މަރުގެ އިންޒާރުތަކާ ގުޅިގެން ވިލިއަން، ކޮރިންތިއަންސް ދޫކޮށްލައިފި
14 އޯގަސްޓު 2022 | އާދީއްތަ 11:02އޭނާ ކޮރިންތިއަންސްއަށް ބަދަލުވީ މިދިޔަ އަހަރު ހިލޭ ޓްރާންސްފަރއެއްގައި
ބްރެޒިލްގެ ފޯވާޑް ވިލިއަން
މަރުގެ އިންޒާރުތަކެއް ލިބުމާއެކު ބްރެޒިލްގެ ކޮރިންތިއަންސްއަށް ކުޅެމުންދިޔަ ވިލިއަން އެކްލަބު ދޫކޮށްލައިފިއެވެ.
ބްރެޒިލްގެ ފޯވާޑް މީގެ ކުރިން ވަނީ އާސެނަލްއާއި ޗެލްސީއަށްވެސް ކުޅެފައެވެ. އުމުރުން 34 އަހަރުގެ ވިލިއަން، ކޮރިންތިއަންސްއަށް ބަދަލުވީ މިދިޔަ އަހަރު ހިލޭ ޓްރާންސްފަރއެއްގައެވެ. އޭނާ ވަނީ ބްރެޒިލްގެ ގައުމީ ޓީމަށް 70 މެޗު ކުޅެދީފައެވެ. ބްރެޒިލްގެ ގައުމީ ޓީމަށް އެންމެ ފުރަތަމަ ވިލިއަން މެޗެއް ކުޅެދިނީ 2011 ވަނަ އަހަރުއެވެ.
ވިލިއަން ބުނީ އޭނާއަށް ކޮރިންތިއަންސްއާ ގުޅުނުފަހުން ގިނަ އިންޒާރުތަކެއް އޭނައަށް ލިބެމުންދާ ކަމަށެވެ. އެގޮތުން އޭނާގެ އަނބިމީހާއާއި ދަރިންގެ އިތުރުން މައިންބަފައިންނަށްވެސް އިންޒާރުތައް ލިބިފައިވާކަން ފާހަގަކުރިއެވެ. ވިލިއަން ބުނީ މި އިންޒާރުތައް އޭނާއަށް ލިބެނީ ޓީމުގެ ކުޅުން ދަށް ދުވަހެއް ނުވަތަ އޭނާގެ އެންމެ ރަނގަޅު ކުޅުން ނުފެންނަ ދުވަސްތަކުގައިކަމަށެވެ. މި ސަބަބާހުރެ މިހާރު ޓީމު ދޫކޮށްލާފައިވާ ކަމަށާއި، އެނބުރި ޔޫރަޕަށް ދާން ނިންމާފައިވާކަމަށްވެސް އޭނާ ބުންޏެވެ.
