމާފައެވެ.
