މެޗު ނިމުމުގެ ކުރިން ދަނޑު ދޫކޮށް ދިޔަ ކުޅުންތެރިންނަށް ޓެން ހާގް ފާޑު ކިޔައިފި

ރަޔޯ ވަޔެކާނޯއާ ދެކޮޅަށް ކުޅުނު މެޗު ނިމުމުގެ ކުރިން ދަނޑު ދޫކޮށް ދިޔަ މެންޗެސްޓަރ ޔުނައިޓެޑުގެ ކުޅުންތެރިންނަށް އެރިކް ޓެން ހާގް ފާޑު ކިޔައިފިއެވެ.

އެ މެޗު ނިމުނީ 1-1 އިން އެއްވަރުވެގެންނެވެ. މެޗުގެ މެދު ތެރެއިން ދަނޑު ދޫކޮށް ދިޔަ ކުޅުންތެރިންގެ ތެރޭގައި ކްރިސްޓިއާނޯ ރޮނާލްޑޯ ހިމެނެއެވެ. ދަނޑު ދޫކޮށް އޭނާ ދިޔައީ، މެޗުގެ ފުރަތަމަ 11 ގައި ހިމެނުމަށްފަހު، ފުރަތަމަ ހާފަށްފަހު އޭނާ ބަދަލުކޮށްފައި ވަނިކޮށެވެ. ރޮނާލްޑޯގެ އިތުރުން އެހެން ކުޅުންތެރިން ވެސް ދަނޑު ދޫކޮށް ދިޔަ މަންޒަރު ފެންނަ ފޮޓޯތަކެއް ވެސް ވަނީ އާންމުވެފައެވެ.

މިކަމާ ގުޅިގެން ޓެން ހާގް ބުނީ އެއްވެސް ހާލެއްގައި އެއީ އޭނާއަށް ބަލައިގަނެވޭނެ ކަމެއް ނޫން ކަމަށެވެ. އޭނާ ބުނީ އެއްވެސް މީހަކަށް އެކަން ބަލައިނުގަނެވޭނެ ކަމަށެވެ. މީގެ އިތުރުން ޓެން ހާގް ބުނީ އެންމެންނަކީ އެއް ޓީމެއް ކަމަށާއި، ފަހު ވަގުތާ ޖެހެންދެން ޓީމާއެކު މަޑުކުރަން ޖެހޭނެ ކަމަށެވެ.

މިދިޔަ ސީޒަން ނިމުމާއެކު ރޮނާލްޑޯ ވަނީ ޓީމު ދޫކޮށްލަން ބޭނުންވާކަަމަށް އަންގާފައެވެ. ނަމަވެސް ޔުނައިޓެޑުން އެންގީ އޭނާ ދޫކޮށް ނުލާނެ ކަމަށެވެ. އެގޮތަށް އަންގައި ބަދަލުވާނެ ކުލަބެއް ހޯދުމަށް ދަތިތަކަކާ ދިމާވެ، އެންމެ ފަހުން ރޮނާލްޑޯ ވަނީ އެނބުރި ޓީމާ ގުޅިފައެވެ. ޔޫރަޕުގެ ބޮޑެތި ކުލަބުތަކުގެ ތެރޭގައި ހިމެނޭ ގިނަ ކުލަބުތަކުން ރޮނާލްޑޯ ގެންދާކަށް ބޭނުނެއް ނުވިއެވެ.

އައު ސީޒަންގެ ޕްރިމިއަރ ލީގުގައި ޔުނައިޓެޑު ކުޅޭ ފުރަތަމަ މެޗުގައި އެ ޓީމު ނުކުންނާނީ ބްރައިޓަންއާ ދެކޮޅަށެވެ.