ރާއްޖޭގެ ލައިސެންސް މެލޭޝިއާގައި ބޭނުންކުރެވޭ ގޮތް ހަދަނީ
12 އޯގަސްޓު 2022 | ހުކުރު 08:19މި އެއްބަސްވުމަށް އަމަލުކުރަން ފަށާނީ ސޮއިކުރާ ތާރީހުން ފެށިގެން 30 ދުވަސް ފަހުން
ދިވެހި ޑްރައިވިން ލައިސަންސް މެލޭޝިއާގައި ބޭނުންކުރެވޭ ގޮތް ހެދުމުގެ އެއްބަސްވުމުގައި ސޮއިކުރުމަށް މިއަދު ބޭއްވި ރަސްމިއްޔާތުގެ ތެރެއިން
ރާއްޖޭގައި ދޫކުރާ ޑްރައިވިން ލައިސަންސް މެލޭޝިއާގައި ބޭނުންކުރެވޭނެ އިންތިޒާމް ހަމަޖެއްސުމަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ޓްރާންސްޕޯޓު މިނިސްޓަރު އައިޝަތު ނަހުލާއެވެ. އަދި މެލޭޝިއާގެ ފަރާތުން ސޮއިކުރެއްވީ އެޤައުމުގެ ޓްރާންސްޕޯޓް މިނިސްޓަރު ޑރ. ވީކާ ސިއޮންގް އެވެ. މި އެއްބަސްވުމަށް އަމަލުކުރަން ފަށާނީ ސޮއިކުރާ ތާރީހުން ފެށިގެން 30 ދުވަސް ފަހުންނެވެ.
ޓްރާންސްޕޯޓު މިނިސްޓްރީން ބުނިގޮތުގައި މިކަމަށްޓަކާ ބޭއްވި ސޮއިކުރުމުގެ ރަސްމިއްޔާތު ބާއްވާފައި ވަނީ މެލޭޝިއާގެ ޓްރާންސްޕޯޓު މިނިސްޓަރުގެ އޮފީހުގައި ހުކުރު ދުވަހުގެ ހެނދުނުގެ ވަގުތެއްގައެވެ.
ގިނަ އަދަދެއްގެ ދިވެހިން ދިރިއުޅެމުން އަންނަ މެލޭޝިއާއާ އެކު ވެފައިވާ މި އެއްބަސްވުމަށް އަމަލުކުރުމުން ގިނަ ދިވެހީންނަށް އެކަމުގެ ފަސޭހައާއި ލާބަ ލިބިގެންދާނެއެވެ.
މި އެއްބަސްވުމުގެ ދަށުން މެލޭޝިއާ ލައިސަންސް ވެސް ރާއްޖޭގައި ބޭނުންކުރެވޭނެކަން ފާހަގަކޮށްލެވެއެވެ. ޓްރާންސްޕޯޓް މިނިސްޓްރީ އިން ވަނީ މިއީ ދެގައުމުގެ ދެމެދުގައި އޮތް އިތުބަރާއި ބަދަހި ގުޅުން ދައްކުވައިދޭ ކަމެއް ކަމަށް ބުނެފައެވެ. އަދި ރާއްޖޭގައި ދޫކުރާ އިންޖީނުލީ އެއްގަމު އުޅަނދުގެ ހުރިހާ ލައިސަންސެއްވެސް މި އެއްބަސްވުމުގެ ދަށުން ބޭނުންކުރެވޭނެ ކަމަށް އެ ވުޒާރާއިން ވަނީ ބުނެފައެވެ.
