މަޖިލީހުގެ ރިޔާސަތެއް އޮތްތޯ މިހާރު ބަލަން އެބަ ޖެހޭ: ޖާބިރު

ރައްޔިތުންގެ މަޖިލީހުގެ ރިޔާސަތެއް އޮތްތޯ މިހާރު ސުވާލު އުފައްދަން ޖެހޭކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.

ރައްޔިތުންގެ މަޖިލީހުގެ 3 ވަނަ ދައުރުގެ ފުރަތަމަ ޖަލްސާ އަށް މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްތްރަކްޗަރ މުހައްމަދު އަސްލަމް އާއި ސުވާލުކުރުމަށް މެމްބަރުންނަށް ދެއްވި ފުރުސަތުގައި ޖާބިރު ވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަކީ ބޮޑު ވަޒީރުގެ ގޮތުގައި ސިފަކުރައްވާފައެވެ. އަދި މަޖިލީހުގެ ރައީސްގެ ގޮތުގައި ރައީސް ނަޝީދަށް މުޚާތަަބުކުމުގެ ބަދަލުގައި ރައީސް ނަޝީދަށް "ބޮޑުވަޒީރު"ގެ ގޮތުގައި ޖާބިރު މުހާތަބުކުރައްވަން ފެށްޓެވުމުން ރައީސް ނަޝީދު ވަނީ ޖާބިރުގެ ވާހަކަފުޅު ހުއްޓުވާ މަޖިލީހުގެ ގަވާއިދާއި އެއްގޮތަށް ރިޔާސަތަށް މުހާތަބުކުރެއްވުމަށް އެދިވަޑައިގަންނަވާފައެވެ.

ރައީސް ނަޝީދު އަށް ނިސްބަތްކޮށް ޖާބިރު "ބޮޑުވަޒީރު"ގެ ގޮތުގައި މުޚާތަބުކުރައްވާ ވާހަކަދައްކަވާފައި މި ވަނީ ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކުރުމަށް ރައީސް ނަޝީދު މަސައްކަތްކުރައްވަމުންދާ ދަނޑިވަޅެއްގައެވެ. އެގޮތުން ރާއްޖޭގެ ވެރިކަން ބަރުލަމާނީ ނިޒާމަކަށް ބަދަލުކުރުމުގެ ގޮތުން ޤާނޫނު އަސާސީ އަށް އިސްލާހު ގެނައުމަށް އެމްޑީޕީގެ ކޮންގްރެސް އަށް ރައީސް ނަޝީދު ވަނީ ހުށަހަޅުއްވާފައެވެ. އަދި އެ މަސައްކަތް ކާމިޔާބުކުރައްވާނެ ކަމަށް ރައީސް ނަޝީދު ގެންދަވަނީ ވިދާޅުވަމުންނެވެ.

މަޖިލީހުގައި މަޖިލީހުގެ ރިޔާސަތަށް ނިސްބަތްކޮށް "ބޮޑުވަޒީރު"ގެ ގޮތުގައި މުޚާތަބު ނުކުރުމަށް ރައީސް ނަޝީދު ޖާބިރު އަށް ދެންނެވުމުން ޖާބިރު ވަނީ މަޖިލީހުގެ ރިޔާސަތެއް އޮތްތޯ މިހާރު ބަލަން ޖެހޭ ކަމަށް ވެސް ވިދާޅުވެފައެވެ. އެހެންނަމަވެސް ޖާބިރު އެފަދައިން ވިދާޅުވި ސަބަބެއް އޭނާ ހާމައެއް ނުކުރައްވައެވެ.

މީގެ ކުރިން މަޖިލީހުގައި ތަކުރާރުކޮށް އެކި ފަހަރު މަތިން ޖާބިރު ވަނީ ރައީސް ނަޝީދަށް ފާޑުވިދާޅުވެފައެވެ. އަދި އެމަނިކުފާނު މަޖިލީހުގައި ކުރައްވާ މަސައްކަތްތަކަށް ވެސް ފާޑު ވިދާޅުވެފައިވެއެވެ. އެގޮތުން ޖާބިރު ރައީސް ނަޝީދަށް މީގެ ކުރިން ފޮނުއްވި ސިޓީއެއްގައި، ކުރީގެ ރައީސް މުހައްމަދު ނަޝީދަކީ މަޖިލީހުގެ ރައީސްގެ މަގާމުގެ ޒިންމާ އާއި މަސްއޫލިއްޔަތު އަދާ ކުރެއްވުމުގެ ގާބިލްކަން ނެތް ބޭފުޅެއް ކަމަށް ޖާބިރު ވިދާޅުވެފައިވެއެވެ.