ނިޒާމާ ގުޅޭ މަޝްވަރާ ކުރަން ފުރިހަމަ ފުރުސަތު ލިބޭނެކަމުގެ ޔަގީންކަން އަރުވަން: ފައްޔާޒު

ވެރިކަމުގެ ނިޒާމާއި ގުޅޭގޮތުން އެމްޑީޕީގެ ކޮންގްރެސްގައި މަޝްވަރާ ކުރުމަށް ފުރިހަމަ ފުރުސަތު ލިބިގެންދާނެ ކަމުގެ ޔަގީންކަން އެ ޕާޓީގެ ޗެއަރޕާސަން ފައްޔާޒު އިސްމާއިލް ދެއްވައިފިއެވެ.

ހުކުރު ދުވަހުގެ ރޭ ފެށި އެމްޑީޕީގެ ހަތަރުވަނަ ކޮންގްރެސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ފައްޔާޒު ވިދާޅުވީ އެމްޑީޕީއަކީ މި ޤައުމުގައި ބަސްބުނުމުގެ މިނިވަންކަން ހޯދައިދިން ޕާޓީ ކަމަށާއި ޚިޔާލު ތަފާތުވި ނަމަވެސް އެ ޕާޓީން އަބަދުވެސް ކަންކަން ރަނގަޅު ކުރުމަށް ވަކާލާތުކުރާނެ ކަމަށެވެ. އަދި އެމްޑީޕީއަކީ އެތެރޭގެ ކަންކަން ގޯސްކޮށް ހުރި ނަަމަވެސް އެކަންކަމާ ގޫޅޭގޮތުން މިނިވަންކަމާއެކު މަޝްވަރާ ކުރުމުގެ ފުރުސަތު ފަހިކޮށްދޭ ޕާޓީއެއް ކަމަށް އޭނާ ވިދާޅުވިއެވެ.

ފައްޔާޒު ވިދާޅުވީ ވެރިކަމުގެ ނިޒާމުގެ ވާހަކަތަކަކީ ވެސް އަބަދުވެސް ދެއްކޭނެ ވާހަކަތައް ކަމަށާއި ދެކޮޅަށްވެސް ވާހަކަދައްކާނެ މީހުން ތިބޭނެ ކަމަށެވެ. މިފަދަ ކަންކަމުގައި ޚިޔާލު ތަފާތުވިނަމަވެސް ވާހަކަތައް ދެކެވި، އެކަމާ ގުޅޭ މަޝްވަރާތައް ފުރިހަމަ މިނިވަންކަމާއެކު ދެއްކުމުގެ ފުރުސަތު އެމްޑީޕީ އިން ލިބިގެންދާނެ ކަމަށް ވެސް ވިދާޅުވިއެވެ.

އެމްޑީޕީގެ އެންމެ ބޮޑު ކާމިޔާބީއަކީ ސިޔާސަތުތަކާއި މީހުންގެ ފިކުރަށް ގެނައި ބަދަލުތައް ކަމަށާއި ޤައުމު ތަރަައްގީ ކުރެވޭނީ މިނިވަން ކަމާއެކު ފިކުރު ކުރުމުގެ ފުރުސަތު ލިބިގެން ކަމަށް ވެސް ފައްޔާޒު ވިދާޅުވިއެވެ.

ފައްޔާޒު ވިދާޅުވީ އެމްޑީޕީ އިން ރާއްޖޭގައި މިނިވަންކަމާއެކު ޚިޔާލުފާޅު ކުރުމުގެ ފުރުސަތު ފަހިކޮށްދިންނަމަވެސް އަދުލުވެރި، އިންސާފުވެރި، ހުރިހާ ރައްޔިތުންނަށް ފުރުސަތުތައް ފަހިވެފައިވާ ޤައުމަކަށް ހެދުމަށް ކުރަން ޖެހޭ މަސައްކަތްތައް އެބަހުރި ކަމަށެވެ. އެ މަސައްކަތް އެމްޑީޕީ އިން އަބަދުވެސް އެކި ޚިޔާލުތަކާއި ފިކުރުތަކާއެކު ކުރަމުންގެންދާނެ ކަމަށް ވެސް އޭނާ ވިދާޅުވިއެވެ.

މިއަދު އެމްޑީޕީގެ ވެރިކަމެއްގައި މިނިވަންކަމާއި އަދުލުވެރިކަމާއެކު ކަންކަން ކުރި ނަމަވެސް ރާއްޖޭގައި އެކަންކަން ހަރުލާފައި ނެތްކަން ފާހަގަކުރައްވައި ފައްޔާޒު ވިދާޅުވީ އެކަން ރަނގަޅު ކުރުމަށް ކުރަން ޖެހޭ ކަންކަން ކުރަން ދެބަސްވުންތަކުގެ ތެރެއިން ހަނދާން ނައްތާލައިގެން ނުވާނެ ކަމަށެވެ. މިކަން ހަނދާން ނައްތާލައިފިނަމަ މުޅި ޤައުމަށް ވެސް ނިކަމެތިކަން ލިބޭނެ ކަމަށް ފައްޔާޒު ވިދާޅުވިއެވެ.

އެމްޑީޕީ ބޭނުންވާ ގޮތަށް ޤައުމުގައި އިންސާފުވެރިކަމާއި އަދުލުވެރިކަން ޤާއިމްކުރަން ކުރިއަށް އޮތް ރިޔާސީ އިންތިޚާބާއި މަޖިލިސް އިންތިޚާބުވެސް ކާމިޔާބު ކުރަން ޖެހޭ ކަމަށާއި އެކަން ކުރަން ޗެއަރޕާސަންގެ ހައިސިއްޔަތުން ކުރެވެން ހުރި ހުރިހާ ކަމެއް ކުރައްވާނެ ކަމަށް ވެސް ފައްޔާޒު ވިދާޅުވިއެވެ.