ވުލްވްސްބާގް ބަލިކޮށް ބަޔާނުން އެއްވަނައަށް

ޖަރުމަނު ލީގުގައި ވުލްވްސްބާގް ބަލިކޮށް ޗެމްޕިއަން ބަޔާން މިއުކިނުން އެއްވަނަ އަށް ޖެހިލައިފިއެވެ.

ލީގުގައި ކުޅުނު ފުރަތަމަ ފުޓުބޯޅަ މެޗުގައި ބަޔާނުން ވަނީ އެއިންޓްރަކްޔް ފްރޭންކްފާޓާ ދެކޮޅަށް ކުޅެ މޮޅުވެފައެވެ. ދެ ވަނަ މެޗުގައި އާދިއްތަ ދުވަހުގެ ރޭ ވުލްވްސްބާގުގެ މައްޗަށް ބަޔާނުން ކުރި ހޯދީ 2-0 އިންނެވެ. ބަޔާންގެ ދެ ލަނޑު ވެސް އެ ޓީމުން ޖެހީ މެޗުގެ ފުރަތަމަ ހާފުގައެވެ.

މެޗު ފަށައިގެން 20 ވަނަ މިނެޓުގައި ބަޔާންގެ ސަޑިއޯ މާނޭ ވަނީ ލަނޑެއް ޖަހައިފައެވެ. ނަމަވެސް ވީއޭއާރުން ނިންމީ އެއީ އޮފްސައިޑު ލަނޑެއް ކަމަށެވެ. ބަޔާނަށް ލީޑު ނަގައިދިން ލަނޑު 33 ވަނަ މިނެޓުގައި ޖެހީ ޖަމާލް މުސިއާލާއެވެ. ފުރަތަމަ ހާފު ނިމުމުގެ ކުރިން 44 ވަނަ މިނެޓުގައި ބަޔާންގެ ދެ ވަނަ ލަނޑު ޖެހީ ތޯމަސް މުލާއެވެ.

ލީގުގައި ކުޅުނު ދެ މެޗުން މޮޅުވެ ލިބުނު ހަ ޕޮއިންޓާއެކު ބަޔާން އޮތީ އެއް ވަނަ މަގާމުގައެވެ. ދެ ވަނަ މަގާމުގައި އޮތް ބްރޫޝިއާ ޑޯޓްމުންޑަށް ވެސް ލިބެނީ ދެ މެޗުން ހަ ޕޮއިންޓެވެ. ނަމަވެސް ބަޔާނަށް ކުރި ލިބެނީ ފައިދާ ގޯލުންނެވެ.