ބަލިމީހުން އުފުލޭނެ ގޮތް ހެދުމަށް މަންތާއާއި ފްލައިމީއަށް އަންގައިފި
މިކަން އަންގާފައިވަނީ މެމޯއަކުން
މަންތާ އެއަރގެ ފްލައިޓެއް
ކުރިއަށް އޮތް ތިން މަސް ދުވަހުގެ ތެރޭގައި ފްލައިޓްގައި ބަލި މީހުން އުފުލޭނެ ގޮތް ހެދުމަށް މަންތާ އެއަރއާއި ފްލައިމީއަށް ޓްރާންސްޕޯޓް މިނިސްޓްރީން އަންގައިފިއެވެ.
ރާއްޖެއެމްވީއަށް މައުލޫމާތު ދެމުން ޓްރާންސްޕޯޓް މިނިސްޓްރީން ބުނީ، ކުރިޔަށް އޮތް ތިންމަސްދުވަހުގެ ތެރޭގައި ބަލިމީހުން އުފުލޭނެ އިންތިޒާމު ހަމަޖައްސަން މަންތާ އެއަރއާއި ފްލައިމީ އޮޕަރޭޓްކުރާ ފަރާތްތަކަށް ސިވިލް އޭވިއޭޝަނަށް މެމޯއަކުން އެމިނިސްޓްރީން އަންގާފައިވާކަމަށާއި، އެކަން ނުކޮށްފިނަމަ ދެން އަޅަންޖެހޭ ފިޔަވަޅުތައް އަޅާނެކަމަށެވެ.
ޓްރާންސްޕޯޓް މިނިސްޓްރީން މިހެން އަންގާފައި މިވަނީ މަންތާ އެއަރގެ ފްލައިޓަކަށް ބަލި މީހަކު އަރުވަން ދެކޮޅުހެދި މައްސަލައެއް ފެންމަތިވުމާ ގުޅިގެންނެވެ. އަދި ދ. ކުޑަހުވަދޫ ރައްޔިތުން ވަނީ މިކަމާގުޅިގެން މުޒާހަރާވެސް ކޮށްފައެވެ.
މަންތާ އެއަރގެ ފްލައިޓަކަށް ބަލި މީހަކު އަރުވަން ދެކޮޅުހެދިކަމަށް ބުނެ ދައްކަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށާއި، އެ މައްސަލައިގައި މުޒާހަރާކުރި މީހުން ވަނީ މަންތާގެ ފްލައިޓްގައި ދަތުރުކުރި ފަތުރުވެރިން ހައިޖެކްކޮށްފައިކަމަށް، އެ އެއަރލައިންގެ ސީއީއޯ މުހައްމަދު ޚަލީލް ވަނީ ވިދާޅުވެފައެވެ.
މަންތާ އެއަރއިން ވަނީ މަންތާ އެއަރއިން ބޭނުންކުރާ ސީޕްލޭންތަކަކީ، ބަލި މީހުން އަރުވަން ބޭނުންކުރާ ސްޓްރެޗަރ އެރުވޭގޮތަށް ފަރުމާކޮށްފައި ހުންނަ ބޯޓުތަކެއް ނޫންކަން ފާހަގަކޮށްފައެވެ. އަދި އެއީ ވައިގެ ދަތުރުފަތުރުގެ ގާނޫނުތަކާ އެއްގޮތަށް ބެލި ނަމަވެސް ނުކުރެވޭނެކަމެއްކަން އެ އެއަރލައިނުން ފާހަގަކުރެއެވެ.
