އެމްޑީޕީގެ ކޮންގްރެސް ފަސްކޮށްދިނުމަށް އެދިއްޖެ
18 އޯގަސްޓު 2022 | ބުރާސްފަތި 11:14އެ މަންދޫބުން ބައިވެރިވެއްޖެނަމަ ކޮންގްރެސްގެ ގާނޫނީ ހައިސިއްޔަތާމެދު ސުވާލު އުފެއްދުމަށް ޖާގަދެވިގެންދާނެ
އެމްޑީޕީގެ ގައުމީ މަޖިލީހުގެ ބައްދަލުވުމުގެ ތެރެއިން | އެމްޑީޕީ
އެމްޑީޕީގެ ކޮންގްރެސް ފަސްކޮށްދިނުމަށް މެދުހެންވޭރު ދާއިރާގެ މެންބަރު އަލީ އާޒިމް އެދިވަޑައިގެންފިއެވެ.
އެމްޑީޕީގެ ޗެއަރޕަރސަން ފައްޔާޒް އިސްމާއީލަށް ފޮނުއްވި ސިޓީގައި އާޒިމް ވިދާޅުވީ، ޕާޓީގެ އަސާސީ ގަވާއިދުގައި ބަޔާންކުރެވިފައިވާ ގޮތުގެ މަތިން ޕާޓީގެ އެންމެ އިސް ގުނަވަނަކީ ކޮންގްރެސް ކަމަށާއި، ކޮންގްރެސްގެ ކޮމްޕޮސިޝަން އެކުލަވާލެވިފައިވާގޮތަށް ރިޔާއަތްކުރާއިރު ގޮފިތަކުގެ ރައީސުންނަށް ކޮންގްރެސްގައި ވޯޓިންގ ޑެލިގޭޓުންގެގޮތުގައި ތަމްސީލުކުރުމުގެ ފުރުސަތު ދެވިފައިވާކަމަށެވެ.
އެގޮތުން ބަޔާންކުރެވުނު ގޮފިތަކުގެ ހިންގާ ކޮމިޓީ އެކުލަވާލަން ޖެހޭނީ ގޮފި ގަވާއިދުގައި ކަނޑައެޅިފައިވާ ހަމަތަކާއި އުސޫލުތަކުގެ ތެރެއިން އިންތިޚާބެއް ބޭއްވުމަށްފަހު ކަމަށާއި، ކޮންގްރެސްގައި ގޮފި ތަމްސީލުކުރާ ގޮފީގެ ރައީސް ނުވަތަ ނައިބު ރައީސް ވާންޖެހޭނީ ބަޔާންކުރިގޮތަށް އިންތިޚާބުވެފައިވާ ފަރާތަކަށްކަން ސާފުކޮށް އެނގޭކަމަށްވެސް ސިޓީގައިވެއެވެ.
ކަން އެހެން އޮތްއިރު ހުކުރު ދުވަހު ބޭއްވުމަށް ހަމަޖެހިފައިވާ ކޮންގްރެސް ގޮފިތަކުގެ ނޮމިނޭޓްކޮށްފައިވާ ގިނަ މަންދޫބުންނަކީ ގޮފި ގަވާއިދާ އެއްގޮތަށް އިންތިޚާބުވެފައިވާ ފަރާތްތައް ނޫންކަމަށާއި، އަދި ގޮފިތަކުގެ ކޮންގްރެސްގައި ތަމްސީލުކުރާ ފަރާތްތަކުގެ މައުލޫމާތު މިވަގުތާއި ހަމައަށްވެސް ހިއްސާކޮށްފައިނުވާތީ، އެ ފަރާތްތައް ކުރިއަތް އޮތް ކޮންގްރެސްގައި ބައިވެރިވެއްޖެނަމަ ކޮންގްރެސްގެ ގާނޫނީ ހައިސިއްޔަތާމެދު ސުވާލު އުފެއްދުމަށް ޖާގަދެވިގެންދާނެ ކަމަށް ދެކެވަޑައިގަންނަވާކަމަށް ވެސް އާޒިމް ވިދާޅުވިއެވެ.
ހުކުރު ދުވަހު ބާއްވާ ކޮންގްރެސްއަށް ނޮމިނޭޓްކޮށްފައިވާ ގޮފިތައް ތަމްސީލުކުރާ މަންދޫބުންގެ ގާނޫނީ ހައިސިއްޔަތާމެދު، ޕާޓީއަށް ނިސްބަތްވާ ގިނަ މެމްބަރުގެ މެދުގައި ކަންބޮޑުވުން ފާޅުކުރަމުންދާތީ، ގޮފިތަކުން ކޮންގްރެސްގައި ބައިވެރިވާ ރައީސުން ނުވަތަ ނައިބު ރައީސުންގެެ ގާނޫނީ ހައިސިއްޔަތު ކަށަވަރުކުރުމަށްފަހުގައި ނޫނީ ކޮންގްރެސް ކުރިއަށް ނުގެންދިޔުމަށް ވަނީ އެދިފައެވެ.
ކޮންގްރެސްއަށް ގޮފިތަކުން ހުށައެޅިފައިވާ މަންދޫބުން އިންތިޚާބުކުރިގޮތާއި އެ މަންދޫބުންގެ ތަފްސީލު ހިމެނޭ ލިސްޓެއްވެސް ހިއްސާ ކޮށްދިނުމަށް ވަނީ އެދިފައެވެ.
