ތަލަވުމަކީ އެކަމަކާ ބައެއް މީހުން ހިތާމަ ކުރާ ކަމަކެވެ. އަނެއް ބަޔަކަށް އެއީ ފެޝަނެކެވެ. ކޮންމެ ގޮތަކަށް ކަން އޮތް ކަމުގައިވީ ނަމަވެސް، ތަލަވުމާއި ނުވުން ގުޅިފައިވަނީ ހަމަ އެންމެ ކެމިކަލްއަކާ ކަމަށް ދާދި ފަހުން ކުރި ދިރާސާއަކުން ވަނީ ދައްކާފައެވެ.
އިނގިރޭސިވިލާތަށް ބަލާއިރު ފިރިހެނުންގެ އާބާދީގެ 3 ބައިކުޅަ 1 މީހުންނަކީ ތަލަވުމާ ކުރިމަތިލާންޖެހޭ ބައެކެވެ. ކަން މިހެން އޮތް އޮތް އިރު، ތަލައާ ގުޅިފައިވާ ކެމިކަލްއަކީ، ފާރު ފަސޭހަ ވުމުގެ ދުވެލިވެސް ހަލުވިކޮށްދޭ ކެމިކަލްއެއް ކަން ފާހަގަ ކުރަން ޖެހެއެވެ.
ޔުނިވާސިޓީ އޮފް ކެލިފޯނިއާ، ރިވާސައިޑްގެ ދިރާސާ ޓީމުގެ ހޯދުންތަކުން ދައްކާ ގޮތުގައި، ބޮލުގެ އިސްތަށިތައް ބައިބައިވެ، މަރުވުމުގެ ޒިންމާ އުފުލަން ޖެހެނީ ހަމަ އެންމެ ކެމިކަލްއެކެވެ.
ބަޔޯފިޒިކަލް ޖާނަލްގައި އާންމުކޮށްފައި ވާ ދިރާސާ ކުރިއަށް ގެންދިއުމުގައި، ދިރާސާ ޓީމުން ވަނީ އިންސާނާގެ އިސްތަށިގަނޑަށް ހާއްސަ ސަމާލުކަމެއް ދީފައެވެ. ސަބަބެއް ނެތިއެއް ނޫނެވެ. އެހެނީ އިސްތަށިގަނޑަކީ އިންސާނާގެ ހަށިގަނޑުގައިވާ ގުނަވަންތަކުގެ ތެރެއިން، އޭގެ ޒާތުގައި އަމިއްލައަށް ފައިބާ، އަލުން ފަޅާ އިޔާދަވަމުންދާ ހަމަ އެކަނި ގުނަވަނަށް ވުމެވެ.
ސައެންސްވެރިން ވަނީ މިކަމާ ގުޅިފައިވާ، ޒާތެއްގެ ޕްރޮޓީންއެއް ހޯދާފައެވެ. އެއަށް ދީފައިވާ ނަމަކީ ޓީޖީއެފް-ބީޓާއެވެ. އެއީ އިސްތަށިތައް ބައިވެ، މަރުވެދާ ދިއުން ކޮންޓްރޯލް ކުރާ ކެމިކަލްއެވެ.
ދިރާސާގެ މުސައްނިފެއް ކަމަށްވާ ކީޝުއާން ވޭންގް ބުނާ ގޮތުގައި ޓީޖީއެފް-ބީޓާއިން އަދާކުރާ، ވަރަށް ތަފާތު 2 ޒިންމާއެއް އޮވެއެވެ. އެއީ އާންމު މީހަކަށް ވިސްނޭނެ ފަދަ ތިލަ އިބާރާތަކުން ދަންނަވަނީނަމަ، އާ އިސްތަށި ފެޅުވުމާއި، އިސްތަށިތައް މަރާލުމުގެ ޒިންމާއެވެ.
އެކަން ތަފްސީލު ކޮށްދެމުން ވޭންގް ބުނީ އިސްތައްޓެއް އޭގެ ޒާތުގައި މަރުވި ކަމުގައި ވީ ނަމަވެސް، ބޮލު ތެރޭގައިވާ އޭގެ ސްޓެމް ސެލް ރިވާޒް ހުސް ނުވާ ކަމަށެވެ. ދިރިހުރި ސްޓެމް ސެލްއަށް ސިގުނަލް ލިބޭ ހިސާބުން ބައިވެ، އާ އިސްތައްޓެއް ފަޅައެވެ. އެހެން ކަމުން އިސްތަށީގެ ސްޓެމްސެލް ހަރަކާތްތެރި ކުރުވައިގެން، އިސްތަށި ފެޅުން އިތުރު ކުރެވިދާނެ ކަމަށް ދިރާސާގެ މުސައްނިފުން ވަނީ ފާހަގަ ކޮށްފައެވެ. ނަމަވެސް މިއީ އަދި ވަކި ހާއްސަ ދިރާސާތަކެއް ކުރިއަށް ގެންދަން ޖެހޭ ދާއިރާއެކެވެ.
