އެމްޕީއެލްއިން ދޭ ސްކޮލަރޝިޕްތަކަށް ކުރިއަށް އޮތް ދެ ހަފްތާގެ ތެރޭގައި އިއުލާނުކުރާނެ: އަސްރާ
9 އޯގަސްޓު 2022 | އަންގާރަ 20:10އެ ކުއްޖަކު ކިޔަވަން ބޭނުންވާ އިންސްޓިއުޓްއަކުން ޖާގަ ހޯދުމަކީ އެ ކުއްޖެއްގެ ޒިންމާއެއް
ހަޔަރ އެޑިއުކޭޝަން މިނިސްޓްރީގެ ޑިރެކްޓަރު އައިމިނަތު އަސްރާ | ރާއްޖެއެމްވީ
އެމްޕީއެލް އިން ދޭ ސްކޮލަރޝިޕްތަކަށް ކުރިއަތް ދެ ހަފްތާގެ ތެރޭގައި އިއުލާން ކުރާނެ ކަމަށް ހަޔަރ އެޑިއުކޭޝަން މިނިސްޓްރީގެ ޑިރެކްޓަރު އައިމިނަތު އަސްރާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން އަސްރާ ވިދާޅުވީ ކުރިއަތް ދެ ހަފްތާގެ ތެރޭގައި ސްކޮލަރޝިޕްތަކަށް އިއުލާން ކުރާއިރު އެ ކުއްޖަކު ކިޔަވަން ބޭނުންވާ އިންސްޓިއުޓްއަކުން ޖާގަ ހޯދުމަކީ އެ ކުއްޖެއްގެ ޒިންމާއެއް ކަމަށެވެ. އެ އިންސްޓިޓިއުޓްއަކުން ކޯސް ފަށާ ތާރީހުގައި ކުދިންގެ ކިޔެވުން ފެށިގެންދާނެ ކަމަށް ވެސް އަސްރާ ވިދާޅުވިއެވެ.
އަސްރާ ވިދާޅުވީ ސްކޮލަރޝިޕަށް ހޮވޭ ދަރިވަރުން ޚިދުމަތް ކުރުމަށް ހަމަޖެހިފައިވަނީ ދިވެހިރާއްޖެއަށް ކަމަށެވެ. ވަރަށް ގިނަ ސްކޮލަރޝިޕްތައް ކުރިއަތް އޮތްތާނގައި ހަޔަރ އެޑިއުކޭޝަން މިނިސްޓްރީން އިއުލާން ކުރަން ހަމަޖެހިފައިވާ ކަމަށާއި މެލޭޝިއާގެ ޔުނިވަރސިޓީއަކުން ދީފައި ހުރި ޚާއްސަ އޮފަރތަކެއް އެބަހުރި ކަމަށެވެ.
އަޒްހަރް ޔުނިވަރސިޓީން 22 ސްކޮލަރޝިޕެއް އިއުލާން ކުރެވިފައިވާ ކަމަށާއި އޮގަސްޓް މަހުގެ ތެރޭގައި ވަރަށް ގިނަ ސްކޮލަރޝިޕްތަކަށް އިއުލާން ކުރުމަށް ހަމަޖެހިފައިވާ ކަމަށް ވެސް އަސްރާ ވިދާޅުވިއެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް)އަށް ހުނަރުވެރި، ފަންނީ މީހުން ބިނާކުރުމުގެ އެއްބަސްވުމެއްގައި ހަޔަރަ އެޑިއުކޭޝަން މިނިސްޓްރީއާއެކު އަންގާރަ ދުވަހު ވަނީ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން އެމްޕީއެލްއިން ފަންނީ މުވައްޒަފުން ބިނާކުރުމަށް ދޭ 7 ސްކޮލަރޝިޕެއް މެނޭޖްކުރުމުގެ މަސައްކަތް ކުރާނީ ހަޔަރ އެޑިއުކޭޝަން މިނިސްޓްރީންނެވެ. މި ސްކޮލަރޝިޕްތަކަށް ފަންޑުކުރާނީ އެމްޕީއެލްއިންނެވެ.
މި ހަތް ސްކޮލަރޝިޕްގެ ތެރެއިން އެއް ސްކޮލަރޝިޕް ޚާއްސަކުރެވެނީ މަތީ ސާނަވީ ތައުލީމު ނިންމި ދަރިވަރުންގެ ތެރެއިން ޓޮޕް ޓެންގައި ހިމެނިފައިވާ ދަރިވަރަކަށެވެ. ބާކީ 6 ސްކޮލަރޝިޕް ޝަރުތު ހަމަވާ ކުދިންނަށް ދެވިގެންދާނެއެވެ.
ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޕޯޓް ޓްރެއިނިންގ ސެންޓަރުގެ ލެކްޗަރަރ މަރިޔަމް ހުޝްމާ މުސްތަފާ ވިދާޅުވީ ރާއްޖެއާއި ރާއްޖޭން ބޭރުގައި ކިޔެވުމުގެ ފުރުސަތު އެމްޕީއެލްގެ މުވައްޒަފުންނަށް ފޯރުކޮށްދެވޭ ކަމަށެވެ. ޒުވާނުން ކުންފުންޏާއި ގުޅުމުގެ ޝައުޤުވެރިކަން އިތުރު ކުރުމަށް ޕްރޮގްރާމުތައް ހިންގާ ކަމަށް ވެސް ހުޝްމާ ވިދާޅުވިއެވެ.
ސެންޓަރުން ބޮޑަށް މަސައްކަތް ކުރަނީ ޓެކްނިކަލް ދާއިރާތަކުން މީހުން ތަމްރީން ކުރުމަށްކަން ފާހަގަކުރައްވާ މަރިޔަމް ހުޝާމް މުސްތަފާ ވިދާޅުވީ ޕޯޓް ސެންޓަރުގައި ވެސް ގިނަ ޕްރޮގްރާމުތައް ކުރިއަށްގެންދާ ކަމަށެވެ.
