ޕެޓިޝަނެއް ހުށަހަޅައިގެން އެއްވެސް ނަރުހަކަށް ފިޔަވަޅު ނާޅަން: އައިޖީއެމްއެޗް

އިންދިރާ ގާންދީ މެމޯރިއަލް ހޮސްޕިޓަލުގެ ނަރުހުންތަކެއް ހުށަހެޅި ޕެޓިޝަނަކާ ގުޅިގެން އެ ނަރުހުންނަށް ފިޔަވަޅު އަޅަމުންދާކަމަށް ދެކެވޭ ވާހަކަތަކަކީ ހަގީގަތެއް ނެތް ދޮގު ވާހަކަތަކެއް ކަމަށް އެ ހޮސްޕިޓަލުން ބުނެފިއެވެ.

އެ ހޮސްޕިޓަލުން މިހެން ބުނީ އައިޖީއެމްއެޗުގެ އިމަރޖެންސީ ރޫމުގައި މަސައްކަތްކުރާ ނަރުހުންގެ އިންޗާޖުގެ ފަރާތުން އެ މީހުންނަށް ބޮޑެތި ތަކުލީފުތަކެއް ކުރިމަތިވަމުން އަންނަ ކަމަށް ބުނެ، ޕެޓިޝަނެއް ހުށަހެޅި ނަރުހުންނާ ދެކޮޅަށް އެ ހޮސްޕިޓަލުން ފިޔަވަޅު އަޅާފައިވާ ކަމަށް ބައެއް ނޫސްތަކުން ރިޕޯޓް ކުރުމާ ގުޅިގެންނެވެ. އެގޮތުން ނަރުހުން އެކި ޑިޕާޓްމަންޓުތަކަށް ބަދަލު ކުރާ ކަމަށް ވަނީ ބުނެފައެވެ.

މިކަމާ ގުޅިގެން އައިޖީއެމްއެޗުން ނެރުނު ބަޔާނެއްގައި ބުނީ ނަރުހުން އެކި ޑިޕާޓްމަންޓްތަކަށް ބަދަލުކުރުމަށް ނިންމާފައިވާ ނިންމުމަކީ، އެ ހޮސްޕިޓަލުގެ އިމަރޖެންސީ ޑިޕާޓްމަންޓުގައި މަސައްކަތްކުރާ ނަރުހުން ހުށަހަޅާފައިވާ ޕެޓިޝަނާ އެއްވެސް ގުޅުމެއް ހުރި ކަމެއް ނޫންކަމަށެވެ. އަދި ޕެޓިޝަންގައި ސޮއިކުރި ނަރުހުން އެކި ޑިޕާޓްމަންޓްތަކަށް ބަދަލުކުރަން ނިންމާފައިވާކަމަށް ބައެއް މީޑިއާތަކުން ފަތުރަމުންދާ ޚަބަރަކީ އެއްވެސް އަސާސެއް ނެތް ދޮގު ވާހަކަތަކެއްކަމަށެވެ.

އައިޖީއެމްއެޗުން ބުނީ ނަރުހުންގެ ޕެޓިޝަނާއި ގުޅިގެން ދިވެހި ސިވިލް ސަރވިސް ޤަވާއިދުގައިވާ ފަދައިން އެމައްސަލަ ތަހުގީގުކޮށް، ފުރިހަމަކުރަންޖެހޭ އިޖްރާތްތައް ފުރިހަމަ ކުރަމުންދާކަމަށެވެ.

އައިޖީއެމްއެޗްގެ އީއާރުގެ ނަރުހުން ހުށަހެޅި ޕެޓިޝަންގައި ވަނީ ބަލިވެ އުޅޭ މުވައްޒަފުން މަސައްކަތަށް ނުކުތުމަށް މަޖުބޫރުކުރުވުމާއި، އެ ތަނުގެ ހިންގުމުގައި ވެފައިވާ އިހުމާލުތަކުގެ އިތުރުން މުވައްޒަފުންނަށް އިހާނެތިކޮށް ހިތުން ފަދަ މައްސަލަތައް ފާހަގަކޮށްފައެވެ.