އިނގިރޭސި ޕްރިމިއަރ ލީގުގައި ކުޅެމުން އަންްނަ މެންޗެސްޓަރ ޔުނައިޓެޑުން ގަންނަން އުޅޭ ކަމަށް ބިލިއަނަރު އީލޮން މަސްކް ބުނެފިއެވެ.

ދާދި ފަހުން އީލޮން މަސްކް ވަނީ ސޯޝަން މީޑިއާ ޕްލެޓްފޯމެއް ކަމަށްވާ ޓުވިޓާ ގަންނަން ނިންމާފައެވެ. ޓުވިޓާ ގަތުމަށް އޭނާ ހުށަހެޅި ހުށަހެޅުން ޤަބޫލުކޮށް، އެއްބަސްވުުގައި ވެސް ވަނީ ސޮއިކޮށްފައެވެ. ނަމަވެސް ފަހުން އީލޮން މަސްކްގެ ވާހަކަތައް ބަދަލުވެ އޭނާ ވަނީ ޓުވިޓާ ނުގަންނަން ނިންމާފައެވެ. އެކަމާ ގުޅިގެން ޓުވިޓާއިން ވަނީ އީލޮން މަސްކް އެއްބަސްވުމާ ޚިލާފުވި ކަމަށް ބުނެ އޭނާއާ ދެކޮޅަށް ދައުވާ ކޮށްފައެވެ.

ޓުވިޓާއި ކުރި ސިޔާސީ ޓުވީޓަކަށް ދިން ރިޕްލައިއެއްގައި ބިލިއަނަރު އީލޮން މަސްކް ވަނީ އޭނާ މެންޗެސްޓަރ ޔުނައިޓެޑު ގަންނަން އުޅޭ ކަމަށް ބުނެފައެވެ. އޭނާ ކުރި ޓުވީޓެއް ބުނީ އޭނާ ތާއިދުކުރަނީ ރިޕަބްލިކަން ޕާޓީގެ އެއް ބައި މީހުންނަށް ކަމަށާއި، އަދި ޑިމޮކްރަޓިކް ޕާޓީގެ އެއް ބައި މީހުންނަށް ކަމަށެވެ. އެ ޓުވީޓަށް ދިން ރިޕްލައިއެއްގައި ދެން އޭނާ ބުނީ މެންޗެސްޓަރ ޔުނައިޓެޑުން ގަންނަން އުޅޭ ވާހަކައެވެ.

އީލޮން މަސްކްކީ ފޯބްސްގެ އެންމެ ފަހުގެ ތަފާސްހިސާބުތައް ދައްކާގޮތުން ދުނިޔޭގެ އެންމެ މުއްސަނދި މީހާއެވެ. އޭނާގެ މާލީ ހާލަތައް ބަލާއިރު، އޭނާ އަށް މެންޗެސްޓަރ ޔުނައިޓެޑު ގަތުމުގެ ޤާބިލްކަން ހުންނާނެއެވެ. އޭނާގެ މިލްކިއްޔާތުގައި މިވަގުތު ވެސް 265.7 ބިލިއަން އެމެރިކާ ޑޮލަރު އެބަ ހުއްޓެވެ.

މިވަގުތު މެންޗެސްޓަރ ޔުނައިޓެޑުގެ ވެރިންނަކީ އެމެރިކާގެ ގްލޭޒާ އާއިލާއެވެ. އެ އާއިލާއިން މެންޗެސްޓަރ ޔުނައިޓެޑު ގަނެފައިވަނީ 2005 ވަނަ އަހަރުއެވެ. އެއާއިލާއިން ޔުނައިޓެޑު ގަނެފައިވަނީ ގާތް ގަނޑަކަށް 1000 މިލިއަން ޑޮލަރަށެވެ.