އެމްޓީސީސީއަށް މުދަލެއް ގަތުމަށް 10 ވަރަކަށް މީހުންގެ ސޮއި ބޭނުންވާއިރު، އެ ހުރިހާ އެންމެން އެއްބައިވެގެން ކޮރަޕްޝަން ހިންގުމަށް އޮތް ފުރުސަތު ވަރަށް ކުޑަ ކަމަށް އެކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޓީސީސީން ދާދި ފަހުން ގަތް އެކްސްކަވޭޓަރުތައް ގަތުމުގެ މުއާމަލާތުގައި ކޮރަޕްޝަން ހިންގާފައިވާކަމަށް ބުނެ ސޯޝަލް މީޑިއާގައާއި ބައެއް ނޫސްތަކުން ރިޕޯޓުކުރާތީ އެކަމާ ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އާޒިމް ވިދާޅުވީ އެމްޓީސީސީގެ ހިންގުމާ ހަވާލުވުމުގެ ކުރިން އެމްޓީސީސީ ތެރޭގައި ކަންކަން ގޮސްފައިވަނީ އެއްވެސް ހަރުދަނާ ކަމެއް ނެތް ގޮތަކަށް ކަމަށެވެ.
އާޒިމް ވިދާޅުވީ އެމްޓީސީސީގެ ހިންގުމާ ހަވާލުވެވަޑައިގެން ކުންފުނި ހަރުދަނާކުރުމަށް ގިނަ މަސައްކަތްތަކެއް ކުރައްވާފައިވާކަމަށެވެ. ސެންޓްރަލައިޒް ޕްރޮކިއުމަންޓް ނިޒާމު ގާއިމްކޮށް، ދެފުށް ފެންނަގޮތަށް ކުންފުނީގެ ކަންކަން ކުރިއަށްގެންދަން ބާރުއެޅުމުގެ ގޮތުން ކުންފުންޏަށް މުދަލެއް ހޯދިޔަސް އެ ގަތުމުގެ ކުރިން 10 މީހުންގެ ސޮއި ބޭނުންވާކަމަށް އާޒިމް ވިދާޅުވިއެވެ.
މީގެ އިތުރުން އެމްޓީސީސީގައި ވަރަށް ވަރުގަދަ މިނިވަން އޮޑިޓް ޑިވިޝަނެއް އޮންނާނެ ކަމަށް އާޒިމް ވިދާޅުވިއެވެ. އެއީވެސް ދެފުށް ފެންނަ ގޮތަކަށް ކަންކަން ކުރިއަށްގެންދިއުމަށް ކަމަށާއި، އެހެން އޮތްއިރު، އެކުންފުނި ތެރޭގައި ކޮރަޕްޝަން ހިނގުމުގެ ފުރުސަތު ވަރަށް ކުޑަވާނެ ކަމަށް އާޒިމް ވިދާޅުވިއެވެ.
އެމްޓީސީސީއަށް ދާދި ފަހުން ގަތް 8 އެކްސްކަވޭޓަރު ގަތުމަށް ހެޔޮ އަގުގައި ކުންފުންޏަކުން ހުށަހަޅާފައި އޮއްވައި އެއަށްވުރެ މާ ބޮޑު އަގެއް ހުށަހަޅާފައި އޮތް ކުންފުންޏަކަށް މަސައްކަތް ހަވާލުކޮށްގެން އެކްސްކަވޭޓަރުތައް ގެނެސްފައިވާކަމަށް ބައެއް ނޫސްތަކުން ވަނީ ރިޕޯޓުކޮށްފައެވެ. އަދި މި މުއާމަލާތް ހިންގާފައިވަނީ ކޮރަޕްޝަން އެކުލެވޭ ގޮތަށް ކަމަށްވެސް ވަނީ ބުނެފައެވެ.
