އާބިދް އަށް ކުރާ ދައުވާ: ޝަމީމް މަރުވީ ތޫނު އެއްޗަކުން މެޔަށް ދިން ޙަމަލާގެ ސަބަބުން މޭ ފިތި، މެޔަށް ލޭ އެޅިގެން
ބަންގްލަދޭޝްގެ ހެކިވެރިޔާގެ ހެކިބަހުގައި ދިން ޖަވާބު އެކި ފަހަރު އެކި ގޮތަށް
ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދު
ހުޅުމާލޭގެ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދުގެ މައްޗަށް ކުރާ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި މިހާރު ކުރިއަށްދަނީ ހެކިބަސް ނެގުމުގެ މަރުޙަލާއެވެ. މި އަޑުއެހުމުގައި އެންމެ ފުރަތަމަ ހެއްކެއްގެ ގޮތުގައި ހާޒިރުކޮށްފައިވަނީ ޝަމީމްގެ ހަށިގަނޑު ބެލި ޑޮކްޓަރެވެ.
ހެކިބަސް ދެމުން ޑޮކްޓަރު ބުނީ، ޝަމީމްގެ މޫނުމަތީގައާއި މޭމަތީގައި ޒަޚަމެއް ހުރިނަމަވެސް، އޭނާގެ ފުރާނައަށް ނުރައްކާވާ ގޮތަށް ލިބިފައިވާ ޒަޚަމް އަކީ މޭމަތީގައި ހުރި ޒަޚަމް ކަމަށެވެ. އެގޮތުން މޭ ހުރަސްކޮށް، މޭކަށިގަނޑުން 5 ސެންޓިމީޓަރު ތިރިއަށް ލިބިފައިވާ އަނިޔާއަކީ ތޫނު އެއްޗަކުން ދީފައިވާ އަނިޔާއެއް ކަމަށާއި، އެ އަނިޔާގެ ސަބަބުން "ހިމޮރެޖިކް ޝޮކް" ނުވަތަ ހަށިގަނޑުން ލޭ ބޭރުވެ ސިކުނޑިއަށް ޝޮކެއް ޖެހުމާއި "ޕަލްމޮނަރީ ކޮލާޕްސް" ނުވަތަ މެޔަށް ލިބުނު އަނިޔާގެ ސަބަބުން މޭ ފިތުމަށް މެދުވެރިވިކަމަށް ހެކިވެރިޔާ ބުނެފައިވެއެވެ.
ޝަމީމަށް ލިބިފައިވާ ދެ ޒަޚަމަކީވެސް އެއް ޙަމަލާއަކުން ލިބިފައިވާ ޒަޚަމެއްކަމަށް ބެލެވޭ ކަމަށް ހެކިވެރިޔާ ބުނެއެވެ.
ހެކިވެރިޔާ ބުނި ގޮތުގައި ޝަމީމް މަރުވި ސަބަބަކީ ތޫނު އެއްޗަކުން އޭނާގެ މެޔަށް ދިން އަނިޔާގެ ސަބަބުން ފުއްޕާމޭ ފިތި، ފުއްޕާމެއަށް ލޭ އެޅިގެންނެވެ.
ބަންގްލަދޭޝްގެ ހެކިވެރިޔާގެ ހެކިބަހުގައި ދިން ޖަވާބު އެކި ފަހަރު އެކި ގޮތަށް:
ދެން ހާޒިރުކުރީ ބަންގްލަދޭޝްގެ ހެކިވެރިއެއް ކަމަށްވާ މުހައްމަދު ރަސިލްއެވެ. އޭނާއަކީ ޚާންޖީ ރެސްޓޯރަންޓު ފޮޅައި ސާފުކުރާ މީހެކެވެ.
އޭނާ ފުރަތަމަ ބުނެފައިވަނީ އޭނާ ޚާންޖީ ރެސްޓޯރަންޓުގައި ވަޒީފާ އަދާކުރީ ކޮން މަހެއްގައިކަން ހަނދާނުގައި ނެތް ކަމަށެވެ.
ޙާދިސާ ހިނގި ދުވަހު ޝަމީމްއާއި މި މައްސަލައިގެ ދައުވާލިބޭ އާބިދުއާމެދު މާރާމާރީއެއް ހިނގިތޯ ދައުލަތުން ސުވާލު ކުރުމުން ހެކިވެރިޔާ ފުރަތަމަ ބުނީ، އޭނާ އެއަށް ޖަވާބުދޭން ބޭނުން ނޫން ކަމަށެވެ.
ފަހުން އޭނާ ބުނީ، މާރާމާރީއެއް ހިނގި ތަނެއް ނުދެކޭ ކަމަށާއި، މީހަކަށް ޒަޚަމެއް ނުވަތަ އަނިޔާއެއް ވީކަމެއްވެސް ނޭނގޭ ކަމަށެވެ.
އެހިސާބުން ދައުލަތުން ވަނީ އެ ދުވަހުގެ ޙާދިސާއާއި މި މައްސަލައިގެ ދައުވާ އަލުން ކިޔާދީފައެވެ. އަދި އިތުރު ސުވާލުތައް އަނެއްކާވެސް އަމާޒުކުރިއެވެ.
ފަހުން ހެކިވެރިޔާ ކިޔާދިން ގޮތުގައި އެ ދުވަހު އޭނަ އުޅުނީ ޑިއުޓީގައެވެ. އޭނާ މާރާމާރީއެއް ހިނގައިގެން އުޅޭ ކަމުގެ އަޑު އެހި ކަމަށާއި، މާރާމާރީ ހިނގި ތަނެއް ނުދެކޭ ކަމަށް ބުންޏެވެ. އެހެންނަމަވެސް، ޝަމީމް އަނިޔާތަކާއެކު އިށީންދެގެން އިންތަން ފެނުނުކަމަށް އޭނާ އެވަގުތު ބުންޏެވެ.
އެހިސާބުން އޭނާ ޓެކްސީއަކާ ހިސާބަށް ގެންދިއުމަށް އޭނާއާއި އިތުރު 4 މީހެއް ވެގެން މަސަައްކަތް ކުރިކަމަށް އެނާ ބުނެފައިވެއެވެ. އޭރުވެސް ކޯތާފަތް މަތީގައި ހުރި ޒަޚަމް ފިޔަވައި އިތުރު ޒަޚަމެއް ނެތް ކަމަށާއި، އެހެންނަމަވެސް ޝަމީމްގެ މުޅި ގައިގައި ލޭ ހުރިކަމަށް އޭނަ ބުންޏެވެ.
ދެން ހެކިވެރިޔާ ބުނީ ޙާދިސާ ހިނގި ފަހުން ބަދިގެއަށް ވަދެފައި ނުވާނެ ކަމަށާއި، މާރާމާރީގެ ފަހުން ޝަމީމް ނުވެސް ފެންނަ ކަމަށެވެ.
އެހިސާބުން އަނެއްކާވެސް ދައުލަތުން ވަނީ، އޭނާ ދެފަހަރު ދެގޮތަށް ބުނާތީ އެކަން އިތުރަށް ސާފުކޮށްދޭން އެދިފައެވެ.
އޭނާ ބުނީ، ޝަމީމް ލޭތަކާއެކު އިންތަން ދުށް ކަމަށެވެ. އަދި އާބިދު ބަދިގޭގައި ހުރިކަމަށްވެސް އޭނާ ބުންޏެވެ. އޭނާ ބުނާ ގޮތުގައި މާރާމާރީ ހިނގިއިރުވެސް އަދި އޭގެ ކުރިންވެސް އާބިދު އެތަނުގައި ހުއްޓެވެ.
ފުލުހުން ދިޔައިރު ތަން މޮޕްލައި ސާފުކޮށްފައި:
ތިންވަނައަށް ހެކިބަސް ނަގާފައިވަނީ ހުޅުމާލޭ ޕޮލިސް ސްޓޭޝަންގައި މަސައްކަތް ކުރާ އޮފިސަރެއްގެއެވެ. އޭނާ ބުނެފައިވާ ގޮތުގައި ޙާދިސާގެ މައުލޫމާތު ލިބުމުން ޚާންޖީ ރެސްޓޯރަންޓަށް ދިޔައިރު އެތަން އޮތީ ސާފުކޮށް މޮޕް އަޅާފައެވެ.
އެހެންނަމަވެސް އެވަރުންވެސް ސިންކު މަތީގައި ލޭގެ ނިޝާން ހުރިކަން އޭނާ ފާހަގަކުރިއެވެ.
އަންނަ ހަފްތާގައިވެސް މި މައްސަލައިގެ ހެކިބަސް ނެގުން ކުރިއަށްދާނެއެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
