އިސްރާއިލުން ގާޒާއަށް ދިން ހަމަލާތައް ދިވެހި ސަރުކާރުން ކުށްވެރިކޮށްފި
ހަމަލާތަކުގައި 24 އަށްވުރެ ގިނަ މީހުން ވަނީ ޝަހީދުކޮށްލާފައި
އިޒްރޭލުން ދިން ހަމަލާ ގައި މަރުވި ތުއްތު ކުއްޖެއްގެ ޖަނާޒާ
އިޒްރޭލުގެ އަސްކަރީ ބާރުތަކުން ހޮނިހިރުދުވަހު ފަލަސްތީނުގެ ގާޒާއަށް ދިން ވަރުގަދަ ވައިގެ ހަމަލާތައް ދިވެހި ސަރުކާރުން ކުށްވެރިކޮށްފިއެވެ.
މި ހަމަލާތަކުގައި ޝަހީދުވި ފަލަސްތީނުގެ ރައްޔިތުންގެ އަދަދު މިހާރުވަނީ އެއްތިރީހަށް އަރާފައެވެ. މީގެ ތެރޭގައި ހ ކުޑަކުދިންވެސް ހިމެނެއެވެ. މި ރަހުމުކުޑަ ހަމަލާތައްއް ކުށްވެރިކޮށް ދިވެހި ސަރުކާރުން ނެރުނު ބަޔާނުގައި ވަނީ އިސްރާއީލުން ގައްޒާގައި ހިންގަމުންދާ ލާއިންސާނީ އަމަލުތަކުގެ ޝިކާރައަކަށް ވެފައިވާ އެންމެންގެ އާއިލާތަކަށް ދިވެހި ސަރުކާރާއި ދިވެހި ރައްޔިތުންގެ ނަމުގައި ތައުޒިޔާ ފޮނުވާފައެވެ.
ފަލަސްތީނުގެ އާންމުންނަށް އަމާޒުކޮށް އިސްރާއިލުން ދެމުންދާ ހަމަލާތަކާއިމެދު ދިވެހި ސަރުކާރުން ކަންބޮޑުވާކަމަށް ވަނީ ބުނެފައެވެ. އިސްރާއިލުން ފަލަސްތީނުގެ އެކި ސަރަހައްދުތައް ހިފަމުންދާއިރު، އެއީ ބައިނަލްއަގުވާމީ ގާނޫނުތަކާއި، ޔޫއެން ސެކިއުރިޓީ ކައުންސިލް އާއި، އާންމު މަޖިލީހުގެ އަމާޒުތަކާ ޚިލާފަށް ކުރަމުންދާ ކަމެއް ކަމަށް ދިވެހި ސަރުކާރުން ބުނެއެވެ.
ދިވެހި ސަރުކާރުން ބުނީ މިކަމަށް އެދެވޭ ހައްލެއް ހޯދިގެންދާނި ފަލަސްތީން ސަރުކާރާއި އިސްރާއިލާ ގުޅިގެން އެއްބަސްވުމަކަށް އައިސްގެން ކަމަށެވެ. އަދި ދިވެހި ސަރުކާރުން ތިބީ ފަލަސްތީން ރައްޔިތުންނާ އެކުގައި ކަމަށާއި، ފަލަސްތީނަށް ކުރިމަތިލާންޖެހިފައިވާ ކަންކަމާއި ގުޅިގެން ބައިނަލްއަގުވާނީ މަޝްރަހުގައި ކުރަންޖެހޭ މަސައްކަތްތަކުގައި ދެމިހުންނާނެ ކަމަށް ދިވެހި ސަރުކާރުން ބުނެފައިވެއެވެ.
އިސްރާއިލުން ހުކުރު ދުވަހު ދޭން ފެށި ހަމަލާތަކުގައި ފުރަތަމަ 24 އަށްވުރެ ގިނަ މީހުން ޝަހީދުކޮށްލާފައި ވެއެވެ. ހަމަލާތަކުގައި 200 އަށްވުރެ ގިނަ މީހުން ޒަހަމްވެފައިވާއިރު ލިބުނު ޒަޚަމް ތަކުގެ ސަބަބުން އިތުރު މީހުން ވަނީ މަރުވެފައެވެ. އިސްރާއިލް ސިފައިންގެ ދުއްތުރާތައް އިތުރުކޮށްފައި ވުމާއިއެކު ފާއިތުވި ދުވަސްތަކަކީ ފަލަސްތީނު ރައްޔިތުންނަށް އުނދަގޫ ދުުވަސްތަކެކެވެ.
މިއީ އިސްރާއިލާ ހަމާސްއާ ދެމެދު 2021 ވަނަ އަހަރުގެ މެއި މަހު ހިނގި ހަމަނުޖެހުންތަކަށްފަހު މިފަދަ ހަމަލާތަކެއް ބަދަލުކުރި ފުރަތަމަ ފަހަރެވެ. މިދިޔަ އަހަރުގެ މެއިމަހު އިސްރާއިލުން ދިން ހަމަލާތަކުގައި ފަލަސްތީނުގެ 250އެއްހާ މީހުން ވަނީ ޝަހީދުވެފައެވެ.
