ޑެންގީ ހުން ގިނަވަނީ
4 އޯގަސްޓު 2022 | ބުރާސްފަތި 02:17ދެ ކުއްޖަކަށް މި ފަހުން އައިޖީއެމްއެޗުގެ އައިސީޔޫގައި ފަރުވާ ދީފައިވޭ
އައިޖީއެމްއެޗް
ޑެންގީ ހުން ޖެހޭ ކުޑަކުދިންގެ އަދަދު އިތުރުވަމުން އަންނައިރު އިތުރު ކުއްޖަކަށް އައިޖީއެމްއެޗްގެ އައިސީޔޫގައި ފަރުވާ ދޭން ފަށައިފއެވެ.
އެ ހޮސްޕިޓަލްގެ ކުޑަކުދިންގެ ބަލިތަކުގެ ޑޮކްޓަރު، ޑރ. އަހުމަދު ފައިސަލް ކުރެއްވި ޓްވީޓުގައި ވިދާޅުވީ ޑެންގީ ހުން ޖެހިގެން އަހަރެއް ނުވާ ކުއްޖަކަށް އަންގާރަ ދުވަހުގެ ރޭ އައިސީޔޫގައި ފަރުވާ ދޭން ފެށި ކަމަށެވެ.
އެ ކުއްޖާ ހޮޑުލާއިރު ލޭ އަންނާތީ ލޭ އަޅަން ވެސް ޖެހުނު ކަމަށް ވިދާޅުވިއެވެ.
ޑެންގީ ހުން ޖެހިގެން ހާލު ބޮޑުވި ދެ ކުއްޖަކަށް މި ފަހުން އައިޖީއެމްއެޗުގެ އައިސީޔޫގައި ފަރުވާ ދީފައިވެއެވެ. ޑރ. ފައިސަލް ވިދާޅުވީ އެ ކުދިންގެ ހާލު ރަނގަޅުވަމުން އަންނާތީ ވޯޑަށް ބަދަލުކޮށް ފަރުވާ ދެމުން އަންނަ ކަމަށެވެ.
އޭގެ ފަހުން އޭނާ ކުރެއްވި އެހެން ޓްވީޓެއްގައި ވިދާޅުވީ ޑެންގީ ހުންޖެހިގެން ހާލު ސީރިއަސްވާ ކުދިންގެ އަދަދު ފާއިތުވި ތިން އަހަރަށް ވުރެ މި އަހަރު ގިނަ ކަމަށެވެ. ގިނަ ކުދިންނަށް އައިސީޔޫގައި ފަރުވާ ދޭން ޖެހި، ލޭ އަޅަން ޖެހިފައިވާ ކަމަށް ޑރ. ފައިސަލް ވިދާޅުވިއެވެ.
މިއީ ވިއްސާރަ ދުވަސްވަރަކަށް ވާތީ މި ދުވަސްވަރު ޑެންގީ ހުމުގެ ކޭސްތައް ވަނީ އިތުރުވެފައެވެ.
މަދިރިން ރައްކާތެރިވުމަށް ހަށިގަނޑު ރަނގަޅަށް ނިވާވާ ގޮތަށް ހެދުން އަޅާ މަދިރި ލޯޝަން ފަދަ ތަކެތި ބޭނުން ކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިލްތިމާސްކޮށްފައެވެ. އަދި ފަތިސްގަޑި އާއި އިރުއޮއްސޭ ވަގުތު ގޭގެ ދޮރުތައް ލައްޕާ ފެން ހެދޭގޮތަށް ތަންތަން ނުބެހެއްޓުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.
