ވެރިކަން "ދުއްވާލުމަށް" އޮތް މަގަކީ ނަޝީދާއި ގުޅިގެން މަސައްކަތްކުރުން ކަމުގައިވާނަމަ، ޔާމީނު އެކަން ކުރާނެ – ޝަރީފް
ވެރިކަން ދުއްވާލުމަށް މަސައްކަތް ކުރައްވަމުން ގެންދަވާ
ރައީސް ޔާމީން ވެރިކަމުގެ ހުވާ ކުރެއްވި ދުވަހު ބޭއްވި ރަސްމިޔާތުގައި ރައީސް ނަޝީދާއި ސަލާމް ކުރައްވަނީ
ސަރުކާރު ބަލިކޮށް ރައީސް އިބްރާހިމް މުހައްމަދު ސާލިހުގެ ވެރިކަން ދުއްވާލުމަށް އޮތް މަގަކީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއެކުގައި މަސައްކަތް ކުރުންކަމުގައިވާނަމަ، އެކަން ރައީސް އަބްދުﷲ ޔާމީން ކުރައްވާނެ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން މެންބަރު ޝަރީފް ވިދާޅުވީ ސަރުކާރާއި އެމްޑީޕީ އަދި ރައީސް ނަޝީދާއި ރައީސް ސާލިހުގެ އަމިއްލަފުޅު ކަންކަމުގެ ތެރެއަށް ޕީޕީއެމްއިން ނުވަންނާނެކަމަށް ރައީސް ޔާމީން ދައްކާފައިވާ ވާހަކަފުޅަކީ ހަގީގަތެއް ނޫން ކަމަށެވެ. ޕީޕީއެމަކީ ވެސް ވެރިކަން ހޯދަން މަސައްކަތް ކުރާ ބައެއް ކަމަށާއި، އެމްޑީޕީ ތެރޭގައި ހަމަނުޖެހުމެއް އޮންނަކަމުގައިވާނަމަ، އެކަމުގައި އިތުރަށް ހުޅު ރޯކުރަން ޕީޕީއެމުން މަސައްކަތް ކުރާނެ ކަމަށް ޝަރީފު ވިދާޅުވިއެވެ.
ޝަރީފް ވިދާޅުވީ ރައްޔިތުންގެ މަޖިލީހުގެ ޖަލްސާތަކަށް ބަލާލީމަ ވެސް އެކަން އެނގޭނެ ކަމަށާއި، ޕީޕީއެމްގެ މެންބަރުން ދައްކާ ވާހަކަތަކުން އެކަންކަން ވަރަށް ސާފުވާނެ ކަމަށެވެ.
ރައީސް މުހައްމަދު ނަޝީދު އާއެކު ސިޔާސީ މަސައްކަތްކުރުމަކީ ވުމަށް ނުވުން ކައިރިކަމެއްކަމަށް ރައީސް ޔާމީން ވިދާޅުވި ވާހަކަފުޅާއި ގުޅިގެން ޝަރީފް ވިދާޅުވީ ސަރުކާރު ބަލިކުރުމަށް، ރައީސް ސާލިހުގެ ވެރިކަން ދުއްވާލުމަށް އޮތްމަގަކީ އެއީކަމުގައިވާނަމަ އެކަން ކުރައްވާނެ ކަމަށާއި، އަދި އެގޮތަށް މަސައްކަތް ކުރައްވަމުން ގެންދަވާ ކަމަށެވެ.
ރައީސް ޔާމީން ބޭއްވެވި ނޫސްވެރިންގެ ބައްދަލުވުމުގައި ރައީސް ނަޝީދާއެކު މަސައްކަތްކުރައްވަފާނެތޯ އާއި ބަރުލަމާނީ ނިޒާމަށް ތާއީދުކުރައްވާތޯ ނޫސްވެރިން ވަނީ ސުވާލުކޮށްފައެވެ. މިސުވާލުތަކަށް ޖަވާބު ދެއްވަމުން ރައީސް ޔާމީން ވިދާޅުވީ ރައީސް ޔާމީން އާއި ޕީޕީއެމްއިން ގަބޫލުކުރާ ފިކުރާއި އިސްލާމީ ސިފަތައް ހިމެނޭ ރާއްޖޭގެ ވެއްޓަށް ފެތޭ ޑިމޮކްރަސީ އާއި ރައީސް ނަޝީދު ގަބޫލުކުރައްވާ ހަމަތައް ތަފާތުކަމަށެވެ. ނަމަވެސް ރައީސް ނަޝީދު އާއި ޔާމީން އާ އެއްބަސްވެވޭ އެއް އިސްލާހަކީ ރާއްޖެއަށް އެންމެ ކަމުދަނީ ބަރުލަމާނީ ނިޒާމުކަމަށް ޔާމީން ވިދާޅުވިއެވެ.
ޔާމީން ވިދާޅުވީ ޑިމޮކްރަސީގައި އޮންނަ އާންމު ހައްގުތައް ކަމަށްވާ ޚިޔާލުފާޅުކުރުމާއި އެއްވެ އުޅުމުގެ މިނިވަންކަންފަދަ ހައްގުތަކުގައި ޚިޔާލުތަފާތުވުން ނޯންނާނެކަމަށެވެ. ނަމަވެސް ވަރަށް ބޮޑެތި ކަންކަމުގައި ރައީސް ނަޝީދާއި ޚިޔާލު ތަފާތުވުންތައް އެބަހުރިކަމަށް ރައީސް ޔާމީން ވިދާޅުވިއެވެ.
އެހެންކަމުން އެފިކުރުތައް އެއް ގަލަކަށް ނާރާކަމަށްވާނަމަ ރައީސް ނަޝީދާއެކު މަސައްކަތްކުރާތަން ފެންނާނެކަމަށް ވިސްނިވަޑައިނުގަންނަވާކަމަށް ރައީސް ޔާމީން ވިދާޅުވިއެވެ. އަދި މިއަދުގެ ރާއްޖޭގެ ހާލަތާއި ކަންކަން ހުރި ގޮތާއި ވިސްނުމަށް ބަލާއިރު މިއީ ވުމަށްވުރެ ބޮޑަށް ނުވުން ކައިރިކަމެއްކަމަށް ރައީސް ޔާމީން ވިދާޅުވިއެވެ.
