މި ސަރުކާރަށް ދެވަނަ ދައުރެއް ދީފިނަމަ، ރައީސް ނަޝީދު ޖަލަށްލާފާނެ: އާދަމް ޝަރީފް
ސަރުކާރުގެ ނުފޫޒު ގަދަ، އަސާސްތައް ޕެރަލައިޒްކޮށްފާނެ: އާދަމް ޝަރީފް
އާދަމް ޝަރީފް
މި ސަރުކާރަށް ދެވަނަ ދައުރެއް ދީފި ނަމަ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ޖަލަށް ލާފާނެ ކަމަށް ބެލެވޭ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބު ރައީސް އާދަމް ޝަރީފް އުމަރު ވިދާޅުވެއްޖެއެވެ.
ރައްޔިތުން މަޖިލީހުގެ ޖަލްސާގައި ވާހަކަދައްކަވަމުން މެމްބަރު ޝަރީފް ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ސަރުކާރުން މިހާރު އަމަލުކުރަމުންދާ ގޮތުން އެމްޑީޕީގެ ތެރެއިން ކުރީގެ ރައީސް ނަޝީދު ބާކީވަމުންދާކަމަށް ވެސް އޭނާ ވަނީ ވިދާޅުވިއެވެ. އަދި ނުފޫޒު އޮތުމުގެ ސަބަބުން މުއައްސަސާތަކަށް ސަރުކާރުން ނުފޫޒުފޯރުވަފާނެ ކަމަށް ބެލެވޭ ކަމަށް ވެސް އޭނާ ވިދާޅުވިއެވެ.
ރާއްޖޭގެ ކަންކަން ރަނގަޅުކުރަން ވާހަކަދައްކާ މީހުން ހައްޔަރުކޮށް ކަސްތޮޅު އެޅުވޭނެ ގޮތެއް ހޯދަން ސަރުކާރުން މަސައްކަތްކުރައްވާ ކަމަށް ވެސް އޭނާ ތުހުމަތުކުރެއްވިއެވެ.
މީގެ އިތުރުން ރައްޔިތުންގެ މަޖިލީހުގައި ވެސް ސަރުކާރުގެ ނުފޫޒު ގަދަ ކަަމަށާއި އެކަމުގެ ސަބަބުން މަޖިލީހުން ސަރުކާރު ޖަވާބުދާރީވުމަށް ނުކުޅެދިފައިވާކަމަށް އޭނާ ވިދާޅުވިއެވެ. އާދަމް ޝަރީފް ވަނީ މަޖިލީހުގެ ކޮންޓްރޯލް ސަރުކާރަށް އޮތުމަކީ މިނިވަން މުއައްސަސާތައް ސަރުކާރުގެ މުށުތެރެއަށް ލުމަށް ލިބޭ ފުރުސަތެއް ކަމަށް ވެސް ވިދާޅުވެފައެވެ. އެހެންކަމުން އޭގެ ނޭދެވޭ އަސަރު ކުރިއަށް އޮތް ރިޔާސީ އިންތިޚާބަށް ވެސް ކުރާނެ ކަމަަށް އޭނާ ވިދާޅުވިއެވެ.
ޝަރީފް ވަނީ މި ސަރުކާރަށް ވަރަށް ބޮޑަށް ފާޑުވިދާޅުވެފައެވެ. އަދި ސަރުކާރު ޖަވާބުދާރީ ކުރުވާނެ މާހައުލެއް ރާއްޖޭގައި ނެތް ކަމަށާއި އިދިކޮޅު ހަރަކާތްތަކަށް ފުރުސަތު ނެތް ކަމަށް ވެސް އޭނާ ވަނީ ވިދާޅުވިއެވެ.
