ޕްރައިމަރީ މުދައްރިސުން ހޯދަން ދަތިވޭ: މިނިސްޓްރީ
ސްކޫލް ފެށޭ އިރު ހުރިހާ ސްކޫލެއްގައި މުދައްރިސުން ހަމަވާނެ
މުދައްރިސުން ޖަލްސާއެއްގައި ބައިވެރިވަނީ
ސްކޫލްތަކަށް ބޭނުންވާ ޕްރައިމަރީ ޓީޗަރުން ހޯދުމުގައި އަދިވެސް ދަތިތަކާއި ކުރިމަތިލާން ޖެހޭ ކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
ބުރާސްފަތި ދުވަހު ބޭއްވި މައުލޫމާތު ދިނުމުގެ ބައްދަލުވުމެއްގައި ވާހަކަދައްކަވަމުން އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ އަހުމަދު މުޖާހިދު ވިދާޅުވީ ދިރާސީ އާ އަހަރު ފެށެންވާއިރަށް ސްކޫލްތަކަށް ބޭނުންވާ މުދައްރިސުން ހޯދުމުގެ މަސައްކަތްކޮށް މިހާރު ނިމިފައިވާ ކަމަށާއި ސްކޫލް ހުޅުވޭ އިރު ހުރިހާ ސްކޫލްތަކަށް ބޭނުންވާ މުދައްރިސުން ވެސް ހަމަވާނެ ކަމަށެވެ. އެގޮތުން ސްކޫލްތަކަށް ގެންނަން ޖެހޭ ބިދޭސީ މުދައްރިސުން ދުރާލާ ގެނެސް ނިމިފައިވާ ކަމަށާއި، ބިދޭސީ މުދައްރިސުން ތިބި ތަންތަނަށް ދިވެހި މުދައްރިސުން ހޯދުމުގެ މަސައްކަތް ވެސް ކޮށްފައިވާނެ ކަަމަށް އޭނާ ވިދާޅުވިއެވެ.
މީގެ އިތުރުން މުދައްރިސުންގެ މުސާރައިގެ އޮނިގަނޑަށް އައި ބަދަލާއި އެކު މުދައްރިސުންގެ މަޤާމަށް ކުރިމަތިލާ މީހުން އިތުުރުވެ މުދައްރިސުންގެ ދަތިކަމަށް ރަނގަޅު ހައްލެއް ލިބިފައިވާ ކަމަށް އޭނާ ވިދާޅުވިއެވެ. އެހެންނަމަވެސް އަދިވެސް ޕްރައިމަރީ ޓީޗަރުން ހޯދުމުގައި ދަތިތައް ދިމާވާ ކަމަށް އޭނާ ފާހަގަކުރެއްވިއެވެ. މުދައްރިސުން މަދުވާ ދާއިރާތަކަކީ ކޮބާކަން ދެނެގަނެ އެ ދާއިރާތަކުން މުދައްރިސުން ތަމްރީނުކުރުމުގެ މަސައްކަތް ވެސް ކުރަމުންދާކަން އެޑިއުކޭޝަން މިނިސްޓްރީ އިން ފާހަގަކުރައްވައެވެ.
މުސާރައަށް ގެނައި ބަދަލާއެކު ދާއިރާގައި ޓީޗަރުން ހިފެހެއްޓުމަށް އިތުރު ބާރަކަށް ވެގެންދާނެކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ މީގެ ކުރިން ވަނީ ވިދާޅުވެފައެވެ.
ތައުލީމީ ދާއިރާގައި މަސައްކަތްކުރާ މީހުންގެ މުސާރައަށް ގެނައި ބަދަލާ ގުޅޭ ގޮތުން އޮތް ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ޓީޗަރުންނަށް ދެމުންދާ މުސާރައާއި އެމީހުން ކުރާ މަސައްކަތާއި މިހާރު ނުބައްދަލު ކަމަށެވެ. މިނިސްޓަރ ވިދާޅުވީ، ރައީސްގެ އިސްނެންގެވުމުގެ ދަށުން ތައުލީމީ ދާއިރާގެ ދިރާސާއެއް ހަދާފައިވާ ކަމަށާއި، އެ ދިރާސާއިން ފާހަގަވި ގޮތުގައި ތައުލީމީ ދާއިރާއަށް އަލަށް މީހުން ނުކުތުން މަދުވަނީ ލިބޭ މުސާރަ ކުޑަކަމުން ކަމަށެވެ. އެހެންކަމުން މުސާރައަށް ގެނައި ބަދަލާއެކު އަލަށް ދާއިރާއަށް މީހުން ވަނުމަށް ހިތްވަރު ލިބިގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ޓީޗަރުން މިކުރާ މަސައްކަތަކީ ހަގީގަތުގައި އަގު ކުރެވޭނެ މަސައްކަތެއް ނޫން ކަމަށެވެ. އެހެން ކަމުން މަސައްކަތް ކުރަނީ އެ ކުރާ މަސައްކަތަށް ހައްގު އަގު ދެވޭތޯ ކަމަށް މިނިސްޓަރ ވިދާޅުވިއެވެ. މިހާރު މިއައި ހެޔޮ ބަދަލާއިއެކު މުދަރިއްސުންނަށް އަބުރުވެރިކަމާއިއެކު ދިރިއުޅޭވޭނެ ވަރުގެ އެއްޗެއް ލިބިގެންދާނެ ކަމަށް މިނިސްޓަރ ވިދާޅުވިއެވެ.
ޓީޗަރުންގެ މުސާރައަށް ގެނައި މި ބަދަލާއެކީ ޓީޗަރުންގެ މުސާރަތައް 56 އިންސައްތަ ބޮޑުވާނެއެވެ.
ޓީޗަރުންގެ މުސާރައަށް ބަދަލު ގެނެސްފައިވަނީ، 5 ރޭންކަކަށް ބަހާލައިގެންނެވެ. އޭގެ ތެރެއިން ޑިޕްލޮމާ ފެންވަރުގެ ޓީޗަރެއްގެ މުސާރަ 10،000ން 13،000ށް އިތުރުވެގެންދާއިރު، ޑިގްރީ ފެންވަރުގެ ޓީޗަރުންގެ މުސާރަ 13،000ން 19،000ށް ބޮޑުވެގެންދެއެވެ. މާސްޓަރސް ފެންވަރުގެ ޓީޗަރުންގެ މުސާރަ 15،000ން 20،000ށް އިތުރުވެގެންދެއެވެ.
ޓީޗަރުންގެ މުސާރައަށް މި އައި ބޮޑު ބަދަލުގެ އަސަރު ރާއްޖޭގައި މަސައްކަތްކުރާ 6815 ޓީޗަރުންގެ މުސާރައިން ފެންނާނެއެވެ.
