ފެބްރުއަރީގެ އެކެއްގެ އަމުރު ތަންފީޒުކުރި ނަމަ ހަމަނުޖެހުން އުފެދި އިންޑިއާގެ އަސްކަރިއްޔާ ރާއްޖެ އަށް އައީސް: ރައީސް ޔާމީން
11 އޯގަސްޓު 2022 | ބުރާސްފަތި 21:30ފެބްރުއަރީ 1 ގެ އަމުރު ތަންފީޒް ނުކުރަން ނިންމީ އެއީ ޤާނޫނާއި ޚިލާފު ނިންމުމަކަށް ވުމުން
ރައީސް ޔާމީން ނޫސްވެރިންނާއި ބައްދަލުކުރައްވާ ވާހަކަދައްކަވަނީ
"ފެބްރުއަރީ 1"ގެ އަމުރު ތަންފީޒު ކުރި ނަމަ ރާއްޖޭގައި ގިނަ ހަމަނުޖެހުންތަކެއް ހިނގުމުގެ ފުރުސަތު އޮތް ކަމަށާއި، އެކަމުގެ ސަބަބުން ރާއްޖޭގައި ހަމަނުޖެހުން އުފެދި އިންޑިއާގެ އަސްކަރިއްޔާ އިން ރާއްޖެ އަށް ވަނީސް ކަމަށް ކުރީގެ ރައީސް އަދި ޕީޕިއެމްގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވީ ބުރާސްފަތި ދުވަހު ނޫސްވެރިންނާއި ބައްދަލުވުކުރައްވާ ވާހަކަދައްކަވަމުންނެވެ. އެމަނިކުފާނު ވިދާޅުވީ އޭރު ސުޕްރީމްކޯޓުން އެ އަމުރު ނެރުނު އިރު ކޯޓުގައި ތިއްބެވި ފަނޑިޔާރުން ތިއްބެވީ އޭރުގެ ވެރިކަން ބަދަލުކުރުމަށް ވާގިވެރިވެގެން ކަމަށެވެ. އެ އަމުރަކީ ބަޤާވާތެއް ކަމަށް ސިފަކުރައްވާ ރައީސް ޔާމީން ވިދާޅުވީ އޭރު ފުލުހުންނާއި ބައެއް އިދާރާތަކުގެ ވެރިން ވެސް ތިބީ ދުރާލާ އެ އަމުރު ތަންފީޒުކުރުމަށް ތައްޔާރުވެގެން ކަމަށެވެ.
ސިޔާސީ ހައްޔަރީން ދޫކޮށްލުމަށާއި އިތުރު ބައެއް ކަންކަން ހިމެނޭ ހެން ސުޕްރީމްކޯޓުން ނެރުނު އެ އަމުރު ތަންފީޒު ނުކުރުމަށް އޭރު ރައީސް ޔާމީންގެ ސަރުކާރުން ވަނީ ނިންމާފައެވެ. އެގޮތުން ސުޕްރީމް ކޯޓުގެ އެ އަމުރާ ގުޅިގެން އޭރު ކުއްލި ނުރައްކަލުގެ ހާލަތު އިއުލާންކޮށް، އޭރުގެ އުއްތަމަ ފަނޑިޔާރު އަބްދުﷲ ސައީދާއި އޭރުގެ ފަނޑިޔާރު އަލީ ހަމީދު ހައްޔަރުކޮށް އެ ދެ މީހުން ވަނީ ޖަލަށް ލާފައެވެ. އަދި ސުޕްރީމް ކޯޓުގެެ ފަސް ފަނޑިޔާރުންގެ އިއްތިފާގުން ނެރުނު އެ އަމުރު އޭގެ ތިން ދުވަސް ފަހުން ބާތިލްކުރީ ދެން ތިއްބެވި ފަނޑިޔާރުން އިއްތިފާގުންނެވެ.
ބުރާސްފަތި ދުވަހުގެ ނޫސްވެރިންގެ ބައްދަލުވުމުގައި ޔާމީން ވިދާޅުވީ އެ އަމުރު ނެރުނީ ބާރުގަދަ، ނުފޫޒު ހުރި ސިޔާސީ ބޭފުޅުން ފަނޑިޔާރުންނަށް ރިޝްވަތު ދެއްވައިގެން ކަަމަށެވެ. އަދި އެ ދުވަހު ފަނޑިޔާރުން އެމްބަސީތަކުގެ ބޭފުޅުންނަށް ގުޅިކަމަށް ވެސް އެމަނިކުފާނު ވިދާޅުވިއެވެ. އަދި އެ އެއްބަސްވުން ތަންފީޒުކުރި ނަމަ ރާއްޖޭގައި ހަމަނުޖެހުން ހިނގީސް ކަމަށާއި އެކަމުގެ ނަތީޖާ ގޯސްވީސް ކަމަށް ވެސް އެމަނިކުފާނު ވިދާޅުވިއެވެ.
ސުޕްރީމް ކޯޓުގެ ފެބްރުއަރީ 1, 2018 ގެ އަމުރު ލިޔުނީ ރާއްޖޭގައި ހުންނަ އިންޑިއާ އެމްބަސީން ކަމަށް މީގެ ކުރިން ވެސް ރައީސް ޔާމީން ވަނީ ވިދާޅުވެފައެވެ.
2018 ވަނަ އަހަރު ރައީސް ޔާމީން ވެރިކަމުގައި ހުންނެވި އިރު އޭރު އެކި މަސައްކަލަތަކުގައި ގިނަ ސިޔަސީ ބޭފުޅުން ވަނީ ޖަލަށް ލާފައެވެ. މީގެ އިތުރުން ރައީސް ޔާމީންގެ ސަރުކާރުގެ އިސްނެގުމާއި އެކު ރައްޔިތުންގެ މަޖިލީހުން ފާސްކުރި އެންޓި ޑިފެކްޝަން ބިލްގައިވާ ގޮތުން މަޖިލީހުގެ މެމްބަރަކު، ޕާޓީގެ ޓިކެޓުގައި އިންތިހާބުވުމަށް ފަހު، ޕާޓީން އަމިއްލަ އަށް ވަކިވުން، ވަކިކުރުން އަދި އެހެން ޕާޓީއަކާ ގުޅިއްޖެ ނަމަ، ގޮނޑި ގެއްލޭ ގޮތަށް ވަނީ ހަމަޖައްސާފައެވެ. އެންޓި ޑިފެކްޝަން ބިލް ފާސްކުރުމާއި އެކު އޭރު މަޖިލީހުގައި ތިބި 12 މެމްބަރުންގެ ގޮނޑި ގެއްލުމުން، އެ މެމްބަރުން ވަނީ އެ މައްސަލަ ކޯޓަށް ހުށަހަޅާފައެވެ.
1 ފެބްރުއަރީ 2018ގައި ސުޕްރީމްކޯޓުން ނެރުނު އަމުރަކީ އެ ބާރަ މެމްބަރުންގެ ގޮނޑި ނުގެއްލޭ ކަމަށާއި އަދި ހައްޔަރުކޮށްފައިތިބި ސިޔާސީ ކުށްވެރިން ދޫކޮށްލުމަށް އަންގާ ނެރުނު އަމުރެކެވެ.
