އެމްޑީޕީ ކޮންގްރެސް މި މަހު 19ގައި
ކޮންގްރެސްގައި 1200 އަށްވުރެ ގިނަ މެމްބަރުން ބައިވެރިވާނެ ކަމަށް ލަފާކޮށްފައިވޭ
އެމްޑީޕީން ބޭއްވި ކޮންގްރެސް ޖަލްސާއެއްގެ ތެރެއިން
މޯލްޑިވިއަން ޑިމޮކްރެޓިވް ޕާޓީ (އެމްޑީޕީ) ގެ ކޮންގްރެސް މި މަހު 19ގައި ސޯޝަލް ސެންޓަރުގައި ބޭއްވުމަށް ހަމަޖައްސައިފިއެވެ.
އެމްޑީޕީ ކޮންގްރެސް ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ 19 ވަނަ ދުވަހުގެ ރޭ 08:00ން 11ށެވެ. އަދި ކޮންގްރެސް ނިންމުމަށް ހަަމަޖެހިފައިވަނީ 21 އޮގަސްޓުގެ ރޭގަނޑު 08:00ން 11:30ށެވެ.
އެމްޑީޕީ އިން ކޮންގްރެސް ގައި ބައިވެރިވުމަށް ރަޖިސްޓްރީ ކުރުމަށް ވެސް ހުޅުވާލިއެވެ. ނަމަވެސް މިހާރު އެ މުއްދަތު ވަނީ ހަމަވެފައެވެ. އެމްޑީޕީން ވަނީ ކޮންގްރެސްގައި 1200 އަށްވުރެ ގިނަ މެމްބަރުން ބައިވެރިވާނެ ކަމަށް ލަފާކޮށްފައެވެ.
އެމްޑީޕީގެ ކޮންގްރެސްގައި ބައިވެރި ވެވޭނީ އެޕާޓީގެ ގައުމީ މަޖިލީހުގެ މެންބަރުންނާއި، ޕްރޮވިންސް ތަކުގެ ރައީސުންނާއި، ނައިބުރައީސުންގެ އިތުރުން ދާއިރާ ތަކުގެ ރައީސުންނާއި، އެމްޑީޕީ އަށް ނިސްބަތްވާ ކައުންސިލަރުންނާއި، ގޮފިތަކުގެ ރައީސުންނަށް އެކަންޏެވެ.
މި އަހަރު ބާއްވާ މޯލްޑިވިއަން ޑިމޮކްރަޓިކް ޕާޓީގެ ކޮންގްރެސްގައި ބައިވެރިވެވޭނީ އިލެކްޝަންސް ކޮމިޝަނުން ބަލަހައްޓަވަމުން ގެންދާ އެޕާޓީގެ ދަފްތަރުގައި ރެޖިސްޓްރީ ވެފައިވާ މެމްބަރުން ހިމަނައިގެން އުފައްދާފައިވާ ގޮފިތަކުގެ ރައީސުންނަށް ކަމަށް އެ ޕާޓީން ވަނީ ބުނެފައެވެ. މިދެންނެވި ރައީސުން ވާންވާނީ ގޮފި ޤަވައިދުގެ 3.3 ވަނަ މާއްދާ ބުނާގޮތަށް އިންތިޚާބުވިތާ 5 އަހަރު ފުރިފައިނުވާ ގޮފި ރައީސުންނަށް ކަމަށްވެސް އެޕާޓީން ބުނެފައިވެއެވެ.
29 މެއި 2022 ގައި ބޭއްވި އެޕާޓީގެ ޤައުމީ މަޖިލިހުގެ މިދައުރުގެ 4 ވަނަ ޖަލްސާގައި ފާސްކޮށްފައިވާ ގޮތުން އެމްޑީޕީގެ މެންބަރުންގެ ގޮތުގައި ބަލަމުންދާ ޕާޓީގެ ދަފުތަރުގައި އެހެނިހެން ސިޔާސީ ޕާޓީތަކުގެ މެންބަރުން ހިމެނިފައިވުމުގެ ސަބަބުން އެ ޕާޓީގެ އިންތިހާބުތަކާއި ޕްރައިމަރީތަކުގައި އެ ޕާޓީއާއި ވާދަކުރާ ޕާޓީތަކުގެ މެންބަރުންނަށް ފަހިވާގޮތަށް ކެންޑީޑޭޓުން ހޮވުމުގެ ފުރުސަތު އޮތުމާއި، އެ ޕާޓީއަށް މާލީ އެއްވެސް މަންފާއެއް ނުކުރާގޮތަށް ހަމައެކަނި އިންތިހާބުތަކުގައި ވޯޓުލާ އެތައް ހާސް ބަޔަކު އެބަތިއްބެވެ.
އެމްޑީޕީގެ އަސާސީ ގަވާއިދުގެ 19 ވަނަ މާއްދާގެ (ހ) ގައި ވާގޮތުން ޕާޓީގެ މެންބަރުކަން ބާތިލްވަނީ ޕާޓީގެ މެންބަރަކު އެމްޑީޕީ ފިޔަވައި އެހެން ސިޔާސީ ޕާޓީއެއްގައި ބައިވެރިވުމުން އަދި އެހެން ސިޔާސީ ޕާޓީއެއްގައި ހަރަކާތެރިވުމުންނެވެ. އަދި ސިޔާސީ ޕާޓީގެ މެންބަރަކަށް ނުހުރެވޭނެކަމަށް އޮންނާތީވެ މިވަގުތު އެމްޑީޕީއިން ބަލަހައްޓަމުން ގެންދާ ދަފްތަރުގައި ހިމެނޭ އިލެކްޝަންސް ކޮމިޝަންގެ އެމްޑީޕީގެ ދަފްތަރުގައި ހިމެނޭ 54،599 މެންބަރުންނަކީ އެމްޑީޕީގެ ރަސްމީ ދަފްތަރުކަމަށް ބަލައި، ދެންތިބި 39،911 މީހުންނަށް އެމްޑީޕީގެ މެންބަރުކަން ސައްހަކުރުމަށް ތިންމަސް ދިނުމަށާއި، މީގެ ތެރެއިން އިލެކްޝަންސް ކޮމިޝަންގައި އެހެންޕާޓީއެއްގެ ރަޖިސްޓްރީގައިވާ މީހުން އެމްޑީޕީން ވަކިކުރުމަށް ވަނީ ގަރާރުގައި ބުނެފައެވެ.
މީގެއިތުރުން އެމްޑީޕީގެ އަސާސީ ގަވާއިދުގެ 15 ވަނަ މާއްދާގެ (ށ) ގައިވާ ގޮތުގެ މަތިން މެންބަރުކަން ގަބޫލުކޮށް 18 ވަނަ މާއްދާގައި ބުނާ ހައްގުތައް ލިބޭނީ އިލެކްޝަންސް ކޮމިޝަންގައި އޮންނަ އެމްޑީޕީ ދަފްތަރުގައި ރަޖިސްޓްރީ ކުރުމުން ކަމަށް މި ގަރާރުގައި ބުނެފައިވެއެވެ.
އެމްޑީޕީގެ ކޮންގްރެސް އޮގަސްޓް މަހު ބޭއްވުމަށް އެ ޕާޓީގެ ގައުމީ މަޖިލީހުން ނިންމާފައިވަނީ މިއަހަރުގެ ފެބްރުއަރީ މަހުގެ 10ގައި ބޭއްވި އެމްޑީޕީ ގައުމީ މަޖިލީހުގެ 4 ވަނަ ދައުރުގެ 2 ވަނަ ޖަލްސާގައެވެ.
